ပြန်လည်စည်ကားလာသည့် ရခိုင်က မဟာမြတ်မုနိဘုရား
DVB
·
December 15, 2020
စစ်ပွဲတွေ ၂ နှစ်ကျော်ကြာဖြစ်ပွားခဲ့တဲ့ ရခိုင်ပြည်နယ်မှာ ကိုဗစ်- ၁၉ ကမ္ဘာ့ကပ်ရောဂါ ဘေးနဲ့ ထပ်ကြုံရတာမို့ လုံခြုံရေးကိစ္စတွေ ခရီးသွားလာခွင့်ပိတ်ထားတာတွေနဲ့ တိတ်ဆိတ် ခြောက်ကပ်နေခဲ့ရာက ခုသီတင်းပတ်တွေမှာတော့ ကျောက်တော်မြို့ရှိ မဟာမြတ်မုနိဘုရားမှာ ဘုရားဖူးတွေနဲ့ ပြန်လည်စည်ကားစပြုလာနေပြီဖြစ်ပါတယ်။
“လပြည့်နေ့ကစပြီး ပြန်စည်ကားလာတာပါ။ အဲဒီနေ့ကတော့ ဘုရားဖူးတော်တော်များများ ရောက်ပါတယ်။ ခုရက်ပိုင်းလည်း တစ်နေ့ကို ဘုရားဖူးကား အစီး ၁၀၀ ကျော်လောက်တော့ ရောက်နေတုန်းပါပဲ”လို့ ဘုရားဂေါပကတစ်ဦးက ပြောပါတယ်။
ရခိုင်ပြည်နယ် မြောက်ဦးခရိုင် ကျောက်တော်မြို့၊ ရန်ကုန်-စစ်တွေ ကားလမ်းပေါ်မှာ တည်ရှိနေတဲ့ ဒီဘုရားဟာ ပြီးခဲ့တဲ့ တန်းဆောင်မုန်းလပြည့်နေ့ကစပြီး ဘုရားဖူးတွေနဲ့ ပြန်လည်စည်ကားလာတာ ဖြစ်ပါတယ်။
“တစ်နှစ်ကျော် နှစ်နှစ်လောက် ဘာမှမရောင်းရတာ ခုမှပဲပြန်စည်ကားလာလို့ ပြန်ရောင်းရတာပါ။ ဒီလိုပဲ အမြဲတမ်းအေးအေးချမ်းချမ်းဖြစ်နေစေချင်ပါတယ်” လို့ ထမင်းဆိုင်ပိုင်ရှင် အမျိုးသမီးတစ်ဦးက ပြောပါတယ်။
မဟာမြတ်မုနိဘုရားကို ဓညဝတီခေတ်မှာ ရခိုင်ဘုရင်စန္ဒသူရိယမင်းက သွန်းလုပ်ပူဇော်ကိုးကွယ်ခဲ့တာလို့ ဘုရားသမိုင်းမှာ ဖော်ပြထားပါတယ်။
Photo - Kaung Mrat Naing / MPA
