Homeမြန်မာသတင်း
မြန်မာတွင် ကိုဗစ်-၁၉ ရောဂါဖြင့် သေဆုံးသူ ၁၁ ဦးထပ်တိုး၊ စုစုပေါင်းသေဆုံးသူ ၅၇ ဦး ရှိလာ
မြန်မာတွင် ကိုဗစ်-၁၉ ရောဂါဖြင့် သေဆုံးသူ ၁၁ ဦးထပ်တိုး၊ စုစုပေါင်းသေဆုံးသူ ၅၇ ဦး ရှိလာ
DVB
·
September 17, 2020
အသက် ၈၀ အရွယ်အမျိုးသမီး ၁ ဦးအပါအဝင် သေဆုံးသူ ၁၁ ဦးထပ်တိုးလာပြီး မြန်မာနိုင်ငံမှာ ကိုဗစ် -၁၉ ရောဂါနဲ့ သေဆုံးသူပေါင်း ၅၇ ဦးအထိရှိလာပြီလို့ ကျန်းမာရေးနဲ့ အားကစားဝန်ကြီးဌာနက ဒီကနေ့ မွန်းလွဲ ၃ နာရီက ထုတ်ပြန်ပါတယ်။
သေဆုံးသူ ၁၁ ဦးကတော့ ရန်ကုန်ပြည်သူ့ဆေးရုံကြီးက အသက် ၂၄ နှစ်အရွယ် အမျိုးသား ၁ ဦးအပါအဝင် ၆၀ ကျော် အမျိုးသား ၄ ဦး၊ သင်္ဃန်းကျွန်းစံပြဆေးရုံကြီးက အသက် ၆၄ နှစ်အရွယ် အမျိုးသမီး ၁ ဦး၊ တောင်ဥက္ကလာအထူးကုဆေးရုံက အသက် ၅၂ နှစ်အရွယ် အမျိုးသား ၁ ဦးနဲ့ အသက် ၆၇ နှစ်အရွယ်အမျိုးသမီး ၁ ဦး၊ ရန်ကုန်အရှေ့ပိုင်းဆေးရုံက အသက် ၆၀ အရွယ် အမျိုးသမီး ၁ ဦးနဲ့ အသက် ၅၈ နှစ်အရွယ် အမျိုးသား ၁ ဦး ၊ မန္တလေးပြည်သူဆေးရုံကြီးက အသက် ၈၀ အရွယ် အမျိုးသမီး ၁ ဦး တို့ ဖြစ်ပါတယ်။
ဒါအပြင် စက်တင်ဘာ ၁၆ ရက်နေ့အတွက် အမှတ် ၂ တပ်မတော်ဆေးရုံကြီး ကုတင် ၁၀၀၀ က ဒုတိယသုတ်အဖြစ် ဓာတ်ခွဲနမူနာ ၂၈၂ ခုအား စစ်ဆေးရာမှာ လူနာသစ် ၁ ဦးထပ်မံ ထပ်မံတွေ့ရှိပြီး ကိုဗစ်-၁၉ အတည်ပြုလူနာ ၃,၈၉၅ ဦးရှိသွားပြီလို့လည်း သိရပါတယ်။
ပြီးခဲ့တဲ့ ၂၀၁၉ ခုနှစ်ကုန်ပိုင်းမှာ တရုတ်နိုင်ငံအလယ်ပိုင်း ဝူဟန်မြို့က စတင်ခဲ့တဲ့ ကိုဗစ်-၁၉ ရောဂါ ကူးစက်ပျံ့နှံ့မှုဟာ လတ်တလောအချိန်ထိ တရိပ်ရိပ် မြင့်တက်နေဆဲ ဖြစ်ပါတယ်။
ကိုဗစ်-၁၉ ဒုတိယလှိုင်းကာလ ကူးစက်မှုတွေ မြင့်တက်နေတဲ့ မြန်မာနိုင်ငံမှာတော့ ပထမဆုံးသော ကိုဗစ်-၁၉ အတည်ပြုလူနာကို ပြီးခဲ့တဲ့ မတ်လ ၂၃ ရက်နေ့ မှာ စတင်တွေ့ရှိခဲ့ပါတယ်။
ပြီးခဲ့တဲ့လက ရခိုင်ပြည်နယ်က တကျော့ပြန်ကူး စက်မှုတွေရှိလာခဲ့အပြီးမှာတော့ ရောဂါကူးစက်ခံရ သူအရေအတွက်ဟာ သိသိသာသာ မြင့်တက်လာခဲ့ပြီး သေဆုံးသူအရေ အတွက်လည်း မြင့်တက်နေခဲ့တာ ဖြစ်ပါတယ်။