ကျိုက်လတ်တွင် ဗုံး ၄ လုံးပေါက်ကွဲ၊ ပြည်သူ ၇၀ ကျော်ကို ဖမ်းဆီး

ကျိုက်လတ်မြို့မှာ ဇွန် ၂၉ ရက် မနေ့ညက ဗုံး ၄ လုံး ပေါက်ပြီးတဲ့နောက်ပိုင်း အကြမ်းဖက်စစ်ကောင်စီက ပြည်သူ ၇၀ ကျော်ကို ဖမ်းဆီးထားတယ်လို့ ဒေသခံတွေက ပြောပါတယ်။

“မနေ့ညက ကားနဲ့တခါထွက်ဖမ်းလိုက်၊ ရိပ်သာကိုပို့လိုက်နဲ့ ညဦးပိုင်းကတည်းက ဖမ်းနေတာ။ မနက် ၂ နာရီလောက်မှငြိမ်သွားတယ်။ ဒီနေ့တော့ မနက်ပိုင်းကတည်းက ဖမ်းနေတာ” လို့ ဒေသခံတယောက်က ပြောပါတယ်။

မနေ့ညပိုင်း ၁၁ နာရီလောက်က အထက ၁ ကျောင်းနားမှာ ဗုံး ၂ ကြိမ်ပေါက်ခဲ့ပြီး ပညာရေးမှူးရုံးနားမှာ ၁ ကြိမ်၊ မြို့အဝင်ဂိတ်နားမှာ ၁ ကြိမ်ပေါက်ကွဲခဲ့တာပါ။ ဒါကို ဒေသခံ PDF တွေက သူတို့လက်ချက်လို့ ကြေညာထားပြီး အသံဗုံးခွဲပြီး အကြမ်းဖက်စစ်တပ်ကို မျှားခေါ်ပြီးနောက် ဗုံးထပ်ခွဲခဲ့ပေမဲ့ မပေါက်ခဲ့တာလို့ ဆိုပါတယ်။

ဗုံးကွဲပြီးနောက် စစ်ကောင်စီက ခေါ်တာကို မလာလို့ဆိုပြီး ရေကြည်တော်ပရဟိတအသင်းဝင်တွေကိုလည်း ဖမ်းဆီးထားတယ်လို့ ဒေသခံတယောက်က ပြောပါတယ်။ ပြောပါတယ်။

“အမှတ် ၄ ရပ်ကွက်က သပိတ်စစ်ကြောင်းတုန်းက အမည်ထွက်တဲ့သူတွေလည်းပါတယ်။ အမှတ် ၁ ရပ်ကွက်ကလည်း ပါတယ်။ ကျောင်းဆရာနဲ့ လူငယ်တွေရော၊ အမှတ် ၅ ရပ်ကွက်ကရော၊ အခုဟာက တမြို့လုံးနီးပါးက ဒလန်လက်ညိုးထိုးတိုင်းဖမ်းသလိုဖြစ်နေတယ်။”

ဖမ်းဆီးသွားသူတွေကို အကြမ်းဖက်စစ်ကောင်စီတပ်တွေ တပ်စွဲထားတဲ့ ဧည့်ရိပ်သာမှာ စစ်ဆေးနေပြီး မိသားစုဝင်တွေကိုလည်း တွေ့ခွင့်မပေးဘူးလို့ ဒေသခံတွေက ပြောပါတယ်။

ဖမ်းခံရသူတွေဟာ ပေါက်ကွဲမှုတွေနဲ့ မပတ်သက်ဘူးလို့ ဒေသခံတွေက ပြောသလို အိမ်တွေမှာလာရှာတဲ့အချိန်မှာလည်း တုတ် ဓား လက်နက်တွေ တွေ့တာ မရှိဘူးလို့ ပြောပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up