Homeမြန်မာသတင်း
သီပေါနှင့် လင်းခေးမြို့နယ်အတွင်း ရေကြီးပြီး ဒေသခံ ၁၀၀ ကျော် ဘေးလွတ်ရာပြောင်းရွှေ့ခိုလှုံ
သီပေါနှင့် လင်းခေးမြို့နယ်အတွင်း ရေကြီးပြီး ဒေသခံ ၁၀၀ ကျော် ဘေးလွတ်ရာပြောင်းရွှေ့ခိုလှုံ
နန်းမြနဒီ
·
August 24, 2020
ရှမ်းပြည်နယ် သီပေါမြို့နယ်နဲ့ လင်းခေးမြို့နယ်ထဲက ကျေးရွာတွေမှာ ရေကြီးမှုဖြစ်ပွားပြီး ဒေသခံ ပြည်သူလူထု ပေါင်း ၁၀၀ ကျော် ဘေးလွတ်ရာကို ပြောင်းရွှေ့ခိုလှုံနေရပါတယ်။
သီပေါမြို့နယ် နားမခေါ်ကျေးရွာမှ ဒီနေ့မနက် ၃ နာရီလောက်က တောင်ကျရေတွေ ဝင်ရောက်လာလို့ ရွာသားတွေ ဘေးကင်းရေး သွားရောက်ကူညီကယ်ဆယ်ခဲ့တယ်လို့ သီပေါ နယ်စည်းမခြားပရဟိတအဖွဲ့ဥက္ကဋ္ဌ ကိုမျိုးက ဒီဗွီဘီကို ပြောပါတယ်။
“တောင်ကျရေတွေဝင်လာလို့ အိမ်တွေထဲရေဝင်တာပေါ့နော်၊ ရေက ကားလမ်းပေါ်ထိ တက်လာတယ်။ ကျနော်တို့ ကူညီရေးအဖွဲ့က ရေထဲမြှုပ်နေတဲ့ အိမ်ကပစ္စည်းတွေ ကူရွှေ့ပေးတယ်။ ရေဝိုင်းနေလို့ ပိတ်မိနေတဲ့ နေအိမ် ၂ လုံးက မိသားစုဝင်တွေကိုလည်း ကူညီကယ်ထုတ်ပြီး ဘေးလွတ်ရာပို့ပေးခဲ့ရပါတယ်ခင်ဗျ။ ရေဝင်တဲ့အိမ်တွေက တော်တော်များပါတယ်။ စာရင်းကောက် နေတုန်းပါခင်ဗျ။ ကျနော်တို့မြင်တာတော့ နေအိမ်အလုံး ၂၀ ကျော်မယ်၊ တချို့က အောက်ခြေတွေပဲ မြုပ်တယ်။ တချို့က အိမ်ရဲ့တဝက်ကျော်ပေါ့။ လူထိခိုက်ဒဏ်ရာရတာမရှိဘူး။ အိမ်ထောင် ပရိဘောဂတချို့တော့ ပျက်စီးနိုင်ပါတယ်။”
ရေကြီးတဲ့နေရာကို နယ်စည်းမခြားပရဟိတအဖွဲ့အပြင် သီပေါလူငယ်အသင်း၊ သီပေါ ကြက်ခြေနီအသင်း၊ နမ့်လန် နဲ့ သီပေါက မီးသတ်တပ်ဖွဲ့ဝင်တွေ၊ နမ့်လန်ဖြူစင်နှလုံးသားပရဟိတ စတဲ့အဖွဲ့တွေက သွားရောက်ကူညီခဲ့ပါတယ်။
ရေကြီးတဲ့အိမ်က မိသားစုဝင်တွေဟာ လောလောဆယ် နားမခေါ်ဘုန်းကြီးကျောင်းမှာ သွားရောက်ခိုလှုံနေပြီး ရေလည်းတဖြည်းဖြည်းပြန်ကျနေပြီမို့ စိုးရိမ်စရာမရှိဘူးလို့ နယ်စည်းမခြား ပရဟိတက ပြောသွားပါတယ်။
ရှမ်းပြည်တောင်ပိုင်း လင်းခေးမြို့နယ် နားကုန်းကျေးရွာအုပ်စုရှိ တာဆွပ်တိန်းရွာမှာတော့ ဩဂုတ် ၂၁ ရက်နေ့က သံလွင်မြစ်ရေတက်လာတာကြောင့် ၂၂ ရက်နေ့မှာ ရေတွေက ခေါင်မိုး တံစက်မြိတ်ထိ ရောက်လာလို့ ရွာသားပေါင်း ၁ ရာကျော် ဘေးလွတ်ရာ ပြောင်းရွှေ့နေထိုင်နေ ရတယ်လို့ လင်းခေးက လယ်ယာစိုက်ပျိုးမှုဖွံ့ဖြိုးတိုးတက်ရေးအဖွဲ့ ဥက္ကဋ္ဌ စိုင်းဆေဟန်က ဒီဗွီဘီကို ပြောပါတယ်။
“အဲဒီနေရာက လင်းခေးကနေဟိုမိန်းကိုသွားတဲ့ ကူးတို့ဆိပ်ရွာပါ။ အများအားဖြင့် ကမ်းနား ဘေးက ဈေးဆိုင်တွေပေါ့။ ခါတိုင်းနှစ်လည်း သံလွင်မြစ်ရေတက်ရင် ရေကြီးလေ့ရှိတယ်။ ဒီနှစ်က တော့ ရေတက်လာတာတအားမြန်လို့ ပစ္စည်းတွေအကုန်မရွှေ့လိုက်ရဘူး။ ရေထဲနစ်နေတဲ့ အိမ်နဲ့ ဆိုင်ပေါင်း ၂၄ လုံးရှိပြီး လူတစ်ရာကျော် အမြင့်ပိုင်းဘက် တိမ်းရှောင်ရတယ်။ တချို့က အဲဒီအနီးနား ကျေးရွာကနေ ဈေးဆိုင်လာဖွင့်တော့ သူတို့မူရင်းရွာ ပြန်သွားကြတယ်။ တချို့ အဝေးကလာတဲ့ သူတွေတော့ အဲဒီရေကြီးတဲ့ညက ကုန်းပေါ်မှာဖြစ်သလိုအိပ်ခဲ့ရတယ်။”
တာဆွပ်တိန်းကူးတို့ဆိပ်မှာ ဒီနေ့မနက်ထိ ရေတွေမကျသေးကြောင်း၊ အဲဒီနေရာဟာ လင်းခေးမြို့ဘက်ကို စီးဆင်းသွားတဲ့ နမ့်တိန်းချောင်းဝလည်းဖြစ်တာကြောင့် နမ့်တိန်းချောင်းလည်း ရေမြင့်တက်နေပြီး ချောင်းဘေးတဘက်တချက်က ဝမ်တာ၊ နားကုန်း၊ ဝမ်ဟတ်၊ မိုက်အွန်လောင်း စတဲ့ကျေးရွာနေပြည်သူတွေလည်း သတိနဲ့ နေထိုင်နေရကာ တချို့က ပစ္စည်းတွေကို အမြင့်ပိုင်း ဘက် ကြိုရွှေ့ထားကြပါတယ်။