၁၃ နှစ်အရွယ် ကလေး ၁ ဦးအပါအဝင် လူနာ ၆ ဦး ထပ်မံသေဆုံး၊ ကိုဗစ်လူနာသစ် ၇၃ ဦး တွေ့ရှိ
DVB
·
September 17, 2020
ဓာတ်ခွဲနမူနာ ၂,၅၉၉ ခုအား ဒုတိယသုတ်အဖြစ် စစ်ဆေးချက်အရ ကိုဗစ်-၁၉ အတည်ပြုလူနာသစ် ၇၃ ဦး ထပ်မံတွေ့ရှိပြီး ဆေးကုသမှုခံယူနေတဲ့ လူနာတွေထဲက အသက် ၁၃ နှစ်အရွယ် ကလေး ၁ ဦး အပါအဝင် ၆ ဦး ထပ်မံသေဆုံးတာကြောင့် စုစုပေါင်း သေဆုံးသူ ၄၆ ဦး ရှိပြီလို့ ကျန်းမာရေးနဲ့ အားကစားဝန်ကြီးဌာနက ဒီနေ့မနက် ၈ နာရီ ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်)က ၁,၀၅၁ ခု၊ ဆေးသုတေသနဦးစီးဌာက ၉၄ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မန္တလေး) က ၃၉၁ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မော်လမြိုင်) က ၁၃၂ ခု၊ ပုသိမ်မြို့ ပြည်သူ့ဆေးရုံကြီးက ၁၅ ခု၊ နေပြည်တော် ပြည်သူ့ဆေးရုံကြီး ခုတင် ၁၀၀၀ က ၄၁ ခု၊ အမှတ် ၁ တပ်မတော်ဆေးရုံကြီး ခုတင်-၁၀၀၀ က ၆၀၀ ခုနဲ့ အမှတ် ၂ တပ်မတော်ဆေးရုံကြီး ခုတင်-၁၀၀၀ က ၂၇၅ ခု၊ စုစုပေါင်း ဓာတ်ခွဲနမူနာ ၂,၅၉၉ ခုတို့အား ထပ်မံ စစ်ဆေးပြီးစီးခဲ့ရာ ကိုဗစ်-၁၉ အတည်ပြုလူနာသစ် ၇၃ ဦးတွေ့ရှိခဲ့တာပါ။
သင်္ဃန်းကျွန်းပြည်သူ့ဆေးရုံကြီးမှာ ကုသနေတဲ့ ၈၄ နှစ်အရွယ် အဆုတ်တီဘီရောဂါဖြစ်ဖူးခြင်းနဲ့ သွေးတိုးရောဂါအခံရှိသူ အမျိုးသား (Case-3599) ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူလမ်းကြောင်းပျက်စီးပြီး စက်တင်ဘာ ၁၄ ရက်နေ့ ည ၇:၂၆ နာရီအချိန်က သေဆုံးသွားပါတယ်။
ရန်ကုန်ပြည်သူ့ဆေးရုံကြီးမှာ တက်ရောက်ကုသမှုခံယူနေတဲ့ ၅၈ နှစ်အရွယ်အမျိုးသား (Case-3370) ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူလမ်းကြောင်း ပျက်စီးခြင်းပြီး စက်တင်ဘာ ၁၄ ရက်နေ့ ည ၇:၃၀ နာရီ အချိန်မှာ သေဆုံးသွားပါတယ်။
အင်းစိန်ပြည်သူ့ဆေးရုံကြီးမှာ တက်ရောက်ကုသမှုခံယူနေတဲ့ ၆၅ နှစ်အရွယ် အဆုတ်တီဘီရောဂါဖြစ်ဖူးခြင်းနဲ့ ဆီးချိုရောဂါအခံရှိသူ အမျိုးသား (Case-3540) ဟာ ပြင်းထန်အဆုတ်ရောင် ရောဂါကြောင့် ရုတ်တရက်အသက်ရှူလမ်းကြောင်းပျက်စီးပြီး စက်တင်ဘာ ၁၄ ရက်နေ့ ညနေ ၃ နာရီအချိန်မှာ သေဆုံးသွားပါတယ်။
သင်္ဃန်းကျွန်းပြည်သူ့ဆေးရုံကြီးမှာ တက်ရောက်ကုသမှုခံယူနေတဲ့ အသက် ၉၀ အရွယ် နှလုံးသွေးကြောကျဉ်းရောဂါအခံရှိပြီး လေဖြတ်ထားဖူးသူ အမျိုးသား (Case-2911) ဟာ ပြင်းထန်အဆုတ်ရောင် ရောဂါကြောင့် ရုတ်တရက်အသက်ရှူလမ်းကြောင်းပျက်စီးပြီး စက်တင်ဘာ ၁၃ ရက်နေ့ မနက် ၉:၂၀ နာရီအချိန်မှာ သေဆုံးသွားပါတယ်။
မြောက်ဥက္ကလာပပြည်သူ့ဆေးရုံကြီးမှာ တက်ရောက်ကုသမှုခံယူနေတဲ့ ၇၅ နှစ်အရွယ် နှလုံး၊ နာတာရှည်ကျောက်ကပ်နဲ့ ဆီးချို ရောဂါတို့ အခံရှိသူ အမျိုးသမီး (Case-3361) ဟာ ပြင်းထန်အဆုတ်ရောင်ရောဂါကြောင့် ရုတ်တရက်အသက်ရှူ လမ်းကြောင်း ပျက်စီးပြီး စက်တင်ဘာ ၁၄ ရက်နေ့ ညနေ ၆:၁၀ နာရီအချိန်မှာ သေဆုံးသွားပါတယ်။
တောင်ဥက္ကလာပအထူးကုဆေးရုံကြီးမှာ တက်ရောက်ကုသမှုခံယူခဲ့တဲ့ ၁၃ နှစ်အရွယ် အမျိုးသမီး (Case-2531) ဟာ ပြင်းထန်အဆုတ်ရောင် ရောဂါကြောင့် ရုတ်တရက် အသက်ရှူလမ်းကြောင်းပျက်စီးခြင်း၊ သွေးနဲ့ ဆိုင်တဲ့ ရောဂါအခံရှိခြင်းတို့ကြောင့် ဒီနေ့မနက် ၁:၄၅ နာရီအချိန်မှာ သေဆုံးသွားပါတယ်။
မနေ့ညက ဓာတ်ခွဲနမူနာ ၁,၉၅၆ ခု စစ်ဆေးရာမှာလည်း ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၁၈၅ ဦး ထပ်မံတွေ့ရှိပြီး လူနာ ၁ ဦး သေဆုံးခဲ့ပါတယ်။ ဒါကြောင့် စက်တင်ဘာ ၁၆ ရက်နေ့အတွက် ဓာတ်ခွဲနမူနာ ၄,၅၅၅ ခုအား စစ်ဆေးခဲ့ပြီး ကိုဗစ်-၁၉ အတည်ပြု လူနာသစ် ၂၅၈ ဦး တွေ့ရှိခဲ့တယ်လို့ ကျန်းမာရေးနဲ့အားကစားဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၃,၈၉၄ ဦး၊ သေဆုံးသူ ၄၆ ဦး၊ ဆေးရုံမှ ဆင်းခွင့်ပြုခဲ့တဲ့ လူနာဟောင်း ၉၀၈ ဦးနဲ့ စောင့်ကြည့်လူနာအသစ် ၂၈၀ ဦးရှိတယ်လို့ ကျန်းမာရေးဌာနက သိရပါတယ်။
