စင်ကာပူတွင် အခက်ကြုံနေသည့် မြန်မာနိုင်ငံသား ၁၅၅ ဦးကို ပြန်ခေါ်
DVB
·
July 9, 2020
ကိုဗစ်-၁၉ ရောဂါကြောင့် စင်ကာပူမှာ အခက်အခဲကြုံတွေ့နေရတဲ့ မြန်မာနိုင်ငံသား ၁၅၅ ဦးကို ကယ်ဆယ်ရေးလေယာဉ်နဲ့ မနေ့ညက ပြန်လည်ခေါ်ဆောင်ခဲ့တယ်လို့ နိုင်ငံခြားရေးဝန်ကြီးဌာနက ထုတ်ပြန်ပါတယ်။
မြန်မာနိုင်ငံသား ၁၅၅ ဦးကို စင်ကာပူနိုင်ငံ၊ ချန်ဂီအပြည်ပြည်ဆိုင်ရာ လေဆိပ်မှတဆင့် မြန်မာအမျိုးသားလေကြောင်းလိုင်း (MNA) ကယ်ဆယ်ရေးလေယာဉ်နဲ့ ပြန်လည်ခေါ်ဆောင်ခဲ့တာဖြစ်ပြီး ဇူလိုင် ၈ ရက်နေ့ ညနေ ၅ နာရီလောက် ရန်ကုန် အပြည်ပြည်ဆိုင်ရာ လေဆိပ်ကို ပြန်လည်ရောက်ရှိခဲ့ပါတယ်။
သူတို့အားလုံးကို ကျန်းမာရေးစိစစ်ပြီး ၂၁ ရက်တာ အသွားအလာကန့်သတ် နေထိုင်ဖို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ကျန်းမာရေးဝန်ကြီးဌာနနဲ့ ရန်ကုန်တိုင်း အစိုးရအဖွဲ့တို့က သက်ဆိုင်ရာအခန်းကဏ္ဍအလိုက် ဆောင်ရွက်ပေးနေတယ်လို့ ဆိုပါတယ်။
နိုင်ငံတကာခရီးသည်တင် လေယာဉ်တွေ ပျံသန်းမှု ယာယီရပ်ဆိုင်းထားတာကြောင့် ပြည်ပ နိုင်ငံတွေမှာ အခက်အခဲကြုံတွေ့နေတဲ့ မြန်မာနိုင်ငံသားစုစုပေါင်း ၇၀၈၈ ဦးအား ပြန်လည်ခေါ်ဆောင်ပေးခဲ့ပြီးပြီလို့ ဆိုပါတယ်။