မယ်ဆိုင်တွင် မြန်မာဘက်ပို့မည့် သေနတ်မျိုးစုံ ၂၇ လက်နှင့် ကျည်ဆန် ၅၀၀၀၀ ခန့် ဖမ်းဆီးရမိ

ထိုင်း-မြန်မာနယ်စပ် ချင်းရိုင်ခရိုင်၊ မယ်ဆိုင်မြို့ထဲမှာ မြန်မာဘက်ကို ပို့ဆောင်မယ့် လက်နက်တွေနဲ့ ကျည်ဆန်တွေဖမ်းဆီးရမိတယ်လို့ မယ်ဆိုင်ခရိုင်မှူး၊ မြို့နယ်အုပ်ချုပ်ရေးဌာန၊ အကောက်ခွန်ဌာန၊ နယ်ခြားစောင့်တပ်နဲ့ လဝကရဲတွေပါဝင်တဲ့ ပူးပေါင်းအဖွဲ့က ဒီကနေ့ မေလ ၂၇ ရက် ညနေပိုင်းမှာ သတင်းစာရှင်းလင်းပြောပါတယ်။  

ဒီကနေ့ ညနေပိုင်းက နယ်စပ်ဂိတ်အကောက်ခွန်ဌာနတာဝန်ရှိသူတွေဟာ ဟိုင်းလပ်ကား တစ်စီးပေါ်ကအထုတ်တွေကို နယ်စပ်ဖြတ်ခွင့်ရ မှန်လုံကားတစ်စီးပေါ်သို့ ရွေ့ပြောင်းနေတဲ့ မသင်္ကာဘွယ် အမျိုးသမီး ၁ ဦးနဲ့ အမျိုးသား ၁ ဦးတို့ကို ဝင်ရောက်စစ်ဆေးခဲ့ပါတယ်။ 

စစ်ဆေးချက်အရ အဆိုပါအထုတ်တွေထဲမှာ ပွိုင့် ၂၂ အမျိုးအစား ပြောင်းရှည်သေနတ် ၁၄ လက်၊ ပစ္စတိုသေနတ် ၁၃ လက်နဲ့ အရွယ်အစား တံဆိပ်အမျိုးမျိုးပါ ကျည်ဆံပေါင်း ၄၆၃၇၅ ထောင့်ကို တွေ့ရှိရတယ်လို့ ဆိုပါတယ်။ 

အထုတ်တွေကို ရွှေ့ပြောင်းသယ်ဆောင်နေသူ ၂ ဦးဟာ ထိုင်းတောင်ပေါ်သား မှတ်ပုံတင်ကိုင်ဆောင်သူ နန်းစမ်နမ်ဝုန်း( ၃၃ နှစ် ) နဲ့ ကျော်ဖြိုးဆိုသူ မြန်မာအမျိုးသား ၁ ဦးတို့ဖြစ်ကြောင်း၊  သူတို့တွေဟာ အဆိုပါအထုတ်တွေကို မယ်ဆိုင်မြို့ ပါမိုတ်ရပ်ကွက်ရှိ ကုန်တိုက်ကြီးတစ်ခုအနောက်ဘက်က သယ်ဆောင်လာတာဖြစ်ပြီး  မြန်မာဘက်ကို ပို့ဆောင်ပေးဖို့အတွက်  လူတစ်ယောက်က ဘတ် ၂၀၀၀၀ နဲ့ စေခိုင်းခဲ့တာလို့ ဝန်ခံသွားပါတယ်။ 

တာဝန်ရှိသူတွေက အဆိုပါလက်နက်တေ လာရာလမ်းကြောင်း၊ ပို့ဆောင်မယ့်လမ်းကြောင်း ကွင်းဆက်တွေကို ရှာဖွေဖော်ထုတ်ပြီး တရားမဝင်လက်နက်ရောင်းဝယ်သယ်ဆောင်မှုတွေနဲ့ အရေးယူသွားမယ်လို့  တာဝန်ရှိသူတွေက ပြောပါတယ်။ 

Source: maesaipress

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up