ထိုင်းတွင် မြန်မာ ၆ ဦးပါသည့် ငါးဖမ်းလှေ ၁ စီးတိမ်းမှောက်၊ ၃ ဦးပျောက်ဆုံးနေ
DVB
·
September 16, 2020
ထိုင်းနိုင်ငံအနောက်ပိုင်း ပရကျူပ်ခီရီခန်ခရိုင်ထဲမှာ မနေ့ညက ပုဂ္ဂလိကပိုင်ငါး ဖမ်းလှေတစ်စီး မတော်တဆတိမ်းမှောက်သွားပြီး မြန်မာရေလုပ်သားအပါအဝင် ၃ ဦးပျောက်ဆုံး နေတယ်လို့ ထိုင်းအဏ္ဏဝါပြင် အမျိုးသားအကျိုးစီးပွားစောင့်ရှောက်ရေးဗဟိုဌာန THAIMECC က ထုတ်ပြန်ပါတယ်။
ဝိစနုရုန့်ရိန်းအမည်ရှိ ငါးဖမ်းလှေတစ်စီးဟာ စက်တင်ဘာ ၁၅ ရက် ညက ပရန်ပူရီဆိပ်ကမ်း အရှေ့ဘက် ၁၆ မိုင်အကွာ ပင်လယ်ပြင်ထဲမှာ တိမ်းမှောက်သွားကြောင်း ည ၁၀ နာရီကျော်က သတင်းပေးပို့ချက်ရတဲ့အတွက် အမှတ် ၂၆၆ ရေတပ်ဖွဲ့၊ အပတ်စဉ် ၈၁၆ ရေတပ်ဖွဲ့ဝင်နဲ့ ရေကြောင်း ကယ်ဆယ်ရေးအဖွဲ့တွေ စေလွှတ်ကယ်ဆယ်ခဲ့တယ်လို့ ခရိုင်ရေတပ်စခန်းဌာနချုပ် ဒုညွန်မှူး ဗိုလ်မှူးချုပ် ထန်ယနိထိ ကယောက်ဝိန်းတေချရတ်က ပြောပါတယ်။
အဆိုပါ ငါးဖမ်းလှေထဲမှာ ထိုင်းလူမျိုး လှေဦးစီး ၁ ယောက်နဲ့ ရေလုပ်သား ၇ ဦး (မြန်မာ ၆ ဦး နဲ့ ကမ္ဘောဒီးယား ၁ ဦး) တို့ ပါဝင်ပြီး မနေ့ညက ငါးဖမ်းထွက်စဉ် လှိုင်းကြီးလေထန်လာလို့ စက်ချို့ယွင်းပြီး မတော်တဆတိမ်းမှောက်ခဲ့တာလို့ ဆိုပါတယ်။
ကယ်ဆယ်ရေးအဖွဲ့တွေဟာ ည ၁၁ နာရီခွဲအချိန်မှာ ရေလုပ်သား ၅ ဦးကို ရှာဖွေ ကယ်တင်နိုင်ခဲ့ပြီး နောက်ထပ် ၃ ဦးကိုလည်း တညလုံးရှာဖွေပေမယ့် မတွေ့ဘဲ လေထန်ပြီး လှိုင်းကြီးလာလို့ ဒီကနေ့ မနက် ၂ နာရီခွဲမှာ ရှာဖွေရေး ရပ်နားလိုက်ရတယ်လို့ ကယ်ဆယ်ရေး အဖွဲ့တွေက ပြောပါတယ်။
ပျောက်ဆုံးသူ ၃ ဦးမှာ ထိုင်းလူမျိုး လှေဦးစီး ၁ ယောက်နဲ့ မြန်မာရေလုပ်သား ၂ ယောက်ဖြစ်ကြောင်း၊ လှေဦးစီးမှာ လှေထဲကနေထွက်လာတာမတွေ့ရဘဲ မြန်မာရေလုပ်သား ၂ ဦးကတော့ ရေမကူးတတ်ဘူးလို့ ဆိုပါတယ်။
ကယ်ဆယ်နိုင်ခဲ့တဲ့ ရေလုပ်သား ၅ ဦးကိုတော့ ဒီမနက်မှာ ပရန်ပူရီဆေးရုံကို ပို့ပေးခဲ့ပြီး ကျန်းမာရေးစောင့်ရှောက်ပေးခဲ့ကြောင်း ၊ သူတို့မှာ ဒဏ်ရာကြီးမားတာမရှိလို့ ရေတပ်စခန်းမှာ ခေါ်ထားပြီး လှေပိုင်ရှင်ကိုလည်း အကြောင်းကြားထားတယ်လို့ ရေတပ်တာဝန်ရှိသူမှ သတင်းထော က်ကို ပြောပါတယ် ။
ကိုးကား- THAIMECC
