ပဲခူးတိုင်းဒေသကြီး၊ ဒိုက်ဦးမြို့နယ်မှာ ဆရာ/ဆရာမတွေ အပါအဝင် လယ်ယာစိုက်ပျိုးရေးနှင့်ဆည်မြောင်းဦးစီးဌာနက ဝန်ထမ်းတွေဟာ စစ်အာဏာသိမ်းတာကို ကန့်ကွက်တဲ့အနေနဲ့ ဖဲကြိုးနီလှုပ်ရှားမှုကို ဒီနေ့ညနေ ပြုလုပ်ခဲ့ကြပါတယ်။
ဒိုက်ဦးမြို့နယ်အတွင်းက ပညာရေးဝန်ထမ်းတွေနဲ့ ဆရာဆရာမတွေက “ကျွန်ုပ်တို့သည် ကျွန်ုပ်တို့ ယုံကြည်စွာ ရွေးချယ်ထားသော ပြည်သူ့အစိုးရလက်အောက်တွင်သာ တာဝန်ထမ်းဆောင်လိုပါသည်” စာသာပါဗီနိုင်းတွေနဲ့ ကမ္ဘာမကြေဘူးသီချင်း သီဆိုကြကာ ဖဲ ကြိုးနီလှုပ်ရှားမှု ပြုလုပ်ခဲ့ကြတာပါ။
ဆန္ဒပြရာမှာ ပါဝင်တဲ့ ကျောင်းဆရာတဦးက “ကျနော်တို့ အခုဖဲကြိုးနီလှုပ်ရှားမှုက စစ်အာဏာသိမ်းတာကို ကန့်ကွက်တာပါ။ ကျနော်ကိုယ်တိုင်ရွေးချယ်ထားတဲ့ ပြည်သူ့အစိုးရလက်အောက်မှာပဲ တာဝန်ထမ်းဆောင်လိုကြောင်း ထုတ်ဖော်တာဖြစ်သလို ပြည်သူတွေနဲ့အတူရပ်တည်ကြောင်း တခြားဌာနတွေ ပြုလုပ်နေတဲ့ Civil Disobedience Movement ကို ထောက်ခံကြောင်း ပြသရာလည်းဖြစ်တယ်” လို့ ပြောပါတယ်။
တချိန်တည်းမှာ ဒိုက်ဦးမြို့နယ်လယ်ယာစိုက်ပျိုးရေးနဲ့ ဆည်မြောင်းဦးစီးဌာနက ဆည်မြောင်းဦးစီးမှူး အပါအဝင် ဝန်ထမ်းတွေကလည်း ဆည်မြောင်းရုံးမှာ ဖဲကြိုးနီ လှုပ်ရှားမှုနဲ့ အာဏာဖီဆန်ရေးလှုပ်ရှားမှုကို ထောက်ခံကြောင်း၊ ပြည်သူတွေနဲ့ အတူရပ်တည်ကြောင်း ထုတ်ဖော်ခဲ့ကြပါတယ်။
လယ်ယာစိုက်ပျိုးရေးနဲ့ ဆည်မြောင်းဦးစီးမှူး ဦးဟန်ကိုလတ်က “ဖဲကြိုးနီလှုပ်ရှားမှုမှာ အောက်ခြေဝန်ထမ်းတွေကို ပါဝင်ပါလို့ မတိုက်တွန်းထားပါဘူး။ သူတို့အသိစိတ်နဲ့ သူတို့စုပေါင်းပါဝင်လာတာ” လို့ ပြောပါတယ်၊
ဒိုက်ဦးမြို့မှာ ဖဲကြိုးနီလှုပ်ရှားမှုနဲ့ ပတ်သက်ပြီး ရဲတပ်ဖွဲ့ဝင်တွေ၊ တပ်မတော်သားတွေက တားမြစ်တာမျိုးတွေ မရှိခဲ့ပေမယ် အရပ်ဝတ်တွေနဲ့ ဓာတ်ပုံလာရိုက်တာမျိုးတော့ ရှိတယ်လို့ သိရပါတယ်။
သတင်း၊ဓါတ်ပုံ
နေလင်းထိုက်
