ဂျပန်ရောက် မြန်မာများ အောက်တိုဘာ ၃ ရက်နေ့ ကြိုတင်မဲ စပေးရမည်
ဇော်ဇော်လှိုင်
·
September 23, 2020
၂၀၂၀ အထွေထွေရွေးကောက်ပွဲအတွက် ဂျပန်နိုင်ငံမှာ ရောက်ရှိနေတဲ့ မဲဆန္ဒပေးပိုင်ခွင့်ရှိသူ မြန်မာနိုင်ငံသားတွေအနေနဲ့ တိုကျိုမြို့ရှိ မြန်မာနိုင်ငံသံရုံးမှာ အောက်တိုဘာ ၃ ရက်ကစပြီး ကြိုတင်မဲဆန္ဒပေးနိုင်တယ်လို့ တိုကျိုမြန်မာသံရုံးက ဒီနေ့ထုတ်ပြန်ကြေညာလိုက်ပါတယ်။
ဂျပန်နိုင်ငံရောက်မြန်မာနိုင်ငံသားတွေအနေနဲ့ ဂျပန်နိုင်ငံ နေရာအနှံ့အပြားမှာ ရောက်ရှိနေကြတာဖြစ်လို့ တိုကျိုမြို့တော်နဲ့ ကန်တိုဒေသနေထိုင်သူတွေကို အောက်တိုဘာ ၃ ရက်မှ ၉ ရက်အထိနဲ့ ကျန်တဲ့ပြည်နယ်မှာ နေထိုင်သူတွေအနေနဲ့ အောက်တိုဘာ ၁၀ ရက်မှ ၁၄ ရက်အထိ မနက် ၉ နာရီကနေ ညနေ ၅ နာရီအထိ မဲလာရောက်ပေးနိုင်တယ်လို့ ကြေညာထားပါတယ်။
ဒါအပြင်၊ မြန်မာနိုင်ငံသားတွေ ဒုတိယအများဆုံး နေထိုင်တဲ့ Tokai တိုးခိုင်းဒေသရှိ မြန်မာနိုင်ငံသား မဲဆန္ဒရှင်တွေအတွက် မဲရုံခွဲကို နဂိုယာမြို့ရှိ မြန်မာနိုင်ငံဆိုင်ရာ ဂုဏ်ထူးဆောင်ကောင်စစ်ဝန်ရုံးမှာ ဖွင့်လှစ်မှာဖြစ်ပြီး ကြိုတင်မဲပေးရမယ့် နေ့ရက်မှာ အောက်တိုဘာ ၄ ရက် မှ ၅ ရက်အထိဖြစ်တယ်လို့ ဆိုထားပါတယ်။
၂၀၂၀ အထွေထွေရွေးကောက်ပွဲအတွက် ဂျပန်နိုင်ငံရောက် မြန်မာနိုင်ငံသား လုပ်အားပေး လူငယ်တွေနဲ့ တိုကျိုမြို့မြန်မာသံရုံးက တာဝန်ရှိဝန်ထမ်းတွေ ပူးပေါင်းကောက်ယူခဲ့ကြပြီး ကြိုတင်မဲ ပေးခွင့်တောင်းခံသည့် ပုံစံ(၁၅)လျှောက်ထားသူ ၈၀၀၀ လောက် ရှိကာ ပြည်ထောင်စု ရွေးကောက်ပွဲကော်မရှင်ထံ အချိန်မီ ပေးပို့ထားတယ်လို့လည်း သိရပါတယ်။
