စစ်အာဏာရှင်ဆန့်ကျင်ရေး မြေနီကုန်းတံတားအောက်မှာ ဆန္ဒပြနေတဲ့ ကျောင်းသားပြည်သူတွေကို လုံခြုံရေးတပ်ဖွဲ့ဝင်တွေက အင်အားသုံး အကြမ်းဖက်ဖြိုခွင်းပြီး ဖမ်းဆီးတာတွေ ပြုလုပ်ခဲ့တယ်လို့ အဲဒီနေရာမှာ သတင်းရယူနေတဲ့ ဒီဗွီဘီသတင်းထောက်က ပြောပါတယ်။
ဆန္ဒပြသူ ၁၀၀၀ ဝန်းကျင်လောက်ကို ဒီနေ့မနက် ၁၁ နာရီလောက်မှာ လုံခြုံရေးတပ်ဖွဲ့ဝင် အင်အား ၁၀၀ ကျော်က အကြမ်းဖက်ဖြိုခွင်းခဲ့တာဖြစ်ပြီး သတင်းထောက် ၂ ဦးလည်း ဖမ်းဆီးခံခဲ့ရတယ်လို့ ဆိုပါတယ်။
“ကျနော်တို့ မြေနီကုန်းတံတားအောက်မှာ ဆန္ဒပြနေကြတယ်။ ရဲတပ်ဖွဲ့အင်အား စစ်သားအင်အား အများအပြားနဲ့ ရဲကားတွေအချုပ်ကားတွေနဲ့ မြေနီကုန်းမီးပွိုင့်ကနေ ဗားကရာထောင့်၊ ပြည်လမ်းထောင့် အဲပတ်ချာလည်အကုန်လုံး တံတားပေါ်မှာရော လုံခြုံရေးတပ်ဖွဲ့တွေက နေရာယူတယ်။ ပြီးတော့ တံတားအောက် ဆန္ဒပြသူတွေကို သူတို့က အင်အားသုံးဖြိုတယ်။ ဆန္ဒပြသူတွေက နီးစပ်ရာ အိမ်တွေထဲ ဝင်ပြေးကြတယ်။ အဲဒါကို အိမ်တွေထဲထိ လိုက်ဖမ်းတယ်။ သတင်းထောက် ၂ ယောက်ပါသွားတာ တွေ့တယ်။” လို့ သတင်းထောက်က ပြောပါတယ်။
ဆန္ဒပြသူတွေကိုတော့ ပစ်ခတ်တာတော့ မရှိဘဲ အင်အားသုံး အကြမ်းဖက်ဖြိုခွင်းခဲ့တာလို့ ဆိုပါတယ်။
မနေ့ညကလည်း တာမွေမြို့နယ်မှာ စစ်ကောင်စီခန့် အုပ်ချုပ်ရေးမှူးများ အလိုမရှိကြောင်း ဆန္ဒပြသူတွေကို လုံခြုံရေးတပ်ဖွဲ့ဝင်တွေက အကြမ်းဖက်ဖြိုခွင်း ပစ်ခတ်တာတွေ လုပ်ခဲ့ပြီး လူ ၃၀ လောက်ကို ဖမ်းဆီးခဲ့တယ်လို့ သိရပါတယ်။
