စစ်ကိုင်းဒေသကြီး၊ ဘုတလင်မြို့နယ်၊ ဘုတလင်မြို့နဲ့ ကံသာကျေးရွာကြားမှာ ပြီးခဲ့တဲ့ စက်တင်ဘာ ၅ ရက်နေ့ည ၁၀ နာရီလောက်က စစ်ကောင်စီတပ်တွေနဲ့ ဒေသခံ ပြည်သူကာကွယ်ရေး ပြောက်ကျားအဖွဲ့တို့ နှစ်ဖက်ပစ်ခတ်တာတွေ ရှိခဲ့တယ်လို့ ဒေသခံတွေ ဆီကနေ သိရပါတယ်။
“တိုက်ပွဲဖြစ်တာတော့ ဟုတ်တယ်ဗျ။ မနေ့ စက်တင်ဘာ ၅ ရက်နေ့က ကံသာကျေးရွာက လူငယ် ၃ ဦးကို ကံသာကျေးရွာ ဓားလှန်က စစ်ကောင်စီဘက်ကိုတိုင်ပြီး အဖမ်းခိုင်းတာ။ အဲတာစစ်ကောင်စီက လာဖမ်းသွားတယ်။ ကျနော်တို့ စစ်ကောင်စီကို တိုင်တဲ့ ဓားလှန်အိမ်ကို သွားရောက်ရှင်းလင်းတဲ့အခါ စစ်ကောင်စီကို ဖုန်းဆက်ပြီးခေါ်တာကြောင့် ကျနော်တို့အဖွဲ့နဲ့ ထိပ်တိုက်တွေပြီး တိုက်ပွဲဖြစ်ပွားခဲတယ်။ အကျဆုံးကတော့ ညအချိန်ဖြစ်တာကြောင့် မသိရဘူး။ ကျနော်တို့ဘက်ကတော့ အကျဆုံးမရှိဘူး။ အရပ်သားတစ်ယောက်တော့ စစ်ကောင်စီကပစ်လို့ အပြင်းထန်ဒဏ်ရာရတာတော့ ရှိတယ်။ ဝမ်းဗိုက်တချက်၊ ပေါင်တစ်ချက် ဒဏ်ရာရထားတယ်။ အဲဒဏ်ရာရတဲ့သူကိုတော့ ကျနော်တို့ပြည်သူကာကွယ်ရေးတပ်ဖွဲ့က ကယ်ထုတ်နိုင်ခဲ့တယ်။ အရက်သောက်ပြီးရွာအပြန် နှစ်ဖက်တိုက်ပွဲထဲ ရောက်သွားတာထင်တယ်။ လူကမူးနေတာ” လို့ ပြည်သူကာကွယ်ရေးအဖွဲ့ခေါင်းဆောင်က DVB ကို အတည်ပြုပြောဆိုပါတယ်။
ကံသာကျေးရွာဟာ ဘုတင်မြို့ရဲ့ အရှေ့တောင်ဘက် ၃ မိုင်ကွာဝေးပြီး အိမ်ခြေ ၂၅၀ ရှိတဲ့ ကျေးရွာတစ်ရွာလည်းဖြစ်ပါတယ်။ လက်ရှိ အဖမ်းခံထားရတဲ့ ကလေးသုံးဦးကတော့ မောင်ဇော်ဦး၊ မောင်ဇော်ဇော်၊ မောင်မင်းထက် တို့ ဖြစ်ပါတယ်။
သူတို့ ၃ ဦးကို ဘုတလင်မြို့မရဲစခန်းမှာ ထိန်းသိမ်းထားတယ်လို့ ဒေသခံတွေရဲ့ ပြောပြချက်အရ သိရပါတယ်။