ထားဝယ်တွင် ရပ်ကွက်ထဲ ကင်းစောင့်နေသူ ၄ ဦးကို အကြမ်းဖက်စစ်အုပ်စု ဖမ်းဆီး

DVB

တနင်္သာရီတိုင်း ထားဝယ်မြို့မှာ ရပ်ကွက်ထဲ ကင်းစောင့်နေတဲ့ အမျိုးသား ၄ ဦးကို မတ် ၂၁ ရက်ညမှာ အကြမ်းဖက်စစ်အုပ်စုက ဖမ်းဆီးခေါ်ဆောင်သွားတယ်လို့ ဆန္ဒပြ တက္ကသိုလ်ကျောင်းသားတဦးက ပြောပါတယ်။

    “ညက အိုးလုပ်ရပ်ကွက်မှာ ကင်းစောင့်နေတဲ့ ယောကျ်ာလေး ၄ ယောက်ကို ဖမ်းခေါ်သွားတယ်။ သေနတ် သုံးချက်ပစ်ဖောက်ပြီးတော့ စစ်တပ်ရော၊ ရဲတပ်ဖွဲ့ဝင်တွေရော ပါတယ် လာဖမ်းတာ။”

ထားဝယ်မြို့မှာ စစ်အာဏာရှင်ဆန့်ကျင်ရေး ဆန္ဒပြသပိတ်စစ်ကြောင်းတွေကို အကြမ်းဖက်စစ်တပ်နဲ့ ရဲတပ်ဖွဲ့က ပစ်ခတ်ဖြိုခွင်းပြီး ဖမ်းဆီးနေတာ အခု ၄ ယောက်အပါအဝင် ၄၉ ယောက်ရှိသွားပြီလို့ ဒေသခံတဦးက ပြောပါတယ်။

ဒါ့အပြင် အကြမ်းဖက်ရဲနဲ့စစ်တပ်က ဖမ်းဆီးထားသူတွေကို ထားဝယ်အကျဉ်းထောင်မှာ ထားရှိပြီး ပုဒ်မ ၅၀၅ (က)၊ ၅၀၅ (ခ) တွေနဲ့ တရားစွဲဆိုထားတယ်လို့ သိရပါတယ်။

ထားဝယ်မြို့မှာ ဒီနေ့မနက် ၇ နာရီကလည်း စစ်အာဏာရှင်ဆန့်ကျင်ရေး ထားဝယ်တက္ကသိုလ်သပိတ်စစ်ကြောင်းနဲ့ NLD လူငယ်တွေ ပူးပေါင်းဆန္ဒပြခဲ့ကြတယ်လို့ ဆန္ဒပြရာမှာ ပါဝင်သူတဦးက ပြောပါတယ်။

သပိတ်စစ်ကြောင်းကို တလိုင်းထိန်ရပ်ကွက် တရုတ်ဘုံကျောင်းကနေ စတင်ထွက်ခွာပြီး ကမ်းနားဈေးတပတ် ဆန္ဒပြခဲ့ကြပြီး သပိတ်ခေါင်းဆောင်အချို့က ဟောပြောတာတွေလည်း ပြုလုပ်ခဲ့ကြတယ်လို့ ဆိုပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up