မြန်မာတွင် မျိုးရိုးဗီဇကွဲ ကိုဗစ်-၁၉ ရောဂါပိုး ကူးစက်ခံရသူ ၁၅ ဦးတွေ့ရှိ

Photo : Ministry of Health and Sports

သြဂုတ် ၂၈ ရက် ဓာတ်ခွဲစစ်ဆေးချက်အရ မြန်မာနိုင်ငံမှာ မျိုးရိုးဗီဇကွဲ ကိုဗစ်-၁၉ ရောဂါပိုး ကူးစက်ခံရသူ ၁၅ ဦး တွေ့ရှိကြောင်း စက်တင်ဘာ ၁ ရက်ညပိုင်းမှာ စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ထားပါတယ်။

မျိုးရိုးဗီဇကွဲ နေပြည်တော်မှ ၅ ဦး၊ ရန်ကုန်မှ ၂ ဦး၊ မန္တလေးမှ ၂ ဦး၊ စစ်တွေ၊ တောင်ငူ၊ လားရှိုး၊ မော်လမြိုင်၊ မုံရွာနှင့် ကလေးမြို့များမှ ၁ ဦးစီ စုစုပေါင်း ၁၅ ဦးမှာ မျိုးရိုးဗီဇကွဲရောဂါပိုး တွေ့ရှိခဲ့တယ်လို့ ဆိုပါတယ်။

မျိုးရိုးဗီဇကွဲ ကိုဗစ်-၁၉ ရောဂါပိုးဟာ အထူးဂရုစိုက်ရမယ့် မျိုးရိုးဗီဇကွဲ ကိုဗစ်-၁၉ (Variants of Concern) Delta မျိုးစိတ် ဖြစ်ကြောင်း၊ မျိုးရိုးဗီဇကွဲ ကိုဗစ်-၁၉ ရောဂါ ပိုးစောင့်ကြပ်ကြည့်ရှုတာကို ကာကွယ်ရေးဝန်ကြီးဌာန ဆေးသုတေသနတပ်နဲ့ ပူးပေါင်းလုပ်နေတယ်လို့ ထုတ်ပြန်ချက်မှာ ဖော်ပြထားပါတယ်။

မျိုးရိုးဗီဇကွဲ ကိုဗစ်-၁၉ ရောဂါပိုးကို အိန္ဒိယနိုင်ငံမှာ စတင်တွေ့ရှိခဲ့တာဖြစ်ပြီး နိုင်ငံပေါင်း ၁၆၃ နိုင်ငံမှာ ပျံ့နှံ့နေပြီး ရောဂါပိုးကူးစက်နိုင်မှုနဲ့ ရောဂါပြင်းထန်မှု မြင့်မားတာကြောင့် သေဆုံးနိုင်ချေ မြင့်တက်လာနိုင်ကြောင်း၊ ကိုဗစ်-၁၉ ကာကွယ်ဆေးအချို့ရဲ့ အကျိုးအာနိသင်ကိုလည်း အနည်းငယ် လျော့ကျစေနိုင်တယ်လို့ ကမ္ဘာ့ကျန်းမာရေးအဖွဲ့ရဲ့ ထုတ်ပြန်ချက်အရ သိရပါတယ်။

ဒါကြောင့် ကိုဗစ်-၁၉ ရောဂါကူးစက်မှု မရှိစေရေးအတွက် ကျန်းမာရေးစည်းကမ်းချက်တွေနဲ့အညီ အထူးဂရုပြုနေထိုင်ကြဖို့လည်း တိုက်တွန်းထားပါတယ်။

မြန်မာနိုင်ငံမှာ ကိုဗစ်-၁၉ ရောဂါကူးစက်ခံရသူပေါင်း ၄ သိန်းကျော်နဲ့ သေဆုံးသူ စုစုပေါင်း ၁၅,၄၉၀ ယောက်ရှိပြီလို့ စစ်ကောင်စီကျန်းမာရေးဝန်ကြီးဌာနက စက်တင်ဘာ ၁ ရက်ညပိုင်းမှာ ထုတ်ပြန်ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up