ကရင်ပြည်နယ်၊ မြဝတီမြို့မှာ သတ်မှတ်ချိန်လွန် အပြင်ထွက်သူတွေကို ဒဏ်ကြေး ၅၀၀၀ ကျပ် မရိုက်တော့ဘဲ ကိုဗစ်ရောဂါပိုး ရှိ၊မရှိ စစ်ဆေးတာတွေကို သြဂုတ် ၃၀ ရက်က စတင်ဆောင်ရွက်နေပါတယ်။
ဒီနေ့ မွန်းတည့် ၁၂ နာရီနောက်ပိုင်း အပြင်ထွက်သူအားလုံးကို မြဝတီမြို့ အမှတ်(၄)ရပ်ကွက် ဘုရင့်နောင်စျေးအရှေ့ဘက်မှာ ခရိုင်ကိုဗစ်ကာကွယ်တားဆီးရေးကော်မတီက ဦးဆောင်ပြီး အခမဲ့ ကိုဗစ်ပိုး ရှိမ/ရှိ စစ်ဆေးပေးနေတာဖြစ်ပါတယ်။
မြန်မာ-ထိုင်းနယ်စပ် မြဝတီမြို့မှာ ရှောင်တခင် စစ်ဆေးမှုကြောင့် အိမ်အပြင်ထွက်ချိန်ကျော်သူ ၂၆၉ ဦးကို နှာခေါင်းတို့ဖတ်ယူ စစ်ဆေးရာမှာ အမျိုးသမီး တစ်ဦး ကိုဗစ်-၁၉ တွေ့ရှိခဲ့တာကြောင့် ကိုဗစ်ကျန်းမာရေးစောင့်ကြည့်(စင်တာ)မှာ ပို့ဆောင်ကုသသွားမယ်လို့ သိရပါတယ်။
မြဝတီမြို့တွင်းမှာ အိမ်အပြင်ထွက်စျေးဝယ်ချိန်ကို မနက် ၆ နာရီမှ ၉ နာရီအထိ ထွက်ခွင့်ရှိခဲ့ပြီး သြဂုတ် ၂၈ ရက်က စတင်ကာ မနက် ၆ နာရီမှ နေ့လယ် ၁၂ နာရီအထိ စျေးဝယ်တာနဲ့ ကိစ္စအဝဝအတွက် ထွက်ခွင့်ပြုခဲ့ပေမဲ့ ၁၂ နာရီနောက်ပိုင်း ထွက်သူတွေကို ကိုဗစ်ကာလ ဒေသန္တရအမိန့်အရ အရေးယူတော့မှာ ဖြစ်တယ်လို့ သိရပါတယ်။
