ဧရာဝတီတိုင်း၊ ပုသိမ်မြို့နယ်မှာ ဩဂုတ် ၁၄ ရက်က ကိုဗစ်-၁၉ ရောဂါနဲ့ သေဆုံးသူ ၁၂ ဦးရှိခဲ့တယ်လို့ မနောဖြူလူမှုကူညီရေးအဖွဲ့က သိရပါတယ်။
မနေ့က ကိုဗစ်ရောဂါနဲ့ သေဆုံးသူ ၁၂ ဦးထဲမှာ နေအိမ်မှာ သေဆုံးသူက ၉ ဦးရှိပြီး ပုသိမ်ဆေးရုံမှာ သေဆုံးသူ ၃ ဦးရှိပါတယ်။ ဒါ့အပြင် ကိုဗစ်-၁၉ ပိုးတွေ့လူနာသစ် ၆ ဦးရှိပြီး ပုသိမ်က ၃ ဦးနဲ့ ချောင်းသာက ၃ ဦး တွေ့ရှိခဲ့တာ ဖြစ်ပါတယ်။
“အခုက ပြန်ကျလာတယ်၊ အရင်လ သေတာ အရမ်းများတယ်။ ကျတယ်ဆိုလည်း အခုထိ သေတာရှိနေတယ်။ ဒုတိယလှိုင်းတုန်းက ပြည်သူတွေ ဆေးရုံသွားကြတယ်။ ပိုးတွေ့ထိစပ်ဆို စင်တာတွေပို့တော့ ထိန်းနိုင်တာ။ အခက်အခဲက အရင်လ အောက်ဆီဂျင် ရှာရမလွယ်တာ။ အခုတော့ အောက်ဆီဂျင်စက်ရှိပြီ” လို့ ပုသိမ်ဒေသခံတစ်ဦးက ပြောပါတယ်။
ပုသိမ်မြို့မှာ ဇူလိုင်လပထမပတ်၊ ဒုတိယပတ်နဲ့ တတိယပတ်တို့မှာ ပိုးတွေ့လူနာ များပြားလာကာ သေဆုံးတာလည်း စံချိန်တင်ခဲ့တယ်လို့ ပုသိမ်မြို့နယ်စစ်ကောင်စီရဲ့ ထုတ်ပြန်ချက်အရ သိရပါတယ်။
သြဂုတ် ၁၄ ရက်အထိ ပုသိမ်မြို့နယ်မှာ ပိုးတွေ့လူနာ ၁၇၀၁ ဦး ရှိခဲ့ပြီး ဇူလိုင် ၁ ရက်မှ သြဂုတ် ၁၄ ရက်အထိ ကိုဗစ်-၁၉ နဲ့ သရောင်ချောင်းသုသာန်မှာ သင်္ဂြိုဟ်ရသူ ၁၀၃၆ ဦး ရှိတယ်လို့ သိရပါတယ်။
ပုသိမ်မြို့အုပ်ချုပ်ရေးအဖွဲ့အစည်းတွေအနေနဲ့ ကုသရေးစင်တာ ၈ ခု၊ positive စင်တာ ၁၄ ခု နဲ့ Q စင်တာ ၁ ခု၊ စုစုပေါင်းစင်တာ ၂၃ ခု ဖွင့်လှစ်ကာ လူနာခုတင် ၁၃၈၁ လုံးအထိ ထားရှိ ကုသနေတယ်လို့ မြို့နယ်အုပ်ချုပ်ရေးအဖွဲ့က ထုတ်ပြန်ပါတယ်။