ရန်ကုန်တိုင်းဒေသကြီး လှိုင်သာယာမြို့နယ်အတွင်းမှာရှိတဲ့ အဆင့်မြင့်အိမ်ရာတွေမှာ နေထိုင်သူတွေကို ဧည့်စာရင်း မတိုင်ပါက အရေးယူမယ်လို့ စစ်ကောင်စီက ညွှန်ကြား လိုက်ပါတယ်။

ပဒေသာပင်မြို့တော် (FMI City) အပါအဝင် တခြားအဆင့်မြင့် အိမ်ရာတွေမှာ နေထိုင်သူ တွေကို အိမ်ထောင်စုစာရင်း ပုံစံ (၆၆/၆) ကိုင်ဆောင်ထားသူမှအပ အိမ်ငှားတွေ၊ ဆောက်လုပ်ရေး လုပ်ငန်းတွေမှာထားရှိတဲ့ အလုပ်သမားတွေနဲ့ အစောင့်တွေ ဧည့်စာရင်း မတိုင်ကြားပါက ဥပဒေ အရ အရေးယူမယ်လို့ စစ်ကောင်စီက သြဂုတ် ၃၀ ရက်နေ့က အိမ်ယာကော်မတီကို ညွှန်ကြား ထား​တာပါ။

ညွှန်ကြားချက်မှာ အဆင်မြင့်အိမ်ရာတွေဖြစ်တဲ့ ပန်းလှိုင်အိမ်ယာ၊ FMI City၊ နဝဒေး အိမ်ရာ၊ ထီးလှိုင်ရှင်အိမ်ရာ၊ အောင်ဇေယျအိမ်ရာအပါအဝင် တစ်ခြား အဆင့်မြင့် အိမ်ရာတွေလည်း ပါဝင်​တယ်လို့ ဆိုပါတယ်။

စစ်ကောင်စီက  ဩဂုတ်လ ၂၈ ရက်နေ့ကထုတ်ပြန်တဲ့ အထူးကြပ်မတ်စစ်ဆေးမယ့် မြို့နယ် ၄၉ မြို့နယ်မှ ရန်ကုန်တိုင်း ၃ မြို့နယ်မှာ လှိုင်သာယာမြို့နယ်ပါဝင်လာခဲ့ပြီးတဲ့နောက် ဧည့်စာရင်း စစ်ဆေးတာကစပြီး  ဖိအားပေးလာတာလို့ မြို့ခံတွေက ပြောပါတယ်။