‘ဝ’ အထူးဒေသ၌ ပိတ်မိနေသည့် စက်ရုံလုပ်သားများကို အစိုးရအစီအစဉ်ဖြင့် နေရပ်ပြန်ပို့
DVB
·
January 20, 2021
‘ဝ’ အထူးဒေသမှာ ပိတ်မိနေတဲ့ မြန်မာစက်ရုံလုပ်သား ၁၅၀ ကျော်ကို ဇန်နဝါရီ ၁၇ ရက်ကစပြီး အစိုးရအစီအစဉ်နဲ့ နေရပ်ပြန်ပို့နေပြီလို့ ကျိုင်းတုံခရိုင် အုပ်ချုပ်ရေးမှူးက ဒီဗွီဘီကို ပြောပါတယ်။
ပိတ်မိနေတဲ့ မြန်မာစက်ရုံလုပ်သားတွေဟာ ဒီကနေ့မှာတော့ နေရပ်အသီးသီးကို ပြန်လည် ရောက်ရှိပြီး သက်ဆိုင်ရာ ကွာရန်တင်းစင်တာတွေကို ရောက်ရှိနေကြပြီလို့ စက်ရုံ အလုပ်သမားတဦးက ပြောပါတယ်။
အဆိုပါမြန်မာလုပ်သားတွေဟာ ဇန်နဝါရီ ၁၄ ရက်က မိုင်းယန်းမြို့နယ်ရှိ တရုတ်နိုင်ငံသားပိုင် ကျင်းဟွာ ဆေးလိပ် ကုမ္ပဏီပိုင်ကားနဲ့ မိုင်းယန်း - မိုင်းခတ် ကားလမ်းဘေး၊ ထန်မွန်ကျေးရွာအနီးမှာ ကြံခင်းနဲ့ ကိုင်းတောနားမှာ လာရောက်ပို့ဆောင် ခံခဲ့ရတာလည်း ဖြစ်ပါတယ်။
ပြန်ပို့ခံရတဲ့ မြန်မာ စက်ရုံလုပ်သားတွေဟာ မိုင်းခတ်မရောက်ခင် ကြံခင်းမှာ ရွာတွင်းအဝင်မခံလို့ ပိတ်မိနေပြီး နေရပ်ကိုလည်း မပြန်နိုင်ဘဲ ရိက္ခာပြတ်လပ်ကာ အခက်အခဲ ကြုံတွေ့နေရတာလည်း ဖြစ်ပါတယ်။
ကျိုင်းတုံခရိုင် အုပ်ချုပ်ရေးမှူး ဦးဝင်းမင်းသိန်းက "သူတို့က အထူးဒေသ ၂ နဲ့ အထူး ၄ ကို ရောက်နေတာ။ ကျနော်တို့ဘက်မှာ မဟုတ်ဘူး။ သတင်းတွေက အမှားတွေတက်ပြီးတော့ ကျနော်တို့ဘက်က ပိတ်ထားတယ် ဆိုပြီး ဖြစ်နေတာ။ ကျနော်တို့ဘက်ကို မရောက်တော့ ခေါ်လို့ လည်းမရ။ ပြန်ပို့လို့လည်း မရဖြစ်နေတာ။ ပြီးတော့ အဲဘက်က သူတို့က ပိတ်ထားတာ အသေ ပိတ်ထားတာ။ သူတို့ တပ်တွေနဲ့ ပိတ်ထားတာ။ ဗမာပြည်က ကျနော်တို့ ဒီက အဖွဲ့တွေ မဟုတ်ဘူး။ ထွေအုပ်တို့ ရဲတို့ မဟုတ်ဘူး။ မှားပြီးတော့။ ပြောတဲ့သူတွေက အဲနားက လူတွေ မဟုတ်ဘူးနဲ့ တူပါတယ်။ နယ်ခံမဟုတ်တော့ စကားမပေါက်တာကြောင့် သတင်းမှားနေတယ် "လို့ ရှင်းပြပါတယ်။
ကျိုင်းတုံခရိုင် အထွေထွေအုပ်ချုပ်ရေးဦးစီးဌာနအနေနဲ့ ကျင်းဟွာဆေးလိပ်စက်ရုံ အလုပ်သမားတွေကို တစ်ရက်စာ အစားအသောက် စီစဉ်ပေးပြီး တောင်ကြီးမြို့ကနေတဆင့် ကိုဗစ်စည်းကမ်းနဲ့အညီ နေရပ်ကို ပို့ဆောင်ပေးခဲ့တာလို့ သိရပါတယ်။
ကျိုင်းတုံခရိုင် အုပ်ချုပ်ရေးမှူး ဦးဝင်းမင်းသိန်းက "မိုင်းယန်းကနေ ကျိုင်းတုံ၊ ကျိုးတုံကနေ မိုင်းပျင်း၊ မိုင်းပျင်းကနေ တောင်ကြီးပေါ့။ အဲလို ပို့မှာ။ တစ်ခါထဲပဲ ပိုမှာ ဒါပေမဲ့။ စားဖို့ သောက်ဖို့ ကတော့ ကျနော်တို့ လမ်းမှာ တောက်လျှောက် စီစဉ်ပေးထားတယ်။ တောင်ကြီးရောက်ရင်တော့ တောင်ကြီး ဘက်က စီစဉ်မှာပေါ့။ အဲဒီကလည်း လာကြိုမယ်ပြောတယ် သူတို့ဘက်က ကားတွေ။" လို့ ပြောပါတယ်။
မြန်မာလုပ်သားတွေကို မိုင်းယန်းမြို့နေ ဒေါ်သီတာနဲ့ အဖွဲ့၊ အထူးဒေသ(၄)နဲ့ မြန်မာနိုင်ငံရဲတပ်ဖွဲ့တို့က လာရောက် ကူညီ ထောက်ပံ့ပေးခဲ့တယ်လို့ ပိတ်မိနေသူတွေက ပြောပါတယ်။ သူတို့ကို တရားမဝင်လမ်းကနေ လိုက်ပို့တာဖြစ်တယ်လို့လည်း ပိတ်မိနေသူတဦးဖြစ်တဲ့ မန္တလေးတိုင်းက ကိုဖြိုးသူဝင်းက ပြောပါတယ်။
ပိတ်မိနေသူ အလုပ်သမား အများစုဟာ နတ်မောက်၊ မန္တလေး၊ မိုးကုတ်နဲ့ ကျောက်မဲမြို့နယ်တို့က ဖြစ်ကြပြီး ကိုယ်ဝန်ဆောင် အမျိုးသမီး ၅ ယောက် အပါအဝင် အမျိုးသမီး ၆၁ ယောက်နဲ့ ၊ အမျိုးသား အယောက် ၉၀ ၊ စုစုပေါင်း ၁၅၁ ယောက် ဖြစ်ပါတယ်။
သတင်း - Pra Jaw၊ ဓာတ်ပုံ - ဦးဝင်းမင်းသိန်း၊ ကိုဖြိုးကိုကို