စစ်ကိုင်းတိုင်း၊ ကနီမြို့နယ်အတွင်းက စစ်ဘေးရှောင်နေရသူတွေဟာ ရာသီဥတု ပူပြင်းလို့ ဝမ်းပျက်ဝမ်းလျှောရောဂါ အဖြစ်များနေတာကြောင့်  ဆေးဝါးတွေ အကူအညီ အရေးပေါ်လိုအပ်နေတယ်လို့  စစ်ဘေးရှောင်အရေး ကူညီနေသူတွေထံက သိရပါတယ်။

ကနီအထက်ပိုင်းမှာ ကူညီကယ်ဆယ်ရေးလုပ်ပေးနေသူတစ်ဦးက  “လောလောဆယ် ကျနော်တို့ ခက်ခဲနေတာက ဆေးဝါးပါ။ အစားအသောက်က လောလောဆယ် ယာယီကတော့ အဆင်ပြေနေသေးတယ်။ ပြည်တွင်းက‌ စေတနာရှင် အနည်းငယ် လှူဒါန်းတာတွေရှိတော့ တော်သေးတယ်ဗျ။ ဆေးဝါးကတော့ အတော်လေးကို လိုအပ်နေတယ်။ ကျနော့်အုပ်စုက  စစ်ဘေးရှောင်လူဦးရေ ၅၀၀၀ ကျော်ရှိတယ်ဗျ။ အခု တောထဲမှာ ပုန်းရှောင်နေရတော့ တောထဲမှာရှိတဲ့ ဖက်ဆွတ်ရေတွေ သောက်ရတော့ ကလေးတွေ ဝမ်းပျက်ဝမ်းလျှော ဖြစ်တယ်။ ဖျားတယ်။ သက်ကြီးရွယ်အိုတွေ နေမကောင်းဖြစ်တာတို့၊ ကိုယ်ဝန်ဆောင်မိခင်တွေ မီးဖွားရတာတို့ အခက်အခဲတွေ အတော်ကိုဖြစ်နေတယ်ဗျ။ ဒါတောင် မိုးမရွာသေးလို့ မိုးရွာရင် အမိုးအကာအတွက် အခက်အခဲဖြစ်ဦးမှာ”လို့ DVB ကို ပြောပါတယ်။

ကနီမြို့နယ်အတွင်း ကျေးရွာတွေမှာ  စစ်ကောင်စီအကြမ်းဖက်တပ်တွေက ဥပဒေမဲ့အနိုင်ကျင့် ဖမ်းဆီး နှိပ်စက် သတ်ဖြတ်၊ ပစ္စည်းတွေကို လုယူဖျက်ဆီးတာတွေ လုပ်နေတဲ့အတွက် ထောင်နဲ့ချီတဲ့ ဒေသခံရွာသားတွေဟာ အိုးအိမ်စွန့်ခွာ တောထဲ ထွက်ပြေးနေကြ ရတာပါ။ 

လတ်တလော ကနီမြို့နယ်အတွင်းက ကျေးရွာတိုင်းလိုလိုမှာ ပြည်သူတွေ စစ်ဘေးရှောင်နေရကာ အမိုးအကာ၊ ဆေးဝါးနဲ့ အစားအသောက်တွေ အရေးတကြီး  လိုအပ်နေပါတယ်။