တွံတေးတွင် ကျေးရွာအုပ်ချုပ်ရေးမှူး ၁ ဦး ပစ်သတ်ခံရ၊ ရွာသားအချို့ကို ဖမ်းဆီး

ရန်ကုန်တိုင်း၊ တွံတေးမြို့နယ်က စစ်ကောင်စီခန့် အုပ်ချုပ်ရေးမှူးတယောက် အောက်တိုဘာ ၁၈  ရက်နေ့ မနက်က သေနတ်နဲ့ ပစ်သတ်ခံလိုက်ရပါတယ်။

လာကပုံကျေးရွာအုပ်ချုပ်ရေးမှူး ဦးစိုးဝင်းကို ဒီမနက်မှာ ရှင်းလင်းခဲ့တယ်လို့ မြို့ပြ ပြောက်ကျား-တွံတေးအဖွဲ့က ပြောပါတယ်။

“မနက် ၈ နာရီလောက်က လက်ဖက်ရည်ဆိုင်ထိုင်နေတုန်း နောက်စေ့ကို ပစ်လိုက်တာ။ အဲဒီနေရာမှာ ပွဲချင်းပြီးပဲ။ ကျနော်တို့ထွက်လာပြီး တော်တော်ကြာမှာ စစ်သားတွေ ရောက်လာတယ်” လို့ ပြောက်ကျားအဖွဲ့ဝင်တယောက်က ပြောပါတယ်။

ဘုရားကြီးစံပြကျေးရွာမှာ ပစ်သတ်ခံရတာဖြစ်ပြီး အနီးဝန်းကျင်ရွာတွေမှာ တပ်စွဲထားတဲ့ စစ်သားတချို့ ရောက်လာပြီးနောက် လက်ဖက်ရည်ဆိုင်ပိုင်ရှင် လင်မယားနဲ့ နောက်ထပ် ရွာသား ၂ ယောက်ကို ဖမ်းဆီးထားတယ်လို့ သိရပါတယ်။

ဒေသခံတယောက်က “သူက အုပ်ချုပ်ရေးမှူးဖြစ်ပြီးတော့ သပိတ်တွေ မလုပ်ဖို့ တားတယ်။ မီတာခဆောင်ဖို့ ပြောတယ်။ ကျောင်းတွေ ပြန်ဖွင့်ဖို့လုပ်တယ်။ စစ်တပ်ရဲ့ဒလန်လုပ်နေတာ” လို့ ပြောပါတယ်။

အခုတော့ အလောင်းကို သယ်ယူသွားပြီဖြစ်ပြီး တွံတေးမြို့ပေါ်က စစ်သားတွေ ကား ၄ စီးနဲ့ အဲဒီရွာကို သွားနေတယ်လို့လည်း သိရပါတယ်။

တွံတေးပြောက်ကျားတပ်ဖွဲ့ဟာ လွန်ခဲ့တဲ့ရက်ပိုင်းကလည်း မြို့နယ်ထဲက မိုင်တဲ တာဝါတိုင် ၂ တိုင်ကို ဖောက်ခွဲခဲ့ပါသေးတယ်။

More News
Up