ကျောက်တော်မြို့နယ်၌ လက်နက်ကြီးကျရောက်ပေါက်ကွဲ၊ ဒေသခံ ၄ ဦးဒဏ်ရာပြင်းထန်
2.2K
ရခိုင်ပြည်နယ်၊ ကျောက်တော်မြို့နယ်၊ ကျောက်တစ်လုံးကျေးရွာအတွင်းကို လက်နက်ကြီးကျရောက်ပေါက်ကွဲလို့ ကျေးရွာသား ၄ ဦး ဒဏ်ရာပြင်းထန်စွာရရှိခဲ့တယ်လို့ လွှတ်တော်ကိုယ်စားလှယ်နဲ့ ဒေသခံကျေးရွာသားတွေက ဒီဗွီဘီကို ပြောပါတယ်။
သြဂုတ် ၃ ရက် မနက် ၈ နာရီလောက်က လက်နက်ကြီးကျည်တစ်လုံး ကျောက်တစ်လုံးကျေးရွာအတွင်း ကျရောက်ပေါက်ကွဲခဲ့လို့ ရွာက အမျိုးသမီး ၂ ဦးနဲ့ အမျိုးသား ၂ ဦး ဒဏ်ရာရရှိခဲ့တာလို့ လူမှုကယ်ဆယ်ရေးဆောင်ရွက်နေတဲ့ ကိုကျော်လှမြင့်က ပြောပါတယ်။
ဒဏ်ရာရရှိသွားသူတွေကတော့ ဒေါ်အေးညွန့်ယဉ် (၄၅ နှစ်) ၊ ဦးကျော်သိန်း (၃၄ နှစ်) ၊ ဒေါ်လှသန်းရီ(၅၀ နှစ်)နဲ့ ဦးစောထွန်းမောင် (၅၄ နှစ်) တို့ ဖြစ်ပါတယ်။
ဒဏ်ရာပြင်းထန်တဲ့ ဒေါ်လှသန်းရီ၊ ဒေါ်အေးညွန့်ယဉ်နဲ့ ဦးကျော်သိန်းတို့ကို စစ်တွေဆေးရုံကို မနေ့က ပို့ဆောင်ခဲ့ပြီး ဦးစောထွန်းမောင်ကတော့ ကျောက်တော်ဆေးရုံမှာ ဆေးကုသမှု ခံယူနေရပါတယ်။
ကျောက်တော်မြို့နယ်လွှတ်တော်ကိုယ်စားလှယ်ဦးထွန်းဝင်းက “လက်နက်ကြီးပေါက်ကွဲလို့ ဒဏ်ရာရရှိနေတယ်လို့ ဒေသခံတွေက ဖုန်းဆက်ပြောလာတာကြောင့် ကျနော်ကိုယ်တိုင်ယူခဲ့ပြီး ကျောက်တော်ဆေးရုံကိုပို့ဆောင်ခဲ့တယ်။ သုံးဦးကတော့ ဒဏ်ရာပြင်းထန်လို့ စစ်တွေဆေးရုံကို ပို့လိုက်တယ်။ ကျန်တစ်ဦးကတော့ ကျောက်တော်ဆေးရုံမှာ ဆေးကုသမှုခံယူနေတယ်” လို့ပြောပါတယ်။
ရခိုင်ပြည်နယ်မှာ တပ်မတော်နဲ့ ရခိုင့်တပ်တော်အေအေတို့ တိုက်ပွဲဖြစ်ပွားခဲ့တာကြောင့် ဒေသခံ အရပ်သားပြည်သူတွေ ထိခိုက်ဒဏ်ရာရရှိပြီး သေဆုံးသူတွေလည်း တိုးလာနေပါတယ်။
