အမေရိကန်တွင် မှတ်ကျောက်တစ်ခုကို ထုဆစ်ခြင်း

မတ်ကိန်းအင်စတီးကျုရဲ့  မျိုးဆက်သစ်ခေါင်းဆောင် တစ်ယောက်အနေနဲ့ လော့စ်အိန်ဂျလစ်မြို့တော်ဝန်ရုံးရဲ့ နိုင်ငံတကာဆက်ဆံရေးရုံးမှာ ဝင်ရောက် ကူညီလုပ်ကိုင်ပြီး အမေရိကန်နိုင်ငံရဲ့ နိုင်ငံရေး၊ စီးပွားရေး၊ လူမှုရေး၊ တရားစီရင်ရေး၊ ဥပဒေပြုရေး၊ လူ့အခွင့်အရေးနဲ့ ပတ်ဝန်းကျင်ထိန်းသိမ်းရေးတို့ကို လက်တွေ့ကျကျ လေ့လာရပါတယ်။ အမေရိကန်ပြည်ထောင်စုတစ်ခွင်ရှိ မြို့တော်တွေကို သွားရောက်ပြီးလည်း နိုင်ငံရေး ခေါင်းဆောင်တွေ၊ စီးပွားရေးပညာရှင်တွေ၊ တက္ကသိုလ် ပါမောက္ခတွေ၊ ရေတပ်နဲ့ စစ်တပ် ခေါင်းဆောင်တွေနဲ့ နာမည်ကျော် အာကာသယာဉ်မှူးတွေကို လူတွေ့နဲ့ အွန်လိုင်းကတဆင့် တွေ့ဆုံကာ ခေါင်းဆောင်မှုဆိုင်ရာ ပညာရပ်ကိုလည်း လေ့လာခွင့်ရပါတယ်။ အခုလို လုံးဝမမျှော်လင့်ထားတဲ့ မကြုံစဖူး အထူးအခွင့်အရေးတွေကို ရယူခံစားလို့ အပြီးမှာတော့ မြန်မာနိုင်ငံရဲ့ ခေါင်းဆောင်မှုတွေနဲ့ပတ်သက်ပြီး လူကြီးတွေကို ပြန်လည်တင်ပြဖို့ ကျနော့်ကို မတ်ကိန်းအင်စတီကျုကနေ အီးမေးလ်နဲ့ အကြောင်းကြားပါတယ်။ အီးမေးလ် ဖတ်လို့ အပြီးမှာတော့ ကျနော့်ကိုယ်ကျနော် ဘာလုပ်ရမှန်းကို မသိအောင်ဖြစ်မိတာ မှတ်မှတ်ရရပါပဲ။ ဘာဖြစ်လို့လဲဆိုတော့ ကျနော် တင်ပြရမယ့်သူတွေက အင်မတန်မှ ရာထူးကြီးမားပြီး ဂုဏ်သိက္ခာ ကြီးမားလှတဲ့ လူကြီးတွေ ဖြစ်နေလို့ပါပဲ။ သူတို့တတွေကတော့ အမေရိကန်နိုင်ငံဆိုင်ရာ မြန်မာသံအမတ်ကြီး အောင်လင်း၊ အမေရိကန် သံအမတ်ကြီး မိုက်ကယ်ပေါလ်၊ အမေရိကန် ဒုတိယဗိုလ်ချုပ်ကြီး ဘင်ဂျမင်ဖရတ်ကလေ၊ အေအက်စ်ယူတက္ကသိုလ်က ဒါရိုက်တာ ဒေါက်တာဂျေဆန်ရောဘတ်၊ ဟောလီးဝုဒ်က ရုပ်သံပရိုဂျူဆာ ကရစ်တပ်၊ ဂျော့တောင်းတက္ကသိုလ်က လူ့အခွင့်အရေးဆိုင်ရာ ပါမောက္ခ အယ်လီဆာ မာဆီမီနို၊ လော့စ်အိန်ဂျလစ်ဒုတိယ မြို့တော်ဝန် အမေရိကန်သံအမတ်နီနာဟရှီကန်၊ လော့စ်အိန်ဂျလစ်မြို့တော်ဝန်ရုံးက နိုင်ငံတကာဆက်ဆံရေး ဒါရိုက်တာ ဒီပရစ် ဆီဒူ၊ မတ်ကိန်းအင်စတီကျူးက ပရိုဂရမ် မန်နေဂျာ ရေချယ်နဲ့ Empower Kids Palestine တည်ထောင်သူ အတ်အိုစီလီး တို့ဖြစ်ကြပါတယ်။ ကျနော့် ဘ၀မှာ အခုလို ပညာတတ်၊ ရာထူးကြီး၊ အတွေ့အကြုံ ဗဟုသုတများတဲ့ ထက်မြက်တဲ့ လူကြီးတွေ အားလုံးစုံစုံလင်လင်ရှေ့မှာ အင်္ဂလိပ်ဘာသာစကားနဲ့ တစ်ခါမှ မပြောဘူး၊ မဆိုဖူးတော့ ကျနော့်ခမျာ ကြောက်စိတ်တွေမွှန်ထူသွားခဲ့တာ ဘယ်တော့မှ မေ့နိုင်မယ်လို့ တောင် မထင်မှတ်ပါဘူး။ ကျနော့်ရဲ့ ခေါင်းဆောင်မှုဆိုင်ရာ လှုပ်ရှားမှုနဲ့ ပတ်သက်ပြီး ပြင်ဆင်မှုတွေ ဘာတစ်ခုမှမလုပ်ခင် ခရစ်ယာန်တစ်ယောက်ဖြစ်တဲ့ ကျနော့်အနေနဲ့ ကျနော့်အခန်းကျဉ်းလေးထဲမှာ ဘုရားသခင်ရဲ့ရှေ့ ဒူးထောက်ပြီး ဆုတောင်းလိုက်ပါတယ်။ ကျနော့်ကို ဉာဏ်ပညာပေးဖို့၊ အကောင်းပြင်ဆင်နိုင်ဖို့နဲ့ လိုအပ်တဲ့ခွန်အားတွေ ပေးဖို့ ဘုရားသခင်ထံ ဆုတောင်းပါတယ်။ ဆုတောင်းလို့ အပြီးမှာတော့ မတ်ကိန်းအင်စကျုရဲ့ ခေါင်းဆောင်တွေဖြစ်တဲ့ အမေရိကန် သံအမတ်ကြီး မိုက်ကယ်ပေါလ်နဲ့ အမေရိကန် ဒုတိယဗိုလ်ချုပ်ကြီး ဘင်ဂျမင်ဖရတ်ကလေ တို့ကို ကျနော် ပြင်ဆင်ထားတဲ့ အချက်အလက်နဲ့ ပတ်သက်ပြီး သူတို့ကို အရင်ဆုံးတင်ပြတဲ့အခါ သူတို့ကလည်း ကျနော့်ကို ထိရောက်တဲ့ ထင်မြင်သုံးသပ်ချက် တွေနဲ့ အကြံဉာဏ်ကောင်းတွေကို ပေးပါတယ်။ တဆက်တည်းမှာဘဲ ဟောလီးဝုဒ် ပရိုဂျူဆာလည်းဖြစ် ဟားဗတ်တက္ကသိုလ် ဥပဒေကျောင်း နဲ့ အောက်စဖို့စ်တက္ကသိုလ် နိုင်ငံရေးကျောင်းဆင်းလည်းဖြစ်တဲ့ ကျနော့်ရဲ့ဆရာ ကရစ်ကို ကျနော်ပြင်ဆင်ထားတဲ့ အချက်အလက်တွေကို အီးမေလ်းနဲ့ ပို့ပြီး အကြံဉာဏ်ကောင်းတွေ ပေးဖို့ အကူအညီတောင်းပါတယ်။ သူကတော့ ကျနော့်စီမံကိန်းနဲ့ ပတ်သက်ပြီး လက်တွေ့ဆောင်ရွက်ရာမှာ အချိန်သေချာယူဖို့ မှာကြားပြီး ကျနော့်ရဲ့ အင်္ဂလိပ်စာ အရေးအသားတွေကိုလည်း သေချာပြင်ဆင်ပေးကာ အကူညီပေးပါတယ်။ ဆက်လက်ပြီး ကျနော့်ရဲ့ ကြီးကြပ်ရေးမှူးဖြစ်တဲ့ လော့စ်အိန်ဂျလစ်မြို့တော်ဝန်ရုံးရဲ့ နိုင်ငံတကာဆက်ဆံရေး ဒါရိုက်တာ ဒီပရစ်နဲ့လည်း အသေးစိတ် အသေအချာ ဆွေးနွေးပါတယ်။ ဒါနဲ့ မပြီးသေးပါဘူး။ ဂျမေကာနိုင်ငံမှာ ဆရာဝန် လုပ်နေတဲ့ ကျနော့်သူငယ်ချင်း ဒေါက်တာစိုင်းထွန်းဟိန်းအောင်ကိုလည်း ကျနော် လက်ရှိပြင်ဆင်ထားတဲ့ အချက်အလက်နဲ့ ပတ်သက်ပြီး ပွင့်ပွင့်လင်းလင်း ဝေဖန်ထောက်ပြဖို့ ကျနော်အကူအညီတောင်းလိုက်ပါသေးတယ်။ ပိုသေချာအောင်လို့ အင်မတန်တော်ပြီး အင်္ဂလိပ်စာ အရမ်းကောင်းတဲ့ အင်္ဂလန်ကျောင်းဆင်း ညီမလေး သဉ္ဇာဝေနှင်းပန်ကိုလည်း အင်္ဂလိပ်စကား အပြောအဆိုနဲ့ အသုံးအနှုန်းလေးတွေနဲ့ ပတ်သက်ပြီး အကြံဉာဏ်တွေကို တောင်းခံပါတယ်။ နောက်ဆုံးအနေနဲ့ ကျနော်တို့ မတ်ကိန်းအင်စတီကျုရဲ့ ပရိုဂရမ် မန်နေဂျာ ရေချယ်၊ အမေရိကန် သံအမတ်ကြီး မိုက်ကယ်ပေါလ်နဲ့ အမေရိကန် ဒုတိယဗိုလ်ချုပ်ကြီး ဘင်ဂျမင်ဖရတ်ကလေတို့ရှေ့မှာ အစမ်းလေ့ကျင့်ပါတယ်။ ဒီလိုနဲ့ တကယ်တမ်း ကျနော် တင်ပြရမယ့်နေ့မှာတော့ ထစ်ငေါ့ကြောက်ရွံ့ နေခြင်းမရှိဘဲ ယုံကြည်မှုအပြည့်နဲ့ စိတ်တိုင်းကျ လုပ်ဆောင်နိုင်ခဲ့ပါတယ်။ “လူ့အခွင့်အရေးကို လေးစားပြီး ဒီမိုကရေစီ စံနှုန်းစံထားကို လိုက်နာတဲ့ ကိုယ်ကျင့်တရားနဲ့ ပြည့်စုံတဲ့ ခေါင်းဆောင်ကောင်းများနှင့် ခေတ်သစ်မြန်မာနိုင်ငံတော်ကြီးအား ဖန်တီးခြင်း” ဆိုတဲ့ ခေါင်းစဉ်နဲ့ တင်ပြခဲ့ပါတယ်။ မြန်မာနိုင်ငံဟာ လက်ရှိမှာ တိုင်းပြည်နဲ့ လူမျိုးကိုချစ်ပြီး အားလုံးကောင်းကျိုးအလို့ငှါ ကြိုးစားဆောင်ရွက်ကြမယ့် ကိုယ်ကျင့်တရား ကောင်းမွန်ခြင်းတွေနဲ့ ပြည့်စုံတဲ့ ခေါင်းဆောင်ကောင်း များစွာလိုအပ်နေကြောင်းကိုပြောပြပါတယ်။ ခေါင်းဆောင်လို့ပြောတဲ့အခါ မြန်မာနိုင်ငံမှာ ကောင်းမွန်တဲ့ ပြုပြင်ပြောင်းလဲမှုတွေကို ဖော်ဆောင်ပေးနိုင်တဲ့ အောက်ပါ ခေါင်းဆောင် ၆ မျိုးကို ညွှန်ပြပါတယ်။ ၁။ စစ်ခေါင်းဆောင်များက အပြစ်မဲ့ ပြည်သူ၊ ပြည်သားများကို ကာကွယ်ပေးခြင်း။ ၂။ နိုင်ငံရေးခေါင်းဆောင်များက နိုင်ငံသူ နိုင်ငံသားများရဲ့ အခွင့်အရေးတွေကို မြှင့်တင်ပေးခြင်း။ ၃။ဘာသာရေးခေါင်းဆောင်များက မေတ္တာတရားနှင့် အချင်းချင်း စည်းလုံးညီညွတ်ရေးကို ဟောပြောဝေငှခြင်း။ ၄။ ကျောင်းသားခေါင်းဆောင်များက လက်တွေ့ကျတဲ့ လူမှုလုပ်ငန်းတွေမှာ ပါဝင်ကူညီခြင်း။ ၅။စီးပွားရေးခေါင်းဆောင်များက လူမှုပတ်ဝန်းကျင် တိုးတက်ကြီးပွားရာ လုပ်ငန်းများကို တက်ကြွစွာ ဖန်တီးခြင်း။ ၆။ သတင်းမီဒီယာခေါင်းဆောင်များက လူ့အခွင့်အရေးနဲ့ ဒီမိုကရေစီ တိုးတက်ရေးကို အင်တိုက် အားတိုက် ရေးသားဖော်ပြခြင်း။  အခုဖော်ပြခဲ့တဲ့ ခေါင်းဆောင်တွေက မတူညီ ကွဲပြားတဲ့ နိုင်ငံရေး အမြင်၊ အသက်အရွယ် အပိုင်းအခြား၊ လူမျိုး၊ ဘာသာ၊ ကျား၊ မ လိင်သဘောထားခံယူမှု ရှိသူတွ အားလုံးရဲ့ ဖြစ်တည်မှုတို့ကို အရှိအတိုင်း သဘောထားကြီးစွာ လက်ခံပြီး၊ အားလုံးကို လေးစားစွာ ၊ ယဉ်ကျေးပျူငှာစွာ ပြောဆိုနှုတ်ဆက် ဆက်ဆံပြီး အထူးအဖြင့်  နိုင်ငံတကာက လက်ခံတဲ့ ကောင်းမွန်တဲ့  ဒီမိုကရေစီ စံနှုန်းတစ်ခုဖြစ်တဲ့ လူ့အခွင့်အရေးကို လေးစားလိုက်နာပါက အရောင်အသွေး စုံစုံလင်လင်နဲ့ လှပကျော့ရှင်းစွာ ဖွဲ့စည်းထားတဲ့ မြန်မာနိုင်ငံတော်ဟာ နိုင်ငံတကာက လေးစားပြီး အတုယူရတဲ့ မြန်မာပြည်ကြီး ဖြစ်လာမှာ အသေအချာပင်ဖြစ်ကြောင်းကို ထိထိမိမိတင်ပြခဲ့ပါတယ်။ သေချာနားထောင်နေတဲ့ လူကြီးတွေအားလုံးကလည်း ကျနော့်တင်ပြမှုက တော်တော် စေ့စပ်သေချာပြီး စုံစုံလင်လင် တင်ဆက်သွားတာကို တွေ့ရပါတယ်လိုပြောပါတယ်။ အမေရိကန်နိုင်ငံဆိုင်ရာ မြန်မာသံအမတ်ကြီး အောင်လင်းကတော့ ကျနော့်ကို မြန်မာပြည်ကြီးအတွက် တတ်နိုင်သမျှ ကောင်းကျိုးတွေကို သယ်ပိုးဖို့ အားပေးသွားပါတယ်။ ကျနော့်ရဲ့ တင်ပြမှု