ဘန်ကောက်လူဦးရေ ၇၀ ရာခိုင်နှုန်းကျော် ကိုဗစ်-၁၉ ကာကွယ်ဆေးထိုးပြီး

ထိုင်းနိုင်ငံမြို့တော်ဘန်ကောက်လူဦးရေရဲ့ ၇၀ ရာခိုင်နှုန်းကျော်ဖြစ်တဲ့ လူပေါင်း ၅ ဒသမ ၄၃ သန်းဟာ ကိုဗစ်-၁၉ ကာကွယ်ဆေး ၂ ကြိမ်အပြည့်ထိုးပြီးဖြစ်တယ်လို့ သိရပါတယ်။

ဘန်ကောက်ဒုမြို့တော်ဝန် ဆိုဖွန် ဖီဆူသီဝေါင်က မြို့တော်အနေနဲ့ လာမယ့်လထဲ အစိုးရရဲ့ မူဝါဒနဲ့အညီ ကာကွယ်ဆေးအပြည့်အဝ ထိုးပြီးသူ ခရီးသွားတွေကို လက်ခံခွင့်ပြုဖွင့်လှစ်ဖို့ အဆင်သင့်ဖြစ်နေပြီလို့ ပြောပါတယ်။

ပြီးခဲ့တဲ့ ၂၄ နာရီအတွင်း ဘန်ကောက်မှာ ကိုဗစ်-၁၉ ရောဂါကူးစက်မှုအသစ် ၁,၀၃၇ ယောက်နဲ့ သေဆုံးသူ ၁၀ ယောက်ထက်မနည်းရှိခဲ့ပြီး ကူးစက်ခံရသူတွေထဲက ၈၀၀ ကျော်ဟာ မြို့တော်မှာနေထိုင်သူတွေဖြစ်ကာ ကျန်တဲ့ ၂၀၀ ကျော်ကတော့ တခြားခရိုင်တွေက လာရောက်နေထိုင်သူတွေဖြစ်တယ်လို့ ဆိုပါတယ်။

ကာကွယ်ဆေး ထိုးရာမှာ ပြီးခဲ့တဲ့ အောက်တိုဘာ ၁၈ ရက်နေ့အထိ ဘန်ကောက်မှာ အနည်းဆုံး ၁ ကြိမ်ကာကွယ်ဆေး ထိုးပြီးသူ စုစုပေါင်း ၈ ဒသမ ၁၃ သန်း ရှိနေတယ် လို့ ဆိုပါတယ်။

လတ်တလောမှာတော့ ကာကွယ်ဆေး ၂ ကြိမ်အပြည့်ထိုးပြီးသူ  ၇၀ ဒသမ ၆၃ ရာခိုင် နှုန်းကျော်ရှိနေပြီး အခုလကုန်မှာ ဘန်ကောက်လူဦးရေရဲ့ ၈၀ ရာခိုင်နှုန်း ကာကွယ်ဆေး ၂ ကြိမ်ထိုးပြီးဖို့ ရည်မှန်းထားတယ်လို့ ဒုမြို့တော်ဝန်က ပြောပါတယ်။

ဘန်ကောက်မြို့တော် စီမံအုပ်ချုပ်ရေးအဖွဲ့ကတော့ အောက်တိုဘာ ၁၄ ရက်နဲ့ ၁၅ ရက် နေ့တွေမှာ ရှော့ပင်းမောလ်တွေက လုပ်ငန်း ၂၄၇ ခုကို စစ်ဆေးခဲ့ရာမှာ အဲဒီထဲက ၂၄၄ ခု က ကိုဗစ်-၁၉ စည်းမျဉ်းစည်းကမ်းတွေနဲ့အညီ လိုက်နာကြတာ တွေ့ရှိကြရတယ်လို့ ပြောပါတယ်။

ထိုင်းနိုင်ငံတဝန်းမှာတော့ လက်ရှိအချိန်ထိ ကိုဗစ်-၁၉ ရောဂါကူးစက်ခံရသူပေါင်း ၁ ဒသမ ၈ သန်းကျော်၊ သေဆုံးသူ ၁၈,၀၀၀ ကျော်နဲ့ အာဆီယံဒေသတွင်း ကူးစက်မှုအမြင့် ဆုံး ထိပ်တန်း ၅ နိုင်ငံထဲမှာ ပါဝင်နေပါတယ်။

More News
Up