မန္တလေးတိုင်းဒေသကြီး ပြင်ဦးလွင်မြို့မှာ မတ်လ ၂၇ ရက် မနက် ၈နာရီကျော်လောက်မှာ အကြမ်းဖက် စစ်ကောင်စီရဲ့တပ်တွေက လက်နက်တွေနဲ့ ပစ်ခတ်ဖြိုခွင်းခဲ့တာကြောင့် ဆန္ဒပြပြည်သူ ၅ ဦး ကျည်ထိမှန်ကျဆုံးခဲ့ပြီး ၈ ဦးထက်မနည်းဖမ်းဆီးခံရတယ်လို့ ဒေသခံတွေဆီက သိရပါတယ်။
လတ်တလော သတင်းများအရ ခေါင်းနဲ့ လည်ပင်းတွေကို ကျည်ဆန်ထိမှန်ပြီး ပြည်သူ ၅ ဦး ကျဆုံးသွားကြောင်း သိရပြီး တစ်ချို့ကိုတော့ နာရေးကူညီမှုအသင်းကားနဲ့ လာရောက်ခေါ်ဆောင်သွားတယ်လို့ သိရပါတယ်။
ဒါ့အပြင်အလောင်းကောက်လို့မရသေးတာတွေ ရှိသလို ဆေးရုံသို့ ပို့ဆောင်လို့ မရသေးတဲ့ လူနာတစ်ချို့လည်း ရှိနေသေးတယ်လို့ သိရပါတယ်။
ပြင်ဦးလွင်မြို့တွင် မတ်လ ၂၇ ရက်နေ့ မနက်ပိုင်းက သပိတ်စစ်ကြောင်း ၂ခုခွဲပြီး ဆန္ဒဖော်ထုတ်ခဲ့ကြပြီး မြို့သစ်ချယ်ရီလမ်းဘက်မှာ သပိတ်စစ်ကြောင်းတစ်ခုကို အကြမ်းဖက်စစ်ကောင်စီက ပစ်ခတ်ဖြိုခွင်းပြီးနောက် ဆန္ဒပြပြည်သူတွေကို ဖမ်းဆီးခဲ့တဲ့အပြင် ချယ်ရီဖုန်းဆိုင်ကိုလည်း ဖျက်ဆီးကာ ဖုန်းတွေလည်း ယူဆောင်သွားတယ်လို့ မျက်မြင်သက်သေတွေပြောပြချက်အရ သိရပါတယ်။