DVB
ဧရာဝတီတိုင်း ပုသိမ်မြို့၊ အမှတ် ၃ ရပ်ကွက် ကိုးသောင်းမှာ နေအိမ်ဆောက်ဖို့ သဲသယ်လာတာကို ဆန္ဒပြဖို့ သဲအိတ်ချတယ်ထင်ပြီး ရပ်ကွက်ထဲကို အကြမ်းဖက်လက်နက်ကိုင် ရဲနဲ့ စစ်တပ်က လာရောက်ပစ်ခတ်ခဲ့ပါတယ်။
ရပ်ကွက်လုံခြုံရေးအတွက် သဲအိတ်တွေချနေချိန်မှာ ရဲနဲ့စစ်တပ်အင်အား ၁၀၀ ကျော်လောက်ရောက်ရှိလာပြီး အသံဗုံး၊ ရာဘာကျည်တွေနဲ့ ဝင်ရောက်ပစ်ခတ်သွားတာလို့ ဒေသခံတွေက ပြောပါတယ်။
ရဲနဲ့စစ်တပ်က ရပ်ကွက်ထဲဝင် သေနတ်နဲ့ပစ်ခတ်ပြီးနောက်ပိုင်းမှာ အသက် ၁၁ နှစ်အရွယ် ကလေး ၁ ဦးကိုလည်း ဖမ်းဆီးခေါ်ဆောင်သွားတယ်လို့ ဆိုပါတယ်။
ဖမ်းဆီးခံရတဲ့ ကလေးဟာ ကိုးသောင်း ၃ လမ်းမှာ နေထိုင်တဲ့ အသက် ၁၁ နှစ်အရွယ် ၆ တန်းကျောင်းသူ မဇင်မျိုးသူဆိုသူဖြစ်ပြီး ရပ်ကွက်ထဲ ရဲနဲ့စစ်တပ်ဝင်လာစဥ် ကွမ်းယာဆိုင်ပေါ်ထိုင်နေပြီး ဖုန်းကိုင်လိုက်မိလို့ ခေါ်ဆောင်သွားတာလို့ မျက်မြင်တွေ့ရှိခဲ့သူက DVB ကိုပြောပါတယ်။
ရဲနဲ့စစ်တပ်ဟာ စကားဝါ ၁ လမ်းကနေ ၆ လမ်းအထိ လမ်း ၁ လမ်းကို သေနတ် ၅ ချက်လောက်ပစ်ဖောက်သွားတာမျိုးရှိတယ်လို့ ဒေသခံတွေက ပြောပါတယ်။
