စစ်တွေနှင့်မြောက်ဦးတွင် ပြည်ပခရီးသွားရာဇဝင်မရှိသည့် ကိုဗစ်-၁၉ လူနာသစ် ၁၀ ဦး တွေ့ရှိ

ရခိုင်ပြည်နယ်၊ စစ်တွေမြို့မှာ ပြည်ပခရီးသွားရာဇဝင်မရှိတဲ့ ၉ ဦးနဲ့ မြောက်ဦးမြို့က ၁ ဦးတို့မှာ ကိုဗစ်-၁၉ ရောဂါပိုး တွေ့ရှိတယ်လို့ ကျန်းမာရေးနှင့်အားကစားဝန်ကြီးဌာနက ဒီနေ့မနက် ၈ နာရီထုတ်ပြန်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က  ဒုတိယအသုတ်အဖြစ် ဓာတ်ခွဲနမူနာ ၈၁၁ ခုအား  ထပ်မံစစ်ဆေးပြီးစီးခဲ့ရာ ကိုဗစ်-၁၉ အတည်ပြုလူနာသစ် ၁၀ ဦးတွေ့ရှိတာလို့ ဆိုပါတယ်။ အခုတွေ့ရှိတဲ့ လူနာသစ် ၁၀ ဦးဟာ ကိုဗစ်-၁၉ အတည်ပြုလူနာတွေနဲ့ ထိတွေ့မရှိဘဲ စစ်တွေမြို့မှာ အသွားအလာကန့်သတ်ထားသူတွေ ဖြစ်တယ်လို့ သိရပါတယ်။ သူတို့ကို စစ်တွေမြို့ ပြည်သူ့ဆေးရုံနဲ့ မြောက်ဦး ပြည်သူ့ဆေးရုံတွေမှာ ဆေးကုသမှု ခံယူစေမယ်လို့ ဆိုပါတယ်။ မနေ့ညက ပထမအသုတ်အဖြစ် ဓာတ်ခွဲနမူနာ စုစုပေါင်း ၈၀၀ ခုအား စစ်ဆေးရာမှာလည်း စစ်တွေမြို့နယ်နေ ပြည်ပခရီးသွားရာဇဝင်မရှိတဲ့ ဓာတ်ခွဲအတည်ပြုလူနာသစ် ၃ ဦး တွေ့ရှိခဲ့တယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။ မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၄၀၉ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ  စုစုပေါင်း ၃၃၃ ဦးထဲက ဆေးရုံမှ ဆင်းခွင့်ပြုခဲ့ပြီးသူ ၃၃၁ ဦးနဲ့ စောင့်ကြည့်လူနာအသစ် ၂၄ ဦးရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။ ကမ္ဘာတဝန်းမှာတော့ ဒီနေ့မနက်ပိုင်းအထိ ကိုဗစ်-၁၉ အတည်ပြုလူနာ ၂၂.၈ သန်းကျော်၊ သေဆုံးသူ ၈ သိန်းခန့်နဲ့ ရောဂါပိုးကင်းစင်လာသူ ၁၅ သန်းကျော် ရှိပြီလို့ သိရပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up