မိုးမောက်တွင် စစ်ကောင်စီယာဉ်တန်း မိုင်းဆွဲခံရသဖြင့် ၅ ဦးသေဆုံး၊ အများအပြား ဒဏ်ရာရ

ကချင်ပြည်နယ် မိုးမောက်မြို့အဝင် အလင်းကောင်ကွက်သစ်ရှိ တံတားအနီးမှာ အောက်တိုဘာ ၁၂ ရက်နေ့ညနေ ၄ နာရီ မိနစ် ၂၀ လောက်မှာ စစ်ကောင်စီယာဉ်တန်းကို KIA အဖွဲ့က မိုင်းဆွဲတိုက်ခိုက်ခဲ့ပြီး ၅ ဦး သေဆုံး၊ အများအပြား ဒဏ်ရာရတယ်လို့ သိရပါတယ်။

စိန်လုံဘက်က ဆင်းလာတဲ့ စစ်ကောင်စီတပ်ဖွဲ့ဝင်တွေ အပြည့်တင်ဆောင်လာတဲ့ ယာဉ်တန်း ၇ စီးလောက် မိုင်းဆွဲတိုက်ခိုက်ခံရတာလို့ ဒေသခံတဦးက ပြောပါတယ်။

“အသံတွေအကျယ်ကြီးပဲ၊ ဆက်တိုက်ပေါက်ကွဲတယ်၊ အကြမ်းဖက်စစ်ကောင်စီဝင်တွေ တော်တော်ထိသွားတာဟုတ်တယ်။ ပြီးတော့ ရမ်းသန်းပစ်ခတ်သွားတယ်၊ ကမ္ဘာပျက်နေတဲ့အတိုင်းပဲ။ ရပ်ကွက်နဲ့နီးတော့ ပြေးလွှားရှောင်ပုန်းကြရတယ်” လို့ ပြောပါတယ်။

အဆိုပါဆွဲမိုင်းတိုက်ခိုက်ခံရမှုကြောင့် စစ်ကောင်စီတပ်ဖွဲ့ဝင် ၅ ဦး သေဆုံးပြီး အများအပြား ပြင်းထန်ဒဏ်ရာရရှိခဲ့တယ်လို့ ကချင်ပြည်သူ့လွတ်မြောက်ရေးတပ်မတော် KIA ဆီက သိရပါတယ်။ ဒီဗွီဘီကတော့ သေဆုံးဒဏ်ရာရမှုအခြေအနေနဲ့ ပတ်သက်ပြီး သီးခြား အတည်မပြုနိုင်သေးပါဘူး။

အဆိုပါစစ်ယာဉ်တန်းဟာ စိန်လုံတောင်တန်းဘက်ကို မနက်ပိုင်းကတက်သွားခဲ့တာဖြစ်ပြီး အချိန်းအပြောင်းလုပ်တာ ဖြစ်နိုင်ကြောင်း ဒေသခံက ဆိုပါတယ်။

မိုးမောက်မြို့ရှိ လမ်းဆုံးကျောက်တိုင်မှာလည်း ပြီးခဲ့တဲ့ စက်တင်ဘာ ၂၇ ရက်နေ့က မိုင်းပေါက်ကွဲခဲ့ပြီး စစ်ကောင်စီဝင် ၃ ဦး ပြင်းထန်ဒဏ်ရာရရှိခဲ့တယ်လို့ သိရပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up