စစ်ကိုင်းတိုင်း ယင်းမာပင်မြို့နယ်မှာ သြဂုတ် ၅ ရက်က အိမ်ထောင်စု ၄၈၀ ကို စားသောက်ကုန် ၃ မျိုးဖြစ်တဲ့ ဆန် ၁ ပြည်၊ ကြက်ဥ ၅ လုံး နဲ့ ကြက်သွန်နီ ၁ ပိဿာစီ လှူဒါန်းပေးခဲ့ပါတယ်။
လှူဒါန်းတဲ့အလှူရှင်ဟာ လက်ရှိမှာ ယင်းမာပင်မြို့မှာနေထိုင်တဲ့ ဦးကျော်ထူးလှိုင် ဖြစ်ပြီး သူ့ရဲ့ဇာတိက ရွာထောင်လေးရွာက ဖြစ်တယ်လို့ သိရပါတယ်။
"အရင်နေ့ကတော့ ၃ မျိုး ငွေ ၁၀၀ ကျပ်နဲ့ရောင်းချပေးမယ်လို့ ကြေညာခဲ့ပေမယ့် အခုက အခမဲ့ ပေးဝေခဲ့တာ။ ယင်းမာပင်မြို့ပေါ်မှာရှိတဲ့ အိမ်ထောင်စု ၃၃၀ နဲ့ အလှူရှင်ရဲ့ဇာတိရွာဖြစ်တဲ့ ရွာထောင်လေးရွာက အိမ်ထောင်စု ၁၅၀ တို့ကို ပေးဝေလှူဒါန်းခဲ့တာဖြစ်ပြီး စားဝတ်နေရေးအဆင်ပြေစေဖို့ တဖက်တလှမ်းကနေကူညီတဲ့အနေနဲ့ အခုလိုလုပ်ဆောင်ပေးခဲ့တာ” လို့ ဒေသခံတစ်ဦးက ပြောပါတယ်။