ဧရာဝတီတိုင်း၊ ငါးသိုင်းချောင်းမြို့မှာ ဇူလိုင်လ ၁၆ ရက် ညပိုင်းက အန်အယ်လ်ဒီပါတီရဲ့ ရပ်ကျေးအဆင့်တာဝန်ရှိသူ ဦးဝင်းဇော်အပါအဝင် အမျိုးသား ၄ ဦးကို စစ်အုပ်စုက နေအိမ်တွေမှာ လာရောက်ဖမ်းဆီးသွားပါတယ်။
မြို့သစ်ရပ်ကွက်နဲ့ အရှေ့တောင်ရပ်ကွက်က အန်အယ်လ်ဒီပါတီမှာ တာဝန်ယူခဲ့သူတွေနဲ့ ဒေသခံအမျိုးသားတွေကို ည ၇ နာရီခွဲလောက်မှာ စစ်အုပ်စုက အင်အား ၂၀ လောက်နဲ့ လာရောက်ဖမ်းဆီးသွားတာလို့ ဒေသခံတွေကပြောပါတယ်။
“ဘာမှ ယူချိန်မရလိုက်ဘူး၊ လာဖမ်းတော့ အင်အားအပြည့်နဲ့လာဝိုင်းတာ အကုန်လွတ်အောင်ထွက်ပြေးရတာ၊ ဘာလို့ဖမ်းတာလဲဆိုတာမသိရဘူး။ ဘာမှမပြောပဲဝင်လာတာ အိမ်ထဲမွှေနှောက်ရှာဖွေတာတွေလုပ်သွားတယ်”လို့ ဖမ်းဆီးခံရသူတို့နဲ့နီးစပ်တဲ့ မြို့ခံတစ်ဦးက ပြောပါတယ်။
နေအိမ်တွေမှာဝင်ရောက်ဖမ်းဆီးခံလိုက်ရတဲ့ ရပ်ကျေးအဆင့် အန်အယ်လ်ဒီ ပါတီရဲ့ တာဝန်ရှိသူတွေအပါဝင် အမျိုးသား ၄ ဦးကို ဘယ်ကိုဖမ်းဆီးခေါ်ဆောင်သွားတယ်ဆိုတာကိုတော့ မသိရသေးဘူးလို့ ဆိုပါတယ်။
ငါးသိုင်းချောင်းမြို့မှာ ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း စစ်အာဏာရှင်ဆန့်ကျင်ရေး လှုပ်ရှားမှုတွေကြောင့် ဖမ်းဆီးခံရတဲ့ နိုင်ငံရေးတက်ကြွလှုပ်ရှားသူ အယောက် ၅၀ ကျော်ထိရှိလာပြီလို့ သိရပါတယ်။
