မန္တလေးမြို့ ချမ်းအေးသာစံမြို့နယ် လမ်း ၃၀၊ ၈၃ လမ်းနဲ့ ၈၄ လမ်းကြားမှာ မေလ ၂၈ ရက်နေ့ ညနေပိုင်းက မန္တလေး သံဃသမဂ္ဂသပိတ်စစ်ကြောင်းကို စစ်ကောင်စီရဲ့လက်နက်ကိုင်အဖွဲ့တွေက အကြမ်းဖက် ဖြိုခွင်းဖမ်းဆီးသွားပါတယ်။
စစ်ကြောင်းထွက်ဖို့ ပြင်ဆင်နေတဲ့အချိန်မှာ ကားနဲ့တိုက်ပြီး ဖြိုခွင်းတာဖြစ်ကာ စစ်ကြောင်းမှာပါတဲ့ သံဃာတော် ၅ ပါးလောက်နဲ့ လူပုဂ္ဂိုလ် ၁ ဦးကို ရိုက်နှက်ဖမ်းဆီးသွားတယ်လို့ သိရပါတယ်။
မန္တလေး သံဃသမဂ္ဂသပိတ်စစ်ကြောင်းဟာ အတားအဆီးတွေ ဘယ်လိုရှိရှိ နေ့စဉ်မပြတ်ချီတက်နေတဲ့ စစ်ကြောင်းတစ်ခုဖြစ်ပြီး ပြည်သူပြည်သားတွေ ဆင်းရဲဒုက္ခအပေါင်းက အမြန်လွတ်မြောက်စေဖို့ ပရိတ်ရွတ် မေတ္တာပို့တာတွေကို နေ့စဉ် လုပ်လေ့ရှိပါတယ်။