တောင်ပိုင်းတိုင်းစစ်ဌာနချုပ် စစ်ကြောရေးတွင် တောင်ငူမြို့က ဖမ်းဆီးခံ လူငယ် ၁ ဦး သေဆုံး

တောင်ပိုင်းတိုင်းစစ်ဌာနချုပ် ဖမ်းဆီးထိန်းသိမ်းခံထားရတဲ့ တောင်ငူမြို့က လူငယ် တဦး စစ်ကြောရေးမှာ စစ်တပ်က စစ်ဆေးစဉ် နှိပ်စက်ခံရပြီး သေဆုံးသွားတယ်လို့ သူနဲ့  ‌နီးစပ်သူတစ်ဦးက ဒီဗွီဘီကို ပြောပါတယ်။ 

အောက်တိုဘာ ၁၈ ရက်၊ မနက် ၁၁ နာရီလောက်က  တောင်ငူမြို့နယ်၊ (၂၂)ရပ်ကွက်၊ ခပေါင်းရွာဦး၊ (၂) လမ်းနဲ့ (၃)လမ်းအကြား ပေါက်ကွဲမှုဖြစ်စဉ်နဲ့ပတ်သက်ပြီး ဒေသခံလူငယ် ကိုရစ်ချက်စိုးနဲ့ ကိုဝေဖြိုးသူတို့နှစ်ဦးကို စစ်ကောင်စီက ဖမ်းဆီးခဲ့တာဖြစ်ပါတယ်။

အဖမ်းခံခဲ့ရပြီနောက် ကိုဝေဖြိုးသူဟာ ဒဏ်ရာကြောင့်ဆေးရုံတက်ခဲ့ရပြီး  အောက်တိုဘာ ၂၁ ရက်  ညနေ ၄ နာရီခွဲလောက်မှာ စစ်ကြောရေးမှာ ကျဆုံးခဲ့တာဖြစ်ပြီး အလောင်းပြန်မရသေးဘူးလို့ သူနဲ့ ရင်းနှီးတဲ့ မိတ်ဆွေ တစ်ဦးက ပြောပါတယ်။

ကိုဝေဖြိုးသူဟာ တောင်ငူမြို့ စစ်အာဏာရှင်ဆန့်ကျင့်ရေး ဆန္ဒပြလှုပ်ရှားမှု‌မှာ တက်ကြွစွာပါဝင်လှုပ်ရှားခဲ့သူဖြစ်ပြီး တိုင်းပြည်အတွက် အသက်စွန့် ရဲဝံ့စွာ  အာဏာရှင်စနစ်ကိုဆန့်ကျင်ခဲ့သူဖြစ်လို့ အင်မတန်ဝမ်းနည်းကြေကွဲမိတယ်လို့လည်း ပြောပါတယ်။

ကိုဝေဖြိုးသူ စစ်ကြောရေးမှာ သေဆုံးသွားတာနဲ့ ပတ်သက်ပြီး မိသားစုကို စစ်ကောင်စီက အကြောင်းကြားခြင်း ရှိမရှိ မသိရသေးပါဘူး။ 

ဒါ့အပြင် အောက်တိုဘာလ ၁၉ ရက်နေ့ မနက်ပိုင်းကလည်း တောင်ငူမြို့မှာ တက္ကသိုလ်ကျောင်းသားတစ်ယောက်အပါအဝင် အပြစ်မဲ့လူငယ် ၃ ယောက် အဖမ်းခံခဲ့ရပါတယ်။

အသက် ၂၀ အရွယ် တောင်ငူတက္ကသိုလ်ကျောင်းသား ကိုမင်းသော်ကို တောင်ငူလေတပ်စစ်ကြောရေးစခန်းမှာ စစ်ဆေးနေတယ်လို့ သိရပါတယ်။

အောက်တိုဘာလ ၂၁ ရက် ည ၁၂ နာရီဝန်းကျင်ကလည်း တောင်ငူမြို့ ၂၀ ရပ်ကွက် နတ်သျှင်နောင်လမ်း က ကရင်တိုင်းရင်းသားညီအကို ၃ ယောက်ကို စစ်ကောင်စီတပ်က ထိုးကြိတ် ရိုက်နှက်ပြီး ဖမ်းဆီးသွားတယ်လို့ ဒေသခံတွေဆီက သိရပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up