ဒီပဲယင်း ကျေးရွာအချို့တွင် စစ်ကောင်စီတပ်က မီးရှို့ဖျက်ဆီးမှုများပြုလုပ်ပြီး ရွာသားအချို့ကို ဖမ်းဆီး

စစ်ကိုင်းတိုင်း၊ ဒီပဲယင်းမြို့နယ်၊ နများရွာနဲ့မရကန်ရွာ နှစ်ရွာလုံးကို စစ်ကောင်စီတပ်က ဩဂုတ် ၉ ရက် မနက်ပိုင်းမှာ တပြိုင်တည်း ဝင်ရောက်မီးရှို့ဖျက်ဆီးခဲ့ပြီး ဒေသခံတွေကိုလည်း ဖမ်းဆီးစစ်ဆေးခဲ့တယ်လို့ သိရပါတယ်။

ဒေသခံတဦးက “မနေ့က ဒီပဲယင်း-ညောင်လှလမ်းအတိုင်း ခြေလျင်တက်လာတဲ့ စစ်တပ်က ညောင်လှ၊ ဝဲကြီး၊ မူးခတွင်း ရွာတွေကို ဝင်မွှေတယ်။ ရွာသားတွေကိုလည်း ဖမ်းတယ်။ အခုမနက်က နှစ်ဖွဲ့ခွဲပြီး နများရွာ နဲ့ မရကန်ရွာကို တပြိုင်တည်း ဝင်မွှေကြတာ၊ မရကန်ရွာထဲမှာ မီးရှို့တာတွေလည်း လုပ်နေတယ်။ ဒေသခံတွေကတော့ လုပ်လက်စလယ်ယာလုပ်ငန်းတွေပစ်ပြီး ပြေးကြရတာပေါ့။ ပျက်စီးဆုံးရှုံးမှု အတိအကျမသိနိုင်သေးဘူး” လို့ ပြောပါတယ်။

ဩဂုတ် ၇ ရက် ညပိုင်းကြည်ရွာအနီးမှာ စစ်ကားနှစ်စီး မိုင်းခွဲတိုက်ခိုက်ခံရပြီးနောက်ပိုင်း စစ်ကောင်စီတပ်တွေက ကျေးရွာတွေထဲ ပစ်ခတ်တာ၊ မီးရှို့ဖျက်ဆီးတာနဲ့ ဖမ်းဆီးစစ်ဆေးတာတွေ လုပ်နေတာလို့ ဒေသခံတွေက ပြောပါတယ်။

ဩဂုတ် ၈ ရက်နေ့ကလည်း ညောင်လှ၊ မူးခတွင်း၊ ဝဲကြီးကျေးရွာတွေကိုဝင်ပြီး ဒေသခံ ၁၀ ဦးကျော် ဖမ်းဆီးသွားတာလို့ သိရပြီး အခုမနက်ပိုင်းမှာလည်း နများရွာက ၁ ဦးနဲ့ မရကန်က ၂ ဖမ်းခံထားရတယ်လို့ ကနဦး သိထားရပါတယ်။

ဒီပဲယင်းမြို့နယ်အတွင်းမှာ ဇူလိုင်လဆန်းပိုင်းကလည်း စစ်ကောင်စီတပ်က အင်အားအလုံးအရင်းသုံးပြီး ပစ်ခတ်ခဲ့တာကြောင့် ဒေသခံ ၄၀ ကျော်သေဆုံးခဲ့ရပါတယ်။

မရကန်ရွာ မီးရှို့ခံရစဉ်

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up