ဦးခင်မောင်မြင့်ကို အစဉ်ထာဝရ ဂုဏ်ပြုကြပါစို့  

“ပြည်သူ့တိုးတက်ရေးပါတီဥက္ကဋ္ဌ ဦးခင်မောင်မြင့် ၉၁ နှစ်ပြည့်” ရှစ်လေးလုံးမည်၊ ဒီမိုကရေစီ အောင်ပွဲဆီသို့၊ ပြည်သူ့တံတိုင်း  တော်လှန်လှိုင်းမှာ၊ မဆိုင်းမတွ  ကူးခတ်ပြသူ၊ လူထုကူညီ  ရန်သူကို ပြတ်သား၊ ခွန်အားအပြည့် တိုက်ပွဲရှေ့ဆောင်၊ “ဦးခင်မောင်မြင့်” ကြယ်တပွင့်အား၊ မွေးဖွားခဲ့တာ  ကိုးဆယ့်တနှစ် ရှိလာပြီ။ ။  “ဦးခင်မောင်မြင့်ကို အစဉ်ထာဝရဂုဏ်ပြုကြပါစို့” ခေါင်းစဉ်ကို ကဗျာဆရာဝင်းတင့်ထွန်းရဲ့ ကဗျာအဆုံးသတ်ကနေ ယူသုံးထားပါတယ်။ ဦးခင်မောင်မြင့်ကိုယ်တိုင်က သူ့ရဲ့ ၈၈၈၈ အပြီး ပြန်ဖွဲ့တဲ့ ပြည်သူ့တိုးတက်ရေးပါတီ ခေါင်းဆောင်စာရင်းမှာ ကဗျာဆရာ ဝင်းတင့်ထွန်း လို့ အလုပ်အကိုင် နေရာမှာ (ကဗျာဆရာ) ကို သုံးပေးသွားခဲ့တာပါ။  ဦးခင်မောင်မြင့်ဆိုတာ ငယ်စဉ် ကတည်းက ဖက်ဆစ် ဂျပန်တော်လှန်ရေးမှာ ပါခဲ့သူ။ ရန်ကုန်တက္ကသိုလ် တကသ ကျောင်းသားလှုပ်ရှားမှုတွေမှာ ပါခဲ့သလို ကိုကိုးကျွန်း အစာငတ်ခံ တိုက်ပွဲအဆင့်ဆင့်မှာ ဦးဆောင် ပါဝင်ခဲ့သူ၊ ၈၈၈၈ အရေးတော်ပုံကြီးအပြီး  ပြည်သူ့ တိုးတက်ရေး ပါတီ ဥက္ကဋ္ဌ ဦးခင်မောင်မြင့်ဟာ စစ်အာဏာရှင်အစိုးရ၊ ဖိနှိပ်သူ စစ်အုပ်စုနဲ့ ဒီမိုကရေစီတိုက်ပွဲရဲ့ ရန်သူတွေကို ပြတ်ပြတ် သားသား ဆန့်ကျင် တိုက်ပွဲဝင်ခဲ့သူပါ။ လာမဲ့ ၂၀၂၁ ခု ဖေဖော်ဝါရီ ၁၆ ဆိုရင် ဒီမိုကရေစီ ကြယ်ပွင့်ကြီး ဦးခင်မောင်မြင့် ကျဆုံး ခဲ့တာ ၂၈ နှစ် ရှိပါတော့မယ်။ ဦးခင်မောင်မြင့်ကို ၁၉၂၉ ခုနှစ်က ဒေးဒရဲမြို့နယ်၊ သဲကုန်းရွာမှာ မွေးခဲ့တယ်။ သူဟာ စတီရီယို အဆိုတော် ကိုသန်းလှိုင်ရဲ့အကို ဖြစ်ပါတယ်။ အခု ၂၀၂၀ ဒီဇင်ဘာ ၁၁ ဟာ ဦးခင်မောင်မြင့် ရှိနေသေးရင် ၉၁ နှစ် မွေးနေ့ပါ။ ကိုခင်မောင်မြင့် လို နိုင်ငံရေးသမားစစ်စစ်တွေ  ဗမာပြည်မှာ ပေါ်လာလို့ရှိရင် ဒီ စစ် အစိုးရ ကို အမြန်ဆုံး ဖက်ပြိုင် အံတုနိုင်လိမ့်မယ်။  လူငယ်တွေ ဦးခင်မောင်မြင့်ကို အတုယူစေချင်တယ်။ ။   ဦးလေးမြင့် (အတွင်းရေးမှူး ၃) ပြည်သူ့တိုးတက်ရေးပါတီ  ကြွေခဲ့ကြာလျှက်၊ ထိန်လင်းလက်ဆဲ၊ ပြိုးပြက်ကြယ်စင်၊ ဦးခင်မောင်မြင့်ရဲ့ အကြောင်းကို AAPP နိုင်ငံရေးအကျဉ်းသားများ ကူညီစောင့်ရှောက်ရေးအသင်းက ပုံနှိပ်ထုတ်ဝေထားတဲ့ ကျဆုံးနိုင်ငံရေးအကျဉ်းသားတွေအကြောင်းစာအုပ် “ရှစ်စက္ကန့်ငြိမ်” စွန့်လွှတ်သူတို့၏ရာဇဝင်မှာ အခုလို ဖော်ပြထားပါတယ်။  “ဦးခင်မောင်မြင့်” ဒေးဒရဲမြို့ ဧရာဝတီတိုင်းတွင် မွေးဖွားသည်။ ၁၉၈၉ ခုနှစ် ဇွန်လတွင် ဖမ်းဆီးခြင်းခံရသည်။  ၁၉၉၃ ဖေဖော်ဝါရီ ၁၆ ရက်နေ့တွင် ကွယ်လွန်သည်။ ကွယ်လွန်ချိန်တွင် အသက် ၆၃ နှစ် ရှိပြီဖြစ်သည်။  နိုင်ငံရေးနောက်ခံ။ ။ ဦးခင်မောင်မြင့်သည် အသက် ၁၄ နှစ်အရွယ် ၁၉၄၅ ခုနှစ် ဖက်ဆစ်ဂျပန်တော်လှန်ရေး ကာလတွင် သခင်စိုးနှင့် ဗိုလ်နေဝင်းအကြား ဆက်သားအဖြစ် မြန်မာပြည်လွတ်လပ်ရေးအတွက် ကြိုးပမ်းခဲ့သူဖြစ်သည်။ ၁၉၅၃-၅၄ တွင် ဗမာနိုင်ငံလုံးဆိုင်ရာကျောင်းသားသမဂ္ဂများ အဖွဲ့ချုပ် (ဗကသ) အမှုဆောင်တဦးအဖြစ် ကျောင်းသားထု၏အရေး၊ စစ်မှန်သည့် ဒီမိုကရေစီပညာရေးအတွက် ရှေ့တန်းမှ ပါဝင်ခဲ့သည်။ အစဉ်အလာကြီးမားလှသည့် ကျောင်းသားသမဂ္ဂ ခေါင်းဆောင်များ၏ စာရင်းတွင် တဦးအပါအဝင် ဖြစ်ခဲ့သည်။ ၁၉၅၉ ခု ပြည်သူ့တိုးတက်ရေးပါတီ ပေါ်ထွန်းသည့်အခါ ဗဟိုကော်မတီဝင်၊ အတွင်း ရေးမှူး စသည့်တာဝန်များယူခဲ့သည်။ တိုးတက်သည့် နိုင်ငံရေးပါတီများစုစည်း၍ ပြည်ထောင်စုမြန်မာနိုင်ငံ အမျိုးသား ညီညွတ်ရေးတပ်ပေါင်းစု ပမညတ ဖွဲ့ရာတွင် သဘာပတိအဖွဲ့ဝင်အဖြစ် တာဝန်ထမ်းဆောင်ခဲ့သည်။  ပြည်တွင်းငြိမ်းချမ်းရေး ၆ ခရိုင် ဆန္ဒပြပွဲတွင် ပဲခူးစစ်ကြောင်းမှူးချုပ်အဖြစ် ပြည်တွင်းစစ်ရပ်စဲရေး၊ ပြည်တွင်းငြိမ်းချမ်းရေး အတွက် တက်ကြွသည့် အခန်းမှ ပါဝင်ခဲ့သည်။  ၁၉၆၅ ခုနှစ်တွင် တော်လှန်ရေးကောင်စီက အမျိုးသားစည်းလုံးညီညွတ်ရေးကို ကာကွယ်သည့်ဉပဒေ ထုတ်ပြန်ပြီး တပြည်လုံးရှိ နိုင်ငံရေးပါတီများ၊ သာရေးနာရေး အသင်းများ၊ စာရေးဆရာအသင်း စသည့် အသင်းအဖွဲ့အားလုံး ကို ဖျက်သိမ်းခဲ့သည်။ ဖျက်သိမ်းပြီးစီးကြောင်း အဖွဲ့အစည်းခေါင်းဆောင်များကိုယ်တိုင် လက်မှတ်ရေးထိုးစေပြီး အဖွဲ့၏ ဆိုင်း ဘုတ်၊ တံဆိပ်တုံး၊ အလံများပါမကျန် လာရောက်အပ်နှံကြ ရန် အမိန့်ထုတ်ခဲ့သည်။  “ပြည်သူ့တိုးတက်ရေးပါတီ”က ဖျက်သိမ်းကြောင်း ကြေညာခြင်း မပြုသဖြင့် ခေါင်းဆောင်အားလုံး အဖမ်းခံခဲ့ရသည်။ ၁၉၆၉ ခုနှစ်တွင် ကိုကိုးကျွန်းသို့ ပို့ဆောင်ခံခဲ့ရသည်။ ဦးခင်မောင်မြင့်သည် ကျွန်းဖျက်သိမ်းရေးတိုက်ပွဲဟု ထင်ရှားသည့် ကိုကိုးကျွန်း အကျဉ်းထောင်စံနစ်ဆန့်ကျင်ရေး ဆန္ဒပြပွဲတွင် ပါဝင်ခဲ့သည်။ ဦးနေဝင်း၏ မြန်မာ့ဆိုရှယ်လစ်လမ်းစဉ်ပါတီ အစိုးရကပေး သော နိုင်ငံဂုဏ်ရည်ဘွဲ့ကို ငြင်းဆိုခဲ့သည်။  ရှစ်လေးလုံးဒီမိုကရေစီ အရေးတော်ပုံကြီးတွင် ကျောင်းသားသမဂ္ဂအဖွဲ့ဝင်ဟောင်းကြီးများ အနေဖြင့် ပါဝင်ခဲ့သည်။ ၁၉၈၈ ခုနှစ် စက်တင်ဘာလ ၁၈ ရက်နေ့တွင် စစ်တပ်ကအာဏာသိမ်းပြီးနောက်ပိုင်း ပြည်သူ့တိုးတက်ရေးပါတီ ဖွဲ့စည်းသည့်အခါ ဥက္ကဋ္ဌအဖြစ် တာဝန်ယူကာ အထက်မြန်မာပြည်တဝန်းတွင် စစ်အာဏာရှင်ဆန့်ကျင်ရေး တရားများဟောခဲ့သည်။ ပါတီ ထောင်ပြီး ၇ လမျှအကြာ ၁၉၈၉ ခုနှစ် ဇွန်လတွင် အဖမ်းခံခဲ့ရသည်။ နိုဝင်ဘာလ ၆ ရက်နေ့တွင် တရားမဝင်အဖွဲ့အစည်း များနှင့် ဆက်သွယ်မှုဖြင့် ထောင် အနှစ် ၂၀ ချခံရသည်။  သေဆုံးပုံ။ ။ ဦးခင်မောင်မြင့်သည် ၁၉၉၁ ခုနှစ် နှစ်ကုန်ပိုင်းမှစ၍ ဝမ်းကိုက်ရောဂါ ရရှိခဲ့သည်။ ၁၉၉၂ ခုနှစ် ဩဂုတ်လတွင် အင်းစိန်ထောင် ဆေးရုံတွင် ဆေးကုသမှုခံယူသည်။ ဝမ်းကိုက်ရောဂါကို တနှစ်ကျော် ခံစားခဲ့ရပြီး ၁၉၉၃ ခု ဖေဖော်ဝါရီလ ၁၆ ရက်တွင် ထိုဝမ်းကိုက်ရောဂါဖြင့်ပင် အင်းစိန်ထောင်တွင်း သေဆုံးခဲ့ရသည်။  မှတ်ချက်။ ။ ဦးခင်မောင်မြင့်သည် အသက် ၁၄ နှစ်မှ ကွယ်လွန်ချိန်အထိ လွတ်လပ်ရေးကြိုးပမ်းမှုကာလ၊ ပါလီမန်ဒီမိုကရေစီ ကာလ၊ မဆလစစ်အာဏာရှင်ကာလ၊ နဝတစစ်အာဏာရှင်ကာလတလျောက်လုံး ပြည်သူလူထုအတွက် ကိုယ်ကျိုးစွန့် အနစ် နာခံ၍ ပြည်သူရှေ့မှ မားမားမတ်မတ်ရပ်ခါ တိုက်ပွဲဝင်သွားခဲ့သူဖြစ်သည်။ ထို့ကြောင့်လည်း စစ်အာဏာရှင်ခေတ် အဆက်ဆက် အကျဉ်းထောင်တို့တွင် အကြိမ်ကြိမ်အခါခါ ထိန်းသိမ်းခြင်း ခံခဲ့ရသည်။  ထောင်အရာရှိများ။ ။ ထောင်ပိုင်ကြီး (တာဝန်ခံအရာရှိ) ဦးဘိုကြည်    ထောင်တာဝန်ခံဆရာဝန် ဒေါက်တာစိုးကြည်                                            “ ဒီဆေးရုံမှာ ဒီနေရာကိုထွက်လာကြပြီး ဆေးကုကြတဲ့ ကိုစိန်ဝင်း၊ ကိုညိုဝင်း၊ ကိုစိုးဝင်း သူတို့အားလုံး သေသွားကြပြီ။ ထောင်ထဲကို ပြန်မသွားနိုင်ခဲ့ကြဘူး။ သိတယ် မဟုတ်လား . . .။  ငါ . . . ။ ခင်မောင်မြင့် . . . ဒီမှာ မသေဘူး . . .။ ထောင်ထဲကို ရောက်အောင်ပြန်ဝင်မယ် . . . ။ တခုပဲ မှာခဲ့မယ်။ ငါသေတဲ့အခါ ငါ့အလောင်းကို “ပြည်သူ့တိုးတက်ရေးပါတီ” အလံနဲ့ ဖုံးလွှမ်း ပေးပါ။ ငါ့အနေနဲ့ နောက်ဆုံးအချိန် သေတဲ့အထိ စစ်အာဏာရှင် အစိုးရကို ဆန့်ကျင်တိုက်ပွဲဝင်သွားမယ်ဆိုတဲ့ အဓိပ္ပာယ်ပါပဲ။ ပြောလိုက်ပါ။ အားလုံးကို ပြောပြလိုက်ပါ။”    ဦးခင်မောင်မြင့် (အင်းစိန်ဆေးရုံ ၁၉၉၃ ဖေဖော်ဝါရီ) “ဦးခင်မောင်မြင့်” ရဲရင့် နီမြ ၊ ဂုဏ်ပြောင်လှသည့် ဘဝ သန့်စင် ၊ အို - ကြယ်စင် - - ကြယ်စင်သည်ကား ၊ အမှောင်ကြား၌ မွေးဖွားလာရ ၊ ပေါ်ခဲ့ရလည်း ညအား ခွင်းဖေါက် တမိုးသောက်ရေး ၊ ဘဝပေးပြီး သွေးနှင့် ညွှန်ပြ ၊ အလင်းငှ ခဲ့ ကျ ရာ နေရာ - ရောက်ရာအရပ် ပဲ့တင်ထပ်အောင် ၊ အားမာန်ဆောင် ရင်း အမှောင်ကို ဖြို ၊ အမှောင်ဆို တိုက် အမိုက် တိမ်လွှာ ၊ တိမ်တကာ ကို ကျေညာ စစ်ဆင် ၊ ခရီး နှင် ခဲ့ ကြယ်စင် တာဝန်ကြေခဲ့ပါပေပြီ - - - မိုးမသောက်သေး ၊ ရောင်နီ ဝေးဆဲ သွေးနဲ့လိမ်းကျံ ၊ သည် ညယံ ၏ တေးသံ သုဉ်းဆိတ် ၊ အမှောင်ရိပ် ဝယ် မမှေးမှိတ်ချင် ၊ လင်းလိုက်ချင်လည်း ကြယ်စင် တပွင့် ၊ ဒဏ်ရာဆင့်ခဲ့ ရင်နင့်စရာ - ကြွေ ရ ပါ ပြီ ဘယ်ခါ ဖြေသိမ့် ၊ ရနိုင်ချိမ့် အံ့ မဆန့်ရင်မှာ ၊ ဝေဒနာ ဖြင့် ခါ ခါ ဂုဏ်ပြု ၊ အလေးပြု လိုက် ဦးညွှတ်လိုက်သည် သောင်းတိုက်ကမ္ဘာ တည်ပါစေ - - - ဪ - ကြယ်စင်တပွင့် ရင်နင့်စရာ ၊ ကြွေရ ရှာပြီ မဟာမြေပြင် ၊ ကမ္ဗည်းတင်လျက် ကြင်နာလှစွာ ၊ ထွေးပိုက်ပါလော့ - ဇာနည်သားကောင်း - သူရဲကောင်း၏ အလောင်းကိုယ်ပေါ် ၊ သွေးစက်ပေါ် ၌ စိုက်ထူ သိမ်းထုပ် ၊ အလံအုပ် ရင်း ကမ္ဘာချဉ်းတိုင် ၊ သူ့မှတ်တိုင်ကို ဆုပ်ကိုင် စံပြု ၊ အလေးပြုကြ ညကို ခွင်းဖေါက် ၊ ဆက်လက်လျှောက်ရင်း မပျောက် ကြယ်စင် ၊ မြတ် ဝိဉာဉ် ကို အစဉ် ထာဝရ ဂုဏ်ပြုကြပါ စို့ - အစဉ် ထာဝရ ဂုဏ်ပြုကြပါ စို့ - -            (ဝင်းတင့်ထွန်း) ၁၉၉၃ ရေးဖွဲ့သည်။ အေအေပီပီရဲ့ ၈ စက္ကန့်ငြိမ်စာအုပ်ပါ ဦးခင်မောင်မြင့် အကြောင်းနဲ့ တဆက်တည်းဖော်ပြထားတဲ့ ဆရာ ဝင်းတင့်ထွန်းရဲ့ ဂုဏ်ပြု ကဗျာပါ။ ဦးခင်မောင်မြင့်ဟာ ၁၉၉၀ ရွေးကောက်ပွဲမတိုင်ခင်ကာလ အဖမ်းမခံရခင်က ပြတ်သားတဲ့မိန့်ခွန်းတွေ ပြောခဲ့ပါတယ်။ ၁၉၈၉ ခုနှစ် မတ် ၁၃ ရန်ကုန်စက်မှုတက္ကသိုလ် မြက်ခင်းပြင်က ဖုန်းမော်အရေးအခင်း နှစ်ပတ်လည်မှာ ပြောတဲ့ သူ့မိန့်ခွန်းထဲက တချို့ကို ကောက်နုတ်ဖော်ပြပေး လိုက်ပါတယ်။    “ဟေ့ အာဏာရှင်တို့ သိပ်မကြောက်ကြပါနဲ့ ခင်ဗျားတို့ ဘယ်လိုပြေးပြေး မလွတ်ဘူး ကိုယ်နှိပ်စက်ခဲ့တဲ့ဒဏ် ကိုယ်ပြန်ခံကြရမယ်။ ။ ဦးခင်မောင်မြင့် ၁၃ - ၃ - ၁၉၈၉ “ပုဂ္ဂိုလ်ထူး ပုဂ္ဂိုလ်မြတ်တွေကို ကျွန်တော် ပြောချင်တယ်။ သမိုင်းမှာ ကျွန်တော် မှန်တယ်ထင်လို့ လုပ်ခဲ့တယ်။ ဒီအတွက် သူတို့က ကျွန်တော်တို့ကို ကျွန်းပို့တယ်။ ကျွန်တော်တို့ ခံခဲ့ရတယ်။ ခံရဲတယ်။ ခင်ဗျားတို့ (အစိုးရ) လဲ ပြည်သူတွေကို ဒီ လောက် နှိပ်စက်နေရင် လုပ်ခဲ့တဲ့ဒဏ်တော့ (ပြန်)ခံရမှာပဲ။ သိပ်မကြောက်ကြပါနဲ့။ ကိုရီးယားမှာ “ချန်ဒူးဝှမ်”ဟာ သူ့စိတ် ကြိုက် အစိုးရဖွဲ့ထားပြီးမှ လွတ်ရာလွတ်ကြောင်း ထွက်ပြေးတာတောင် မလွတ်ပါဘူး။ “ကိုယ်လုပ်ပြီးမှတော့ ကိုယ်ခံရဲရမှာ ပေါ့။” ဒါက အစိုးရကို ပြောချင်တာပါ။ ”             ဦးခင်မောင်မြင့် ၁၃ မတ် ၁၉၈၉ ဘုန်းမော်နေ့ တနှစ်မြောက်အခမ်းအနား ဦးခင်မောင်မြင့်ရဲ့ ဟောကိန်း မှန်လှပါတယ်။ အာဏာရှင် ဗိုလ်ချုပ်တွေ ဖြုတ်ထုတ် လုပ်ကြံ ခံခဲ့ကြရတာ အားလုံး အမြင်ပါ။ အားလုံးကို တာဝန်ယူကိုင်တွယ် ရက်စက်ခဲ့တဲ့ ဦးခင်ညွန့်နဲ့ အပေါင်းအပါတွေလဲ ဦးခင်မောင်မြင့်ရဲ့ ဟောကိန်းအတိုင်း ခံခဲ့ကြ ပြီးပါပြီ။ အာဏာရှင်ကြီး ဦးနေဝင်းလည်း မသေမီ ပြန်ခံသွားခဲ့ရပြီးပေါ့။ သူ့ဈာပနကိုတောင် လူမသိသူမသိ ဖုတ်ပူမီးတိုက် လုပ်သွားခဲ့ရပုံပါ။ အခုလည်း ပြည်သူလူထုကြီးရဲ့ဒဏ်ခတ်မှုကို ၂၀၂၀ ရွေးကောက်ပွဲမှာ အာဏာရှင်အုပ်စုတွေ ခံခဲ့ကြရပြီးတာ ပူပူနွေးနွေးပါ။ ဦးခင်မောင်မြင့်ရဲ့ ပြောကြားချက် မှန်ပေစွ။  “အပျိုကြီး လင်လိုချင် ဆတ်ကော့လပ်ကော့လုပ်ပြ။ ဒါမှ ရမယ်။ ပြည်သူတွေ ဒီမိုကရေစီလိုချင် ကိုယ်တိုင် ဆပ်ကော့လပ်ကော့လုပ်ပြ။ လိုချင်တဲ့အကြောင်း အသည်းအသန် ပြကြမှ ရမယ် ။ ။    ဦးခင်မောင်မြင့် ၁၃ - ၃ - ၁၉၈၉ ဦးခင်မောင်မြင့် မိန့်ခွန်းပြောရင် ပုံတိုပတ်စတွေနဲ့ ပြောတတ်တယ်။ ၁၃ မတ် ၁၉၈၉ ဘုန်းမော် တနှစ်မြောက် မိန့်ခွန်း အပိတ်မှာ သူက ဒီမိုကရေစီလိုချင်ရင် လိုချင်ကြောင်း ထင်ထင်ရှားရှား ပြကြဖို့ အခုလို ပြောခဲ့တယ်။ “အပျိုကြီးမအေးဟာ အသက်ကြီးနေပြီ။ အရွယ်ဟိုင်းပြီ။ ၃၅ -၄၀ ထဲ ရောက်နေပြီ။ တင့်တင့်တို့အရွယ် မဟုတ်တော့ဘူး။ ဒါပေမဲ့ သူ ယောက်ျားလိုချင်နေတယ်။ ဘုရားပေါ် ဗေဒင်ဆရာဆီသွားတယ်။ ဆရာက ဖယောင်းတိုင်ထွန်းခိုင်း၊ လာဘ်တင်ခိုင်းတယ်။ မအေးက အကုန်လုပ်ပေးတယ်။ ဗေဒင်ဆရာက (မအေး မပူနဲ့တော့ တန်ဆောင်မုန်းမှာ မောင်ဖုန်းလာလိမ့်မယ်)အိမ်ထောင်ကျမယ်လို့ ဟောလိုက်တယ်။ ဒါပေမဲ့ တန်ဆောင်မုန်းမက နတ်တော်ကျတဲ့ထိ လင်က မရဘူး။ ဒီတော့ ဘုရားပေါ် ဗေဒင်ဆရာကို ရန်သွားတွေ့တယ်။ ဗေဒင်ဆရာက ဘာပြန်ပြောတယ်ထင်လဲ။ (မအေး။ ခင်ဗျား အရွယ်ဟိုင်းနေပြီ။ ဒီတော့ ကာလသားတွေကြိုက်အောင် အရပ်ထဲမှာ ဆပ်ကော့လပ်ကော့လေး လျောက်ဦးမှပေါ့တဲ့။) ခုလဲပဲ ကျွန်တော်တို့ဟာ ဒီမိုကရေစီလိုချင်တယ်။ ဒီမိုကရေစီအစိုးရ လိုချင်တယ်။ ကျွန်တော်တို့ ကိုယ်တိုင် ဆပ်ကော့လပ်ကော့ လုပ်ရမယ်လို့ ပြောရင်း နိဂုံးချုပ်လိုက်ပါတယ်။”   ဦးခင်မောင်မြင့် မိန့်ခွန်း ၁၃ - ၃ - ၁၉၈၉ ဘုန်းမော် ၁ နှစ်ပြည့် ဦးခင်မောင်မြင့် ပြောကြားချက် မှန်ကန်လွန်းလှပါတယ်။ ၁၉၈၈ ခုနှစ် အရေးတော်ပုံကြီးကစပြီး ၁၉၉၀ ရွေးကောက်ပွဲ၊ ၂၀၀၇ ရွှေဝါရောင်တော်လှန်ရေး၊ ၂၀၁၂ ကြားဖြတ်ရွေးကောက်ပွဲ၊ ၂၀၁၅ နဲ့ ၂၀၂၀ ရွေးကောက်ပွဲတွေမှာ လူထုတရပ်လုံး ဆပ်ကော့ လပ်ကော့ လုပ်ပြခဲ့ကြပြီးပြီပေါ့။ ဒီမိုကရေစီသာလိုတယ်။ အာဏာရှင် လုံးဝ မလိုပါကြောင်း ပြတ်ပြတ်သားသား ပြလိုက်ကြ ပါပြီ။ ပြည်သူတွေ ဘာလုပ်ကရမလဲ ဆိုတာကို ကြိုပြော ကြိုမြင်ခဲ့သူ ဦးခင်မောင်မြင့်ပါ။  ပြည်သူ့တိုးတက်ရေးပါတီ ဥက္ကဌ ဦးခင်မောင်မြင့် အကြောင်း၊ သူ့သမိုင်း သူ့ရာဇဝင်ရဲ့ တစ နှစ်စ ဖော်ပြလိုက်တာပါ။ ဟံသာဝတီ သတင်းစာဆရာကြီး ဦးဝင်းတင်ကတောင် “ဦးခင်မောင်မြင်ဟာ နိုင်ငံရေးသမား၊ ကျနော်က အာဂန္တု” လို့ ချီးမွမ်းခဲ့ဘူးသူပါ။ သူ့လိုလူ သူ့လို ပုဂ္ဂိုလ်အကြောင်း ရေးဖွဲ့မယ်ဆိုရင် ပေတဖွဲ့ ကျမ်းတဆောင် ကုန်နိုင်ဖွယ်မရှိပါပြီ။ ရေးစရာ နောက်ထပ်အများကြီး ကျန်ပါသေးတယ်။ ဦးခင်မောင်မြင့်ကို အာဏာရှင် ဦးနေဝင်းက သူကောင်းပြုပေးမဲ့ အခွင့်အရေးကို လက်မခံ ခဲ့တာတွေ၊ ထောင်ထဲမှာ ဆိုးလှတဲ့ ထောင်ဝါဒါတွေကို သူက ပါးရိုက် ဆုံးမခဲ့တာတွေ၊ ကိုကိုကျွန်းမှာ စစ်ဗိုလ်တွေကို ပြတ်ပြတ်သားသား ဆက်ဆံခဲ့တာတွေ၊ နောက်ဆုံး ထောင်ဆေးရုံမှာ စစ်အစိုးရကို ထောက်ခံရင် ကောင်းကောင်း ဆေးကုပေး မယ်လို့ အာဏာပိုင်တွေက ညှိခဲ့တာကိုတောင် သူက အသက်နဲ့ ရပ်တည်ချက် လဲမသွားခဲ့တာတွေ များလှသောင်းသောင်းပါ။    အရေးတော်ပုံကြီးရဲ့ အဆုံးသတ်အောင်ပွဲကိုရဖို့ ကျွန်တော်တို့ တော်တော်လုပ်ရလိမ့်ဦးမယ်။ ဒီပွဲမှာ ကျနော် အသက်ပေးရလိမ့်မယ်။ ပေးဖို့လည်း ဆုံးဖြတ်ထားပြီးပါပြီ။ ။ (ဦးခင်မောင်မြင့်) ဦးခင်မောင်မြင့်ဟာ အသက်ပေးပြီး ဒီမိုကရေစီတော်လှန်ရေးကို ဦးဆောင်သွားခဲ့တာပါ။ ဒီဇင်ဘာ ၁၁ ရက်ဟာ သူ့ရဲ့ ၉၁ နှစ် မွေးနေ့ပါ။ သူ့ရဲ့မွေးနေ့ရက်မှာ သူ့ဂုဏ် သူ့သိန် သူ့အရှိန်အဝါတွေကို အောက်မေ့ရင်းက သူမျှော်မှန်းတဲ့ စစ််််အာဏာရှင် ဆန့်ကျင်ရေး၊ မပြီးသေးသော်လည်း ခရီးမဝေးတော့တဲ့ ဒီမိုကရေစီ တိုက်ပွဲမှာ ကျွန်တော်တို့ ဆပ်ကော့လပ်ကော့ လုပ်ကြပါစို့။ “ဦးခင်မောင်မြင့်ကို အစဉ်ထာဝရဂုဏ်ပြုကြပါစို့”  “ဦးခင်မောင်မြင့်ကို အစဉ်ထာဝရဂုဏ်ပြုကြပါစို့”  “ဦးခင်မောင်မြင့်ကို အစဉ်ထာဝရဂုဏ်ပြုကြပါစို့”   မောင်တူး

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up