၃ ဂိုးသွင်းပြီး ၃ ဂိုးပြန်ပေးခဲ့ရသဖြင့် စပါးကစားသမားများ စိတ်ပျက်နေဟု ဆွန်ဟောင်မင်ဝန်ခံ (ရုပ်သံဟိုက်လိုက်)

ဝက်စ်ဟမ်းအသင်းကို ၃ ဂိုးပြတ်နဲ့ ဦးဆောင်ထားနိုင်တာကနေ ချေပဂိုး ၃ ဂိုးပြန်ပေးခဲ့ရတဲ့အပေါ် စပါးကစားသမားတွေ အကြီးအကျယ်စိတ်ပျက်နေကြတယ်လို့ တိုက်စစ်မှူး ဆွန်ဟောင်မင်က ပြောပါတယ်။  ဆွန်ဟာ စပါးအသင်းအတွက် ဦးဆောင်ဂိုးကို ပွဲအစမှာကတည်းက သွင်းယူပေးနိုင်ခဲ့သူဖြစ်ပါတယ်။  အဲ့ဒီနောက်မှာတော့ အသင်းခေါင်းဆောင်ဟယ်ရီကိန်းက စပါးအသင်းအတွက် အနိုင်ဂိုး ၂ ဂိုးကို ဆက်လက်သွင်းယူခဲ့ပြီး ပွဲချိန် ၁၆ မိနစ်မှာကတည်းက ဝက်စ်ဟမ်းအသင်းကို ၃ ဂိုးပြတ်နဲ့ဦးဆောင်နိုင်ခဲ့တာဖြစ်ပါတယ်။  ဒါပေမယ့် ဒုတိယပိုင်းမှာ ဝက်စ်ဟမ်းအသင်းက ချေပဂိုးရရှိဖို့ အပြင်းအထန်ကြိုးစားခဲ့ပါတယ်။ ဖေဘီယန် ဘယ်လ်ဘူနာက ဧည့်သည်အသင်းအတွက် ပထမချေပဂိုးကို ခေါင်းတိုင်သွင်းယူပေးခဲ့ပြီး စပါး နောက်ခံလူ ဒေဗီဆင်ဆန်းချက်ဇ်ရဲ့ ကိုယ့်ဂိုးကိုယ်သွင်းယူခဲ့မိမှုကလည်း ဝက်စ်ဟမ်းအသင်းအတွက် ဒုတိယဂိုး ဖြစ်စေခဲ့ပါတယ်။  အဲ့ဒီနောက် ပွဲပြီးခါနီးနောက်ဆုံးမိနစ်မှာ ပြစ်ဒဏ်ဘောကနေ ပြန်ထွက်လာတဲ့ ဘောလုံးကို ဝက်စ်ဟမ်းကွင်းလယ်လူ လန်ဇီနီက အဝေးကနေ လှလှပပကန်သွင်းအဆုံးသတ်ခဲ့ပြီး ဝက်စ်ဟမ်းအတွက် လိုအပ်နေတဲ့ ချေပဂိုးကိုရယူကာ စပါးအသင်းထံကနေ ၁ ရရှိခဲ့ပါတယ်။  ဆွန်ကတော့ စပါးအသင်းသားတွေဟာ ဒီပွဲကိုအနိုင်ရရှိပြီလို့ တွေးထားတာကြောင့် ပွဲအပြီး ခရာမှုတ်ချိန်မှာ အကြီးအကျယ်စိတ်ထိခိုက်ခဲ့ရတယ်လို့ ပြောပါတယ်။ “ဒီရလဒ်ကြောင့် ကျန်နော်တို့တွေ စိတ်ပျက်ခဲ့ရပါတယ်။ ကျနော်တို့ဟာ အနိုင် ၃ မှတ်နဲ့ ထိုက်တန်ခဲ့ပါတယ်။ ပွဲပြီးခါနီး ၁၀ မိနစ်မတိုင်ခင်အထိ ကျနော်တို့ အရမ်းကောင်းအောင်ကစားနိုင်ခဲ့တာပါ။ ဒီရလဒ်ဟာ တကယ့်ကိုအံ့သြစရာပါပဲ။ ဒီလိုမျိုးဆိုတာ လုံးဝမဖြစ်သင့်ပေမယ့် ဒါဟာ ဘောလုံးပွဲတွေရဲ့အစိတ်အပိုင်းတစ်ခုပါ။ ကျနော်တို့အနေနဲ့ နောက်ဆုံးပွဲသိမ်းခရာအထိ အာရုံစိုက်ဖို့လိုအပ်ပါတယ်။ ကျနော်ဒါမျိုးထပ်မကြုံချင်တော့ပါဘူး။ ဒါဟာ ကျနော်တို့အတွက် နောက်ဘယ်တော့မှ ထပ်ဖြစ်လို့မရတဲ့ အကောင်းဆုံး သင်ခန်းစာပါပဲ” လို့ ဆွန်က Sky Sports သတင်းကိုပြောပါတယ်။  ဒီရလဒ်ဟာ သရေ ၁ မှတ်ရတာထက်ပိုပြီး ဆိုးရွားခဲ့တယ်လို့ တောင်ကိုရီးယားတိုက်စစ်မှူးက ဝန်ခံခဲ့ကာ အသင်းဖော်တွေအနေနဲ့ ဒါကိုသင်ခန်းစာယူနိုင်လိမ့်မယ် မျှော်လင့်တယ်လို့ ပြောခဲ့ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up