မကွေးတိုင်းတွင် ရန်ကုန်မှ ပြန်လာသူ ၃ ဦး ကိုဗစ်-၁၉ ရောဂါကူးစက်ခံရ

မကွေးတိုင်းဒေသကြီးအတွင်း  ၃ မြို့နယ်က ရန်ကုန်ပြန် အမျိုးသား ၁ ဦးနဲ့ အမျိုးသမီး ၂ ဦးမှာ စက်တင်ဘာ ၂၈ ရက်နေ့ ညပိုင်းက ကိုဗစ်-၁၉ ရောဂါပိုး တွေ့ရှိခဲ့တယ်လို့ တိုင်းဒေသကြီး ပြည်သူ့ကျန်းမာရေးဦးစီးဌာနကနေ သိရပါတယ်။

ရေနံချောင်းမြို့နယ်က အသက် ၂၀ နှစ် အမျိုးသမီး ၁ ဦး၊ မြို့သစ် မြို့နယ်က အသက် ၃၁ နှစ်အရွယ်အမျိုးသမီး ၁ ဦးနဲ့ မင်းလှမြို့နယ်က အသက် ၂၆ နှစ်အရွယ် အမျိုးသားတစ်ဦးဟာ ရန်ကုန်က ပြန်လာတာဖြစ်ပြီး ဓာတ်ခွဲနမူနာပေးပို့ စစ်ဆေးရာမှာ ကိုဗစ်-၁၉ ရောဂါပိုးတွေ့ရှိခဲ့တာလို့  မကွေးတိုင်း ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာခင်မောင်သန်းက ပြောပါတယ်။

“ရေနံချောင်းမြို့နယ်က လူနာကတော့ မြို့နယ်ဆေးရုံမှာ ရောက်ပြီးသားမို့ အဲဒီဆေးရုံမှာပဲ သီးခြားကုသမှာဖြစ်ပြီးတော့ မင်းလှမြို့နယ်နဲ့ မြို့သစ်မြို့နယ်က လူနာတွေကိုတော့ မကွေးတိုင်း ဆေးရုံကြီးမှာကုသပေးမှာဖြစ်တယ်။ ဒါ့အပြင်လူနာတွေနဲ့ ထိစပ်ခဲ့သူတွေကို စုံစမ်းဖော်ထုတ်ပြီး နှာခေါင်းတို့ဖတ် အာခေါင်တို့ဖတ်တွေရာယူကာ ဓာတ်ခွဲနမူနာပေးပိုး စစ်ဆေးတာတွေ လုပ်မယ်လို့”ပြောပါတယ်။

မကွေးတိုင်းမှာ လက်ရှိအချိန်ထိ ကိုဗစ်-၁၉ အတည်ပြုလူနာ ၃၇ ဦးတွေ့ရှိထားပြီး ဒီကနေ့ ကျန်းမာရေးကောင်းမွန်လို့ မကွေးမြိုနယ်ထဲက ဆေးရုံဆင်းခွင့်ရသူ ၇ ဦး အပါအဝင် စုစုပေါင်း ၂၁ ဦး ဆေးရုံဆင်းခွင့်ရထားတယ်လို့ တိုင်းဒေသကြီး ပြည်သူ့ကျန်းမာရေး ဦးစီးဌာနကနေ သိရပါတယ်။

သတင်း-မင်းထီး