ကချင်ပြည်နယ်၊ ဗန်းမော်မြို့မှာ ဇွန်လ ၂၂ ရက် ညပိုင်းက ဒေသခံလူငယ် အယောက် ၂၀ လောက်ကို PDF ပြည်သူ့ကာကွယ်ရေးတပ်ဖွဲ့တွေလို့ စွပ်စွဲပြီး စစ်တပ်က အကြမ်းဖက် ဖမ်းဆီးသွားပါတယ်။
မနေ့ည ၉ နာရီကျော်လောက်က ဗန်းမော် ခွန်သာရပ်ကွက်နဲ့ ညောင်ပင်ရပ်အပါအဝင် ရပ်ကွက်တချို့ကို ကြမ်းဖက်စစ်ကောင်စီရဲ့ လက်နက်ကိုင် စစ်တပ်နဲ့ ရဲတပ်ဖွဲ့ဝင်တွေက ဝင်ရောက် လာပြီး ပြည်သူတွေရဲ့ နေအိမ်ထဲ အတင်းဝင်ရောက်ကာ လူငယ် အယောက် ၂၀ နီးပါးကို အကြမ်းဖက် ဖမ်းဆီးသွားတယ်တာလို့ ဒေသခံတွေက ပြောပါတယ်။
ဖမ်းဆီးခံရသူအများစုဟာ ကျောင်းသားလူငယ်တွေဖြစ်ကြပြီး ဗန်းမော်မြို့တွင်းရှိ လက်ဖက်ရည်ဆိုင်တွေ ၊ ရပ်ကွက်တွေမှာ စစ်အုပ်စုက လူငယ်တွေကို အချိန်မရွေး ဖမ်းဆီးနေတာ ကြောင့် မိဘပြည်သူတွေ စိုးရိမ်ပူပန်နေကြပါတယ်။
ဗန်းမော်မှာ ဇွန် ၂၁ ရက် ညကလည်း ပေါက်ကုန်းရပ်ကွက်ရှိ နေအိမ်တစ်အိမ်မှာ လူငယ်တစ်ယောက်ကို စစ်တပ်က သေနတ်နဲ့ ပစ်ဖောက်ခြိမ်းခြောက်ပြီး ဖမ်းဆီးသွားပါတယ်။
အခု ဇွန်လအတွင်း ဖမ်းဆီးခံခဲ့ရသူ လူငယ်အယောက် ၃၀ ထက်မနည်းရှိနေပြီး ဘယ်မှာ ဖမ်းဆီး ချုပ်နှောင်ထားတယ်ဆိုတာ မသိရသေးပါဘူး။
