အင်္ဂလန်က ပြန်လာသည့် အမျိုးသား ၁ ဦးတွင် ကိုဗစ်-၁၉ ရောဂါပိုး တွေ့ရှိ
DVB
·
July 8, 2020
ရန်ကုန်တိုင်း၊ ရန်ကင်းမြို့နယ်နေ အင်္ဂလန်နိုင်ငံက ပြန်လာတဲ့ အမျိုးသား ၁ ဦးမှာ ကိုဗစ်-၁၉ ရောဂါပိုး တွေ့ရှိခဲ့တယ်လို့ ကျန်းမာရေးနှင့် အားကစားဝန်ကြီးဌာနက ဒီနေ့ည ၈ နာရီထုတ်ပြန်ပါတယ်။
ဇူလိုင် ၈ ရက်နေ့အတွက် ပထမသုတ်အဖြစ် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၆၅၅ ခု၊ ဆေးသုတေသနဦးစီးဌာနက ၁၈၄ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) က ၂၁၆ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) က ၁၈၈ ခုနဲ့ ရန်ကုန်မြို့၊ အမှတ် (၁) တပ်မတော်ဆေးရုံကြီး ခုတင် (၁၀၀၀) က ဓာတ်ခွဲနမူနာအခု ၁၆၀၊ စုစုပေါင်း ၁,၄၀၃ ခုအား ဒီနေ့ည စစ်ဆေးပြီးစီးခဲ့တာပါ။
အင်္ဂလန်က ပြန်လာတဲ့ အသက် ၂၅ နှစ်အရွယ် အမျိုးသား လူနာအမှတ် ၃၁၇ ဟာ မရမ်းကုန်းမြိုနယ်မှာ အသွားအလာကန့်သတ်ထားသူဖြစ်ပြီး ကိုဗစ်-၁၉ အတည်ပြုလူနာတွေနဲ့ ထိတွေ့မှုမရှိခဲ့ဘူးလို့ဆိုပါတယ်။ သူ့ကို တောင်ဥက္ကလာပ အထူးကုဆေးရုံကြီးမှာ ဆေးကုသမှု ခံယူစေမယ်လို့ သိရပါတယ်။
မြန်မာနိုင်ငံမှာ ဒီနေ့ည ၈ နာရီအထိ ကိုဗစ် ၁၉ အတည်ပြုလူနာ ၃၁၇ ဦး၊ သေဆုံးသူ ၆ ဦး၊ လူနာအမှတ် ၂၂၁, ၂၅၂, ၂၆၇,၂၈၃ နဲ့ ၂၈၆ တို့မှာ နှစ်ကြိမ်ဆက် ရောဂါပိုး မတွေ့တာကြောင့် ရောဂါပိုးကင်းစင်လာသူ ၂၅၀ ဦး၊ အဲဒီထဲက ဆေးရုံမှ ဆင်းခွင့်ပြုခဲ့ပြီးသူ ၂၃၃ ဦးနဲ့ စောင့်ကြည့်လူနာအသစ် ၄၆ ဦး ရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
