မကွေးတိုင်းတွင် ကိုဗစ်-၁၉ လူနာသစ် ၅၂ ဦး ထပ်မံတွေ့ရှိ
DVB
·
October 28, 2020
မကွေးတိုင်းမှာ အောက်တိုဘာလ ၂၈ ရက်နေ့ မနက်ပိုင်းက ကိုဗစ်-၁၉ အတည်ပြုလူနာသစ် ၅၂ ဦး တွေ့ရှိခဲ့တယ်လို့ တိုင်းဒေသကြီးပြည်သူ့ ကျန်းမာရေးဦးစီးဌာနကနေ သိရပါတယ်။
မင်းဘူးမြို့နယ်က ၂၄ ဦး၊ မြို့သစ်မြို့နယ် ၁၀ ဦး၊ တောင်တွင်းကြီးမြို့နယ် ၉ ဦး၊ အောင်လံမြို့နယ် ၄ ဦး၊ မကွေးမြို့နယ် ၂ ဦး၊ စလင်းမြို့နယ် ၁ ဦး၊ နတ်မောက်မြို့နယ် ၁ ဦးနဲ့ သရက်မြို့နယ်က ၁ ဦး ကိုဗစ်-၁၉ ရောဂါပိုးတွေ့ရှိခဲ့တယ်လို့ တိုင်းပြည်သူ့ကျန်းမာရေး ဦးစီးဌာန လက်ထောက်ညွှန်ကြားရေးမှူး ဒေါက်တာခင်မောင်သန်းက ပြောပါတယ်။
လူနာအများစုဟာ ရန်ကုန်တိုင်းဒေသကြီးက ပြန်လာတာဖြစ်ပြီး အသွားအလာကန်သတ်ကာ ဓာတ်ခွဲနမူနာပေးပို့စစ်ဆေးခဲ့ရာမှ ကိုဗစ်-၁၉ ရောဂါပိုးတွေ့ရှိခဲ့တာလို့ ဆိုပါတယ်။
လူနာတွေကို သက်ဆိုင်တဲ့ မြို့နယ်အလိုက် ကုသပေးမှာဖြစ်ပြီး ထိစပ်ခဲ့တဲ့သူတွေကိုတော့ စုံစမ်းဖော်ထုတ် အသွားလာကန့်သတ်ပြီး ဓာတ်ခွဲနမူနာ ပေးပို့စစ်ဆေးမယ်လို့ ဒေါက်တာ ခင်မောင်သန်းက ပြောပါတယ်။
မကွေးတိုင်းမှာ လက်ရှိအချိန်ထိ ကိုဗစ်-၁၉ အတည်ပြုလူနာ ၆၂၄ ဦးရှိပြီး ကျန်းမာရေးကောင်းမွန်ကာ ဆေးရုံကနေဆင်းခွင့်ရရှိသူ ၂၉၃ ဦးရှိတယ်လို့ တိုင်းဒေသကြီးပြည်သူ့ကျန်းမာရေး ဦးစီးဌာနကနေ သိရပါတယ်။
သတင်း - မင်းထီး
