ကချင်ပြည်နယ်၊ မြစ်ကြီးနားမြို့၊ အောင်နန်းရိပ်သာရပ်ကွက်၊ ရွှေနှင်းဆီမုန့်တိုက်ဘေးလမ်းကြားမှာ အောက်တိုဘာ ၁၆ ရက်နေ့ ညနေ ၃ နာရီခွဲလောက်က ဓားထောက်ပြီး ဆိုင်ကယ်လုယက်မှု ဖြစ်ပွားခဲ့တယ်လို့ လုယက်ခံရသူနဲ့ နီးစပ်သူတစ်ဦးက ပြောပါတယ်။
“ဆိုင်ကယ်စီးလာတဲ့ ညီမလေးကို ကောင်လေး ၃ ယောက်က ဆိုင်ကယ်နှစ်စီးနဲ့ ကပ်လိုက်လာပြီး ညီမလေး ဆိုင်ကယ်ကို ခြေထောက်နဲ့ ကန်၊ ကချင်ဓားရှည်နဲ့ ထောက်ပြီး ဆိုင်ကယ်၊ ဖုန်းနဲ့ ပိုက်ဆံအိတ် လုယူသွားပါတယ်။ မြစ်ကြီးနား မူးယစ်ဆေးသမားတွေ နေ့ခင်းကြောင်တောင် အချိန်တောင် အရမ်းသောင်းကျန်းနေပါပြီ။”
မြစ်ကြီးနားမြို့မှာ အလားတူ ဓားထောက် လုယက်မှုတွေ မကြာခဏ ဖြစ်ပေါ်နေတဲ့အတွက် မြို့ခံပြည်သူတွေ စိုးရိမ်ကြောင့်ကြစွာနဲ့ သွားလာနေရတယ်လို့ သိရပါတယ်။