အာဆီယံဒေသတွင်း နိုင်ငံတွေထဲ ကိုဗစ်-၁၉ ရောဂါကူးစက်ခံရသူပေါင်း ၈ သန်းကျော် ရှိလာခဲ့ပြီဖြစ်ကာ အဲဒီထဲက ၅ သန်းကျော်က အင်ဒိုနီးရှားနဲ့ ဖိလစ်ပိုင်နိုင်ငံတွေက ဖြစ်ပါတယ်။

ပြီးခဲ့တဲ့ ၂၄ နာရီအတွင်း ရောဂါကူးစက်ခံရသူအသစ်ကတော့ ၈၀,၀၀၀ ကျော်နဲ့ သေဆုံးသူ ၂၄၆၃ ယောက် ရှိနေခဲ့ပြီး အရင်ရက်ကထက် နည်းလာခဲ့တာကို တွေ့ရပါတယ်။

လက်ရှိအချိန်ထိ အာဆီယံဒေသတွင်း နိုင်ငံတွေထဲ ကိုဗစ်-၁၉ ရောဂါကူးစက်ခံရပြီး သေဆုံးသူ စုစုပေါင်းကတော့ ၁ သိန်း ၇ သောင်းကျော် ရှိနေခဲ့ပြီ ဖြစ်ပါတယ်။

ဒေသတွင်း ရောဂါကူးစက်မှု သန်းချီအမြင့်ဆုံးနိုင်ငံတွေအဖြစ် အင်ဒိုနီးရှားနိုင်ငံက ကူးစက်ခံရသူပေါင်း ၃ ဒသမ ၆ သန်းကျော်၊ သေဆုံးသူပေါင်း ၁ သိန်းကျော်၊ ဖိလစ်ပိုင်နိုင်ငံက ကူးစက်ခံရသူပေါင်း ၁ ဒသမ ၆ သန်းကျော်၊ သေဆုံးသူပေါင်း ၂၉,၀၀၀ ကျော်၊ မလေးရှားနိုင်ငံက ကူးစက်ခံရသူပေါင်း ၁ ဒသမ ၂သန်းကျော်၊ သေဆုံးသူပေါင်း ၁ သောင်း ကျော်စီနဲ့ အသီးသီး ရပ်တည်နေတာပါ။

ရောဂါကူးစက်မှုတွေ မြင့်တက်နေတဲ့ မြန်မာနိုင်ငံကတော့ ကိုဗစ်-၁၉ ရောဂါကြောင့် သေဆုံးသူ စုစုပေါင်း ၁၂,၀၀၀ ကျော်နဲ့ အာဆီယံဒေသတွင်း သေဆုံးမှုအမြင့်ဆုံး ၃ နိုင်ငံစာရင်းမှာ ပါဝင်လာခဲ့ပြီး ရောဂါကူးစက်ခံရသူပေါင်း ၃ သိန်း ၃ သောင်းကျော် ရှိနေခဲ့ပြီ ဖြစ်ပါတယ်။

မြန်မာ့ အိမ်နီးချင်း ထိုင်းနိုင်ငံမှာတော့ ကိုဗစ်-၁၉ ရောဂါကူးစက်ခံရသူပေါင်း ၇ သိန်း ၆ သောင်းကျော်နဲ့ သေဆုံးသူ ၆,၀၀၀ ကျော် ရှိနေတာပါ။       ကမ္ဘာတဝန်းမှာတော့ ကိုဗစ်-၁၉ ရောဂါကူးစက်ခံရသူပေါင်း ၂၀၄ ဒသမ ၂ သန်းကျော်၊ သေဆုံးသူပေါင်း ၄ ဒသမ ၃ သန်းကျော်၊ ရောဂါပြန်လည်ပျောက်ကင်းသက်သာလာသူပေါင်း ၁၈၃ ဒသမ ၄ သန်းကျော် ရှိနေခဲ့ပြီ ဖြစ်ပါတယ်။