ကွမ်းခြံကုန်းမြို့နယ်၌ လေပြင်းတိုက်၊ လှိုင်းရိုက်ခတ်ပြီး လူနေအိမ်အချို့ ပြိုကျပျက်စီး
1.2K
ရန်ကုန်တိုင်းဒေသကြီး၊ ကွမ်းခြံကုန်းမြို့နယ်၊ တော်ခလူးကျေးရွာမှာ အောက်တိုဘာ ၁၉ ရက်ညက လေပြင်းတိုက်ပြီး လှိုင်းရိုက်ခတ်မှုကြောင့် လူနေအိမ် ၄ လုံးပြိုကျပြီး ၂၇ လုံး ပျက်စီးခဲ့ကာ လူ ၁၀၀ ကျော် လေဘေးဒုက္ခရောက်ခဲ့ပါတယ်။
ပြိုကျပြီး နေထိုင်လို့မရတဲ့ အိမ်ထောင်စု ၅ စုကို နီးစပ်ရာဆွေမျိုးအိမ်တွေကို ပြောင်းရွေ့ ထားပြီး လတ်တလော မြို့နယ်ကြက်ခြေနီက အိမ်ထောင်စုတစ်စုကို စောင်တစ်ထည်နဲ့ ခြင်ထောင် နှစ်ထည် ထောက်ပံ့ပေးထားပါတယ်။
“မြေသားကပျော့နေပြီး လှိုင်းထပ်ရိုက်ရင် အလုံးလိုက်ပြိုကျနိုင်တဲ့ အနေအထားမို့ မပြောင်း ရွှေ့သေးတဲ့ ကျန်အိမ်ထောင်စုတွေအတွက် အန္တရာယ်ရှိနေတယ်”လို့ မြို့နယ်ကြက်ခြေနီတပ်ဖွဲ့၊ တာဝန်ရှိသူက ပြောပါတယ်။
ပျက်စီးခဲ့တဲ့နေရာတွေကို မြို့နယ်ကြက်ခြေနီ၊ We Love Kungyangon အဖွဲ့ဝင်တွေနဲ့အတူ တိုင်းလွှတ်တော်ကိုယ်စားလှယ်လည်း လာရောက်ကြည့်ရှုခဲ့ပါတယ်။
ဒါ့အပြင် ပြောင်းရွှေ့ထားတဲ့ အိမ်ထောင်စုတွေမှာ စားသောက်ရေးအခက်အခဲရှိတဲ့အတွက် We Love Yangon နဲ့ ချိတ်ဆက်ပြီး ထောက်ပံ့ဖို့ စီစဉ်နေတယ်လို့လည်း We Love Kungyangon တာဝန်ရှိသူကပြောပါတယ်။
တော်ခလူးကျေးရွာက ရန်ကုန်မြစ်ဝထိပ် ပင်လယ်ဘေးမှာရှိပြီး ဒေသခံအများစုက ရေလုပ်ငန်းလုပ်ကိုင်ကြပါတယ်။
သတင်း - လွင်မိုးအောင်၊ ဓာတ်ပုံ - WeLoveKungyangon
