ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၅ ထိန်းချုပ်နယ်မြေထဲကို စစ်ကောင်စီဘက်က လေယာဉ်နဲ့ဗုံးလာကြဲနေတယ်လို့ တာဝန်ရှိသူတွေက ပြောပါတယ်။
ထိုင်းနယ်စပ်က စစ်ကောင်စီတပ်စခန်းကို ဧပြီ ၂၇ ရက်နေ့ မနက်ပိုင်းမှာပဲ KNLA တပ်မဟာ ၅ က တိုက်ခိုက်သိမ်းယူခဲ့တာကြောင့် အခုလို လာရောက်ဗုံးကြဲတာဖြစ်နိုင်တယ်လို့ တပ်မဟာ ၅ ပြောခွင့်ရ ပဒိုမန်းမန်းက ဒီဗွီဘီကိုပြောပါတယ်။
ဒီပစ်ခတ်မှုတွေကြောင့် လူထိခိုက်မှု ရှိ မရှိ မသိရသေးဘူးလို့ ဆိုပါတယ်။
စစ်ကောင်စီအနေနဲ့ မြို့ပေါ်တွေမှာ လူတွေကို အကြမ်းဖက်သတ်ဖြတ်တာတွေ၊ ပြည်တွင်းစစ်မှာ လေယာဉ်အသုံးပြုပြီး ကျေးရွာတွေဘက် ရမ်းသမ်းပစ်ခတ်တာတွေကို မလုပ်ဖို့ နိုင်ငံတကာအနေနဲ့ တားဆီးပိတ်ပင်ပေးဖို့ ပဒိုမန်းမန်းက တောင်းဆိုပါတယ်။
အမျိုးသားညီညွတ်ရေးအစိုးရအနေနဲ့လည်း ဖက်ဒရယ်အရေးတိုက်ပွဲဝင်နေတဲ့ တော်လှန်ရေးအဖွဲ့အစည်းတွေကို အကူအညီအထောက်အပံ့တွေပေးဖို့ လိုမယ်လို့ ဆိုပါတယ်။
