ကချင်သယံဇာတဝန်ကြီးကို video conferencing ဖြင့် ရုံးထုတ်၊ အာမခံမရ

ဦးဒါရှီလဆိုင်းကို မတ်လ၁ရက်နေ့ရုံးချိန်းမှာတွေ့ရစဥ်

နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)နဲ့ တရားစွဲထားတဲ့ ကချင်ပြည်နယ်က သယံဇာတနဲ့ သဘာဝပတ်ဝန်းကျင်ထိန်းသိမ်းရေးဝန်ကြီး ဦးဒါရှီလဆိုင်းကို မတ်လ ၅ ရက်နေ့ နေ့လယ်က ဒုတိယအကြိမ် video conferencing နဲ့ ရုံးထုတ်ခဲ့ပြီး အာမခံမရရှိခဲ့ဘူးလို့ တရားလွှတ်တော်ရှေ့နေ ဦးသက်ထွန်းဦးက ပြောပါတယ်။

“ဒီနေ့မှာ video conferencing နဲ့ အမှုကို ဆောင်ရွက်တာပေါ့။ ဘယ်နေ့မှာ အမှုကို ဘယ်လိုစစ်သွားမယ်ဆိုပြီး ရုံးချိန်းသတ်မှတ်တာပါ။ အသက် ၁၆ နှစ်အောက် မဟုတ်ဘူး၊ အမျိုးသမီး မဟုတ်ဘူး၊ ဖျားနာနေတဲ့သူ မဟုတ်ဘူး၊ ချည့်နဲ့နေတဲ့သူ မဟုတ်တဲ့အတွက် ဦးဒါရှီလဆိုင်းကို အာမခံမပေးနိုင်ဘူးဆိုပြီး အမိန့်ချခဲ့တယ်။” 

ရွေးကောက်ခံအစိုးရ တက်လာတဲ့အထိ အစိုးရရုံးတွေကို ရုံးပိတ်ရက် သတ်မှတ်တယ်လို့ ကချင်ပြည်နယ် ဝန်ကြီးချုပ်ကိုယ်စား လက်မှတ်ရေးထိုး ထုတ်ပြန်ခဲ့တဲ့အပေါ်မှာ တရားစွဲခံရတာပါလို့ ဦးဒါရှီလဆိုင်းထံကနေ သိရပါတယ်။

ဦးဒါရှီလဆိုင်းကို မြစ်ကြီးနား ဒုမြို့နယ်အုပ်ချုပ်ရေးမှူး ဦးမင်းရန်နိုင်က တရားလိုပြုလုပ် တရားစွဲထားတာဖြစ်ပြီး မတ်လ ၉၊ ၁၆၊ ၂၃ နဲ့ ၃၀ ရက်နေ့တွေမှာ ထပ်မံရုံးထုတ်စစ်ဆေးသွားမယ်လို့ သိရပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up