Lead Story ကျန်းမာရေး မှုခင်း ဝူဟန် ကိုရိုနာဗိုင်းရပ်စ် သတင်း
မန္တလေး-ပြင်ဦးလွင်ကားလမ်း၌ တရားမဝင်ဝင်ရောက်လာသည့် တရုတ်နိုင်ငံသား ၆ ဦးဖမ်းမိ
Email This Story :
မန္တလေးတိုင်း၊ ပြင်ဦးလွင်မြို့နယ်၊ ပြင်ဦးလွင်-မန္တလေးအဆင်းကားလမ်းမှာ တရားမဝင် ဝင်ရောက်လာတဲ့ တရုတ်နိုင်ငံသား ၆ ဦးနဲ့ မြန်မာနိုင်ငံသား ၂ ဦးကို ဖမ်းဆီးရမိခဲ့တယ်လို့ ပြင်ဦးလွင်မြို့နယ်၊ ပြင်စာနယ်မြေရဲစခန်းကနေ သိရပါတယ်။
ဇူလိုင် ၂၈ ရက် မနက်အစောပိုင်းက မော်တော်ယာဉ်တစ်စီးကို မသင်္ကာတဲ့အတွက် စစ်ဆေးရာက တရားမဝင်ဝင်ရောက်လာသူတွေကို ဖမ်းဆီးရမိခဲ့တာ ဖြစ်ပါတယ်။
ပြင်စာနယ်မြေရဲစခန်းမှ ရဲတပ်ဖွဲ့တာဝန်ရှိသူတွေ လှည့်ကင်းဆောင်ရွက်နေစဉ် ပြင်ဦးလွင်- မန္တလေး အဆင်းလမ်း မိုင်တိုင် အမှတ်၁၉/၀အနီးရှိ လမ်းဘေးရေဆိုင်မှာ ကားရေဆေးနေတဲ့ KIA BONGO ||| အဖြူရောင်ယာဉ်ဟာ အစိမ်းရောင်မိုးကာကို ယာဉ်တစ်ဝက်အုပ်ထားတာကြောင့် မသင်္ကာတဲ့အတွက် စစ်ဆေးခဲ့ရာက အခုလိုတွေ့ရှိဖမ်းဆီးမိခဲ့တာဖြစ်ပါတယ်။
မော်တော်ယာဉ်ပေါ်မှာ ထပ်ခိုးပြုလုပ် တင်ဆောင်လာတဲ့ တရားမဝင်တရုတ်နိုင်ငံသား အမျိုးသား ၅ ဦးနဲ့ အမျိုးသမီး ၁ ဦး၊ မြန်မာနိုင်ငံသား ၂ ဦးတို့ကို တွေ့ရှိခဲ့ပြီး ယာဉ်မောင်းဖြစ်သူ ကတော့ ထွက်ပြေးသွားပါတယ်။
သူတို့ကိုစစ်ဆေးတဲ့အခါမှာ ဇူလိုင် ၂၆ ရက်နေ့မှာ တရုတ်နိုင်ငံ၊ ကျယ်ခေါင်က တဆင့် လက်မှတ်အထောက်အထား တခုမှမပါပဲ တရားမဝင် ဝင်ရောက်လာသူတွေဖြစ်တယ်လို့ စစ်ဆေး သိရပါတယ်။
တရားမဝင်ဝင်ရောက်လာတဲ့ တရုတ်နိုင်ငံသား ၆ ဦးနဲ့ မြန်မာနိုင်ငံသား ၂ ဦးတို့ကို ပြင်စာနယ်မြေရဲစခန်းမှာ လဝကအက်ဥပဒေပုဒ်မ ၁၃(၁)/၁၃(၅) အရ အမှုဖွင့်ထား ပါတယ်။
သတင်း- ထိန်ထိန်လင်း
