ဖလမ်းမြို့နယ် တားလ်ကျေးရွာက နေအိမ် ၈ လုံးကို အကြမ်းဖက်စစ်တပ်က ထပ်မံမီးရှို့

ဖလမ်းမြို့နယ် တားလ်ကျေးရွာက နေအိမ် ၈ လုံးကို အကြမ်းဖက်စစ်တပ်က ထပ်မံမီးရှို့ 

DVBချင်းပြည်နယ် ဖလမ်းမြို့နယ် တားလ်ကျေးရွာကို အောက်တိုဘာလ ၂၅ ရက်နေ့မနက်ပိုင်းမှာ အကြမ်းဖက်စစ်တပ်က ဒုတိယအကြိမ် ထပ်မံမီးရှို့တာကြောင့် နေအိမ် ၈ လုံး မီးလောင်ကျွမ်းဆုံးရှုံးခဲ့ရတယ်လို့ ဒေသခံတွေဆီကနေ သိရပါတယ်။

အကြမ်းဖက်စစ်တပ်ဟာ အင်အား ၅၀ လောက်နဲ့ ဟားခါးမြို့နယ်ကနေ ဖလမ်းမြို့နယ်ဘက်ကို မနေ့က မနက်ပိုင်းမှာ ရောက်လာပြီး တားလ်ကျေးရွာ ဘုရားကျောင်းမှာ ညအိပ်တပ်စွဲကာ ဒီနေ့မနက် ၇ နာရီလောက်က ပြန်အထွက် နေအိမ် ၈ လုံးကို မီးရှို့ဖျက်ဆီးသွားကြတာလို့ ဒေသခံတစ်ယောက်က ပြောပါတယ်။

ဒါအပြင် အကြမ်းဖက်စစ်တပ်ဟာ ရွာထဲမှာရှိတဲ့ နေအိမ်တွေကို ဖောက်ထွင်းဝင်ရောက်ပြီးတော့ စားနက်ရိက္ခာတွေအပါဝင် နေအိမ်မှာရှိတဲ့ ပစ္စည်းတွေကို ခိုးယူသွားကြတယ်လို့ ဆိုပါတယ်။

ဖလမ်းမြို့နယ် တားလ်ကျေးရွာမှာ အိမ်ခြေ ၃၇ လုံးရှိပြီးတော့ အကြမ်းဖက်စစ်တပ်က ပထမအကြိမ် နေအိမ် ၃ လုံးနဲ့ အခုဒုတိယအကြိမ် လူနေအိမ် ၈ လုံးထပ်မံမီးရှို့ ဖျက်ဆီးခဲ့တာလို့ ဆိုပါတယ်။

ဖလမ်းမြို့နယ် ရေဇွာမြို့မှာလည်း အောက်တိုဘာ ၂၃ ရက်နေ့မှာ အကြမ်းဖက်စစ်တပ်က လက်နက်ကြီးတွေနဲ့ ပစ်ခတ်တာကြောင့် နေအိမ် ၃ လုံး မီးလောင်ကာ ၂ လုံး ပြာကျခဲ့ရတယ်လို့ ဒေသခံတွေဆီကနေသိရပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up