စစ်ကိုင်းတိုင်း၊ အိန္ဒိယ-မြန်မာနယ်စပ်၊ တမူးမြို့မှာ ဧပြီလ ၃ ရက်နေ့ ညဦးပိုင်းက စစ်ကောင်စီတပ်တွေရဲ့ ကင်းစခန်းနှစ်ခုနဲ့ တံတားတစ်စင်း မီးလောင်ခဲ့ပြီး နယ်မြေမီးသတ်စခန်းကို ပြည်သူတွေက သဲအိတ်တွေနဲ့ပိတ်ကာ သိမ်းပိုက်မှုတွေ ပြုလုပ်ခဲ့ပါတယ်။ 

တံတားအမှတ် ၁၄ ရှိ ရဲကင်းတဲနှင့် နန်းဖာလုံဘုရားကျောင်းပေါက် စစ်တပ်ကင်းစခန်းတို့ မီးလောင်ခဲ့သလို တမူး-နန်းဖာလုံကို ဆက်သွယ်ထားတဲ့ ချောင်းနက်ကြီး မြို့မ ၁၄ သံဘောင်ဘေလီသစ်သားတံတား မီးလောင်ပျက်စီးခဲ့ပါတယ်။ 

မီးလောင်တဲ့ အကြောင်းရင်းကိုတော့ မသိရသေးပါဘူး။ ဒါ့အပြင် မြို့မ ၁၃ နန်းဖာလုံဈေးအနီးက နယ်မြေမီးသတ်စခန်းကိုလည်း သဲအိတ်တွေနဲ့ပိတ်ဆို့ကာ ပြည်သူတွေက သိမ်းလိုက်တယ်လို့ သိရပါတယ်။

ဧပြီ ၃ ရက်နေ့ မွန်းလွဲ ၃ နာရီလောက်မှာ အမည်မသိဆိုင်ကယ်စီးလာသူတွေက မအဲကုန်စုံဆိုင်အနီး ချောင်းနက်ကြီးတံတားနားမှာ စစ်ကောင်စီတပ်တွေရဲ့ ယာဉ်တန်းကို လက်ပစ်ဗုံးလို့ ယူဆရတဲ့အရာနဲ့ ထုပြေးသွားတဲ့အတွက် စစ်ကောင်စီတပ်တွေဘက်ကလည်း သေနတ်ပစ်ဖောက်တာ၊ ဗုံးနဲ့ထုတာတွေ ပြုလုပ်ခဲ့တယ်လို့ ဒေသခံတွေက ပြောပါတယ်။ 

ဒီဖြစ်စဉ်တွေကြောင့် လူနဲ့တိရစ္ဆာန်တွေ ထိခိုက်မှု မရှိခဲ့ဘူးလို့ သိရပါတယ်။  ဒါ့အပြင် မြို့မ ၁၄ ရပ်ကွက်က လူနေအိမ်တစ်လုံးလည်း မီးလောင်မှုဖြစ်ပွားခဲ့သေးတယ်လို့ သိရပါတယ်။

ပြီးခဲ့တဲ့ ဧပြီလ ၂ ရက်နေ့ကလည်း စစ်ကောင်စီတပ်တွေ ယာယီတပ်စွဲထားတဲ့ မြို့မ ၁၄ က နန်းဖာလုံနယ်မြေ ၁၃ မီးသတ်စခန်းကို CDM လုပ်နေတဲ့ ရဲတပ်သားတစ်ဦးပါဝင်တဲ့အဖွဲ့က သွားရောက်တိုက်ခိုက်ခဲ့လို့ စစ်ကောင်စီတပ်ဘက်က လူ ၅ ဦးသေဆုံးခဲ့ပြီး သွားရောက်တိုက်ခိုက်တဲ့ဘက်က CDM ရဲတစ်ဦး ကျဆုံးခဲ့ပါသေးတယ်။

တမူးမြို့မှာ မတ်လနောက်ဆုံးပတ်အတွင်းက စစ်ကောင်စီအကြမ်းဖက်တပ်တွေရဲ့ ပစ်ခတ်မှုကြောင့် ပြည်သူတစ်ဦး ကျဆုံးကာ ၈ ဦး ထိခိုက်ဒဏ်ရာတွေ ရရှိခဲ့ပါသေးတယ်။

အဲဒီ‌ဖြစ်စဉ်နောက်နေ့မှာလည်း ချောင်းနက်ကြီးရဲကင်းစခန်း ပေါက်ကွဲမှုဖြစ်ပြီး မီးလောင်လို့ စစ်ကောင်စီရဲနှစ်ဦးထက်မနည်း သေဆုံးကာ ရဲတချို့ ထိခိုက်ဒဏ်ရာတွေ ရရှိခဲ့သေးတယ်လို့ တမူးဒေသခံတွေက DVB ကို ပြောဆိုထားပါတယ်။

ဓာတ်ပုံ - Facebook