မဲပေးရန် တန်းစီနေကြသည့် တောင်ဥက္ကလာပမြို့နယ်က မဲဆန္ဒရှင်များ (ဓာတ်ပုံ)
စိုးမိုးအောင်
·
November 8, 2020
၂၀၂၀ ရွေးကောက်ပွဲအတွက် တောင်ဥက္ကလာပမြို့နယ်က မဲရုံတချို့မှာ ဒီနေ့မနက်ပိုင်း မဲတင်ပေးနေပြီး လူဦးရေ ရာနဲ့ချီပြီး မဲပေးဖို့ လာရောက် တန်းစီနေကြပါတယ်။
တောင်ဥက္ကလာပမြို့နယ်က မဲရုံတချို့မှာ မဲပေးချိန်မတိုင်မီ မနက် ၅ နာရီလောက်ကတည်းက မဲဆန္ဒပေးမဲ့ပြည်သူတချို့ မဲရုံတွေဆီရောက်ရှိနေပါတယ်။
ရန်ကုန်တိုင်းဟာ ကိုဗစ်-၁၉ ရေ ရောဂါကူးစက်မှု မြင့်မားနေတဲ့ တိုင်းဒေသကြီးတခုဖြစ်တာကြောင့် လူရှင်းမယ့်အချိန် မနက် ၅ နာရီလောက်ကတည်းက မဲပေးဖို့ လာရောက်တန်းစီနေတာလို့ မဲဆန္ဒရှင်တဦးက ပြောပါတယ်။
မဲရုံတွေဆီ မဲလာထည့်တဲ့ ပြည်သူတွေကို မဲရုံဝန်ထမ်းတွေက Mask ဝေတာနဲ့ Face Shied ပေးတာတွေ လုပ်နေသလို လူချင်းခပ်ခွာခွာတန်းစီခိုင်းတာနဲ့ လက်ဆေးဟန်းဂျယ်တွေ အဆင့်သင့်ပြင်ဆင်ထားတာ ရှိပါတယ်။
တောင်ဥက္ကလာပမြို့နယ်မှာ မဲပေးခွင့်ရှိသူပေါင်း ၁ သိန်း ၃ သောင်းကျော်ရှိပြီး မသန်စွမ်းက ၃၀၀ ကျော်ရှိပါတယ်။ ပထမဆုံးမဲဆန္ဒပေးမယ့်သူ ၁၄၀၀၀ ကျော်၊ အသက် ၆၀ နဲ့အထက်အ အဘိုးအဘွား ၂၃၀၀၀ ကျော်ရှိပါတယ်။ မဲရုံပေါင်းကတော့ ၁၂၄ ရုံ၊ မဲရုံဝန်ထမ်း ၁၉၀၀ ကျော်ရှိတယ်လို့ သိရပါတယ်။
