မန္တလေးမြို့ရှိ ချမ်းမြသာစည်မြို့နယ် တရားရုံးနဲ့ မန္တလေးခရိုင် တရားရုံးတို့ အပြင်ဘက်မှာ အောက်တိုဘာလ ၂၀ ရက် မနက်ပိုင်းက ဗုံးပေါက်ကွဲမှုဖြစ်ပွားခဲ့ပါတယ်။

ချမ်းအေးသာစံမြို့နယ် ၆၅ လမ်း၊ ၃၃ လမ်းနဲ့ ၃၅ လမ်းကြားက မန္တလေးခရိုင်တရားရုံးရဲ့ အပြင်မှာ ဗုံးပေါက်ကွဲခဲ့တာဖြစ်ပြီး ထိခိုက်ဒဏ်ရာရတာမရှိဘူးလို့ သိရပါတယ်။

ဒါ့အပြင် ချမ်းမြသာစည်တရားရုံးမှာလည်း ရုံးအပြင်ဘက်မှာ ပေါက်ကွဲတာဖြစ်ပြီး ရုံးပိတ်ရက်ဖြစ်တဲ့အတွက် လူအထိအခိုက်မရှိဘူးလို့ အနီးပတ်ဝန်းကျင်ရှိ ပြည်သူတချို့က ဆိုပါတယ်။

မန္တလေးမြို့မှာ အောက်တိုဘာ ၁၈ ရက်နေ့ကလည်း ချမ်းမြသာစည်မြို့နယ်အခွန်ရုံး၊ မဟာအောင်မြေမြို့နယ်အခွန်ရုံး နဲ့ ချမ်းအေးသာစံမြို့နယ်အခွန်ရုံးတွေမှာ ဗုံးပေါက်ကွဲမှုတွေ ဖြစ်ပွားခဲ့ပါတယ်။