စစ်ကိုင်းတိုင်း၊ ယင်းမာပင်မြို့နယ်၊ ဆည်ထန်တောကြီးကျေးရွာမှာ ဒီဇင်ဘာ ၁၁ ရက် နေ့လယ်က စစ်ကောင်စီတပ်တွေက လက်နက်ကြီးနဲ့ ပစ်ခတ်ခဲ့တာကြောင့် အမျိုးသား တယောက် ဒဏ်ရာရခဲ့ပြီး နေအိမ် ၂ လုံး ပျက်စီးသွားတယ်လို့ ဒေသခံတွေကပြောပါတယ်။
တိုက်ပွဲဖြစ်ပွားတာမရှိဘဲ အကြောင်းမဲ့ပစ်ခတ်တာဖြစ်ပြီး အဲဒီလိုပစ်ခတ်မှုကို ဘယ်နေရာကနေ လှမ်းပစ်တယ်ဆိုတာ အတိအကျ မသိရသေးပေမဲ့ မြန်မာ-ယန်စီ လုပ်ကွက်အတွင်းက တောင်ကုန်းတစ်နေရာကနေ လှမ်းပစ်တာဖြစ်နိုင်တယ်လို့ ဒေသခံတွေက ခန့်မှန်းပြောပါတယ်။
စစ်တပ်က လက်နက်ကြီးတွေနဲ့ ကျေးရွာတွေဘက်ကို ပစ်ခတ်နေတာကြောင့် ယင်းမာပင်မြို့နယ် အရှေ့ခြမ်းနဲ့ ဆားလင်းကြီးမြို့နယ်မြောက်ခြမ်းတို့က ဒေသခံပြည်သူ ၈၀၀၀ ဝန်းကျင်လောက် နေအိမ်တွေမှာမနေရဲကြဘဲ ထွက်ပြေးတိမ်းရှောင် နေကြရပါတယ်။
ဒါ့အပြင် ဒီဇင်ဘာ ၁၁ ရက် မနက်ပိုင်းကလည်း ကောင်းဆင့်ကျေးရွာက ခရီးသွား ပြည်သူ ၂ ယောက်ကို ဖိုလ်ဝင်တောင်လမ်းခွဲအနီးမှာ စစ်ကောင်စီတပ်ဖွဲ့က သေနတ်နဲ့ပစ်သတ်လိုက်တယ်လို့ ဒေသခံတွေကပြောပါတယ်။