အားလုံးအပြီးမှာတော့ အမေရိကန် ဒုတိယဗိုလ်ချုပ်ကြီး ဘင်ဂျမင်ဖရတ်ကလေက ဒီကနေ့ ကျနော့်ရဲ့ တင်ပြမှုက လက်ဖျားခါရလောက်အောင် ကောင်းပြီး၊ ဟောလီးဝုဒ် ပရိုဂျူဆာကည်း ကျနော့်ကို ကျနော့်တိုင်းပြည်နဲ့ မတ်ကိန်းအင်စတီကျုကို အကောင်းဆုံးကိုယ်စားပြုသွားတဲ့ တင်ပြမှုကို လုပ်ဆောင်သွားခြင်းဖြစ်တယ်လို့ အီးမေးလ်နဲ့ပို့ပြီး ကျနော့်အတွက် ဝမ်းသာဂုဏ်ယူမိကြောင်း ပြောပါတယ်။ ခုလို အတွေ့အကြုံကနေပြီး ကိုယ်ပိုင် မှတ်စုလေးအနေနဲ့ ကျနော်သင်ခန်းစာယူ မိတာကတော့........... (၁) ကိုယ့်မှာ ကြောက်ရွံ့စိတ်ရှိလာပါက  ရင်ဆိုင်ဖို့ဖြစ်တယ်။ (၂) ကိုယ့်ရဲ့ ကြောက်စိတ်တွေကို အဖန်တစ်လဲလဲ လေ့ကျင့်ပြင်ဆင်ရင်း ကျော်လွှားနိုင်ပါတယ်။ (၃) ကိုယ့်ကိုယ်ကိုယ်  အားမနာတမ်း ပွင့်ပွင့်လင်းလင်း ဝေဖန်သုံးသပ်ဖို့လိုအပ်ပါတယ်။ (၄) ကိုယ့်ထက်တော်တဲ့သူတွေ၊ ပြီးတော့ ဗဟုသုတနဲ့ အတွေ့အကြုံ ကြွယ်၀သူတွေဆီ ကနေ အကူအညီရယူဖို့ တောင်းခံတတ်ရပါမယ်။ (၅) ကိုယ့်ကိုယ်ကိုယ် နှိမ့်ချတတ်ခြင်းက ပြင်ဆင်မှုတွေကို ဖြစ်ပေါ်စေပါတယ်။ (၆) ခရစ်ယာန်တစ်ယောက်အနေနဲ့ ကိုယ့်ရဲ့ လုပ်ဆောင်ရမယ့် အခန်းကဏ္ဍတွေအားလုံးကို ဘုရားလက်တော်ထဲမှာ အပ်နှံထားခြင်းက လုံခြုံမှုကို ဖြစ်စေပါတယ်။ (၇) ကိုယ့်နိုင်ငံရဲ့  နိုင်ငံရေး၊ စီးပွားရေး၊ လူမှုရေးနဲ့ သမိုင်းတို့ကို စိတ်ဝင်တစား လေ့လာဖို့ လိုအပ်ပါတယ်။ (၇) မှတ်ကျောက်တစ်ခုကို အောင်မြင်စွာ ထုဆစ်နိုင်ဖို့ အားလုံးရဲ့ ဝိုင်းဝန်းအားပေး ကူညီပံ့ပိုးမှု လိုအပ်ပါတယ်။ ဇော်တူးခေါင်(လော့စ်အိန်ဂျလိစ်)  (စာရေးသူ ဇော်တူးခေါင်သည် McCain Institute ၏ အနာဂတ်မျိုးဆက်သစ်ခေါင်းဆောင် အစီအစဉ်၌ ပါဝင်သူတဦးဖြစ်ပြီး လော့စ်အိန်ဂျလိစ်မြို့တော်ဝန်ရုံး၏ နိုင်ငံတကာရေးရာဌာနတွင် fellow အဖြစ် ဆောင်ရွက်နေသူ ဖြစ်သည်။)

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up