ပုသိမ်တွင် ကိုဗစ်-၁၉  ရောဂါ အခမဲ့စစ်ဆေးပေးမည့် စင်တာ ၃ ခုဖွင့်လှစ်

ဧရာဝတီတိုင်း၊ ပုသိမ်မြို့မှာ ဒီဇင်ဘာ ၃၀ ရက်နေ့က စတင်ပြီး ကိုဗစ်-၁၉ ရောဂါ ရှိ မရှိ အခမဲ့ စစ်ဆေးပေးမယ့် စင်တာ ၃ ခုကို ဖွင့်လှစ်ထားပြီ ဖြစ်တယ်လို့ တိုင်းပြည်သူ့ကျန်းမာရေးဦးစီးဌာနက သိရပါတယ်။ သံသယရှိတဲ့သူတွေကို အခမဲ့ စစ်ဆေးပေးနိုင်ဖို့အတွက် အမှတ် ၅ အထက်တန်းကျောင်း၊ သာသနာ့ဗိမာန်နဲ့ ခရိုင်မီးသတ်ရုံးတို့မှာ စစ်ဆေးပေးတဲ့ စင်တာ ၃ ခုကို ဖွင့်လှစ်ခဲ့တာဖြစ်တယ်လို​့ ဒီဇင်ဘာလ ၃၀ ရက်နေ့က ပြုလုပ်တဲ့ သတင်းစာရှင်းလင်းပွဲမှာ တိုင်းပြည်သူ့ကျန်းမာရေးဦးစီးမှူး ဒေါက်တာ သန်းထွန်းအောင်က မီဒီယာတွေကို ပြောခဲ့တာပါ။ "ဖျားနာတဲ့သူတွေ ပိုးတွေ့တဲ့လူနဲ့ ထိတွေ့မှုရှိတဲ့ လူတွေနဲ့ ရောဂါအဖြစ်များတဲ့ ဒေသကလူတွေ သံသယရှိနေလို့ ရောဂါရှိ မရှိ သိချင်ရင် ဘယ်ကို ဆက်သွယ်ပြီး ဘယ်လိုပြရမယ်ဆိုတာမသိဘူး၊ အဲ့တာကြောင့် ခုလို အခမဲ့စစ်ဆေးနိုင်အောင် စင်တာတွေကို တိုးချဲ့ဖွင့်လှစ်ပေးလိုက်တာပါ"လို့ ပြောပါတယ်။ အရင်တုန်းက ကိုဗစ်ရောဂါပိုးစစ်ဆေးတဲ့နေရာတွေအဖြစ် ပုသိမ်ဆေးရုံကြီး၊ ပုသိမ်မီးသတ်ရုံး နဲ့ ကွာရန်တင်းစင်တာတွေမှာပဲစစ်ဆေးပေးတာဖြစ်ပြီး ခုတော့ သံသယရှိသူတွေအနေနဲ့ ရောဂါ ပိုးစစ်ဆေးပြီး ကြိုတင်ကာကွယ်နိုင်အောင် ခုလို့ တိုးချဲ့ဖွင့်လှစ်လိုက်တာဖြစ်တယ်လို့ ဆိုပါတယ်။ ရောဂါပိုးရှိ မရှိ စစ်ဆေးချင်တဲ့သူတွေအနေနဲ့ သက်ဆိုင်ရာ ရပ်ကွက် ရာအိမ်မှူး၊ အုပ်ချုပ်ရေး မှူးတွေနဲ့ကျန်းမာရေးဌာနဝန်ထမ်းတွေကို ဆက်သွယ်ပြီ စင်တာတွေမှာ အခမဲ့စစ်ဆေးနိုင်ဖို့အတွက် စီစဉ်ပေးထားတယ်လို့ သိရပါတယ်။ ခုလို ရောဂါပိုး ရှိ မရှိ အခမဲ့စစ်ဆေးတဲ့စင်တာတွေကို ရောဂါပိုးတွေ့ရှိမှုများတဲ့ ဒေသတွေမှာ အလှည့်ကျပြောင်းရွှေ့ဖွင့်လှစ်သွားမှာဖြစ်ပြီး  ဒေသတစ်ခုမှာ ၁၄ ရက်ဖွင့်လှစ်မှာဖြစ်ပါတယ်။ ဒီဇင်ဘာလ ၃၀ ရက်အထိ ဧရာဝတီတိုင်းမှာ ကိုဗစ် -၁၉ ကူးစက်ခံထားရတဲ့ အတည်ပြုလူနာ ၄၄၆၉ ထိရှိနေပြီး သေဆုံးသူဦးရေ ၃၈ ဦးထိရှိ လာပြီဖြစ်တယ်လို့ တိုင်းကျန်းမာရေးဦးစီးဌာနက သတင်းထုတ်ပြန်ထားပါတယ်။ မင်းထက်မုန်း(ပုသိမ်)

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